ສະມາຄົມປິ້ງໄກ່ເຊໂນສະເໜີ ໃຫ້ພະແນກອຸດສາຫະກໍາ-ການຄ້າແຂວງສະຫວັນນະເຂດຊ່ວຍເຫຼືອເລື່ອງຄ່າເຊົ່າແພງ.

ສະມາຄົມປິ້ງໄກ່ເຊໂນ ເມືອງອຸທຸມພອນ ແຂວງສະຫວັນນະເຂດ ໄດ້ສະເໜີໃຫ້ ພະແນກອຸດສາຫະກໍາ-ການຄ້າແຂວງ ທີ່ລົງມາພົບປະກັບສະມາຄົມ ໃນວັນທີ 9 ພຶດສະພາ 2023 ເພື່ອປຶກສາຫາລື ໃຫ້ການຊ່ວຍເຫຼືອກ່ຽວກັບຄ່າເຊົ່າແພງ ພາຍຫຼັງທີ່ສ້ອມແປງສໍາເລັດ,ໜຶ່ງໃນຕົວແທນສະມາຄົມປິ້ງໄກ່ເຊໂນໄດ້ເວົ້າວ່າ: ຄ່າເຊົ່າບ່ອນຂາຍປິ້ງໄກ່ລາດທີ່ເພີ່ນກໍາລັງສ້ອມແປງຢູ່ນັ້ນມີລາຄາເຊົ່າ 3-5 ລ້ານກີບ ຕໍ່ຫ້ອງ ຕໍ່ເດືອນ ບໍ່ທັນໄດ້ນັບທັງຄ່ານໍ້າ,ຄ່າໄຟຟ້າ ຖືວ່າແພງເກີນໄປ, ດັ່ງນັ້ນຈິ່ງຢາກໃຫ້ທາງຂັ້ນເທິງແກ້ໄຂຊ່ວຍ, ຖ້າວ່າຄ່າເຊົ່າຢູ່ໃນລະດັບ 5 ແສນ ຫາ 1 ລ້ານກີບ ຕໍ່ຫ້ອງ ຕໍ່ເດືອນ ແມ່ນສາມາດຢູ່ໄດ້.

ໂອກາດດັ່ງກ່າວ ທ່ານ ປອ ວັນແສງ ແກ້ວບຸນພັນ ຫົວໜ້າ ພະແນກອຸດສາຫະກໍາ-ການຄ້າແຂວງ ກໍ່ໄດ້ຮັບ ເອົາຄໍາສະເໜີຂອງສະມາຄົມໄປສະເໜີຕໍ່ຂັ້ນເທິງ ພິຈາລະນາແກ້ໄຂຕາມສະພາບຄວາມເປັນຈິງ,ຄຽງຄູ່ກັນນີ້ ທ່ານຍັງເນັ້ນໃຫ້ແມ່ຄ້າ ຫຼື ວ່າຮ້ານປິ້ງໄກ່ລາດແຕ່ລະຮ້ານທີ່ໄດ້ ເຄື່ອງໝາຍໂອດ໊ອບ ແລະ ຍັງບໍ່ທັນໄດ້ໂອດ໊ອບ ຕ້ອງໄດ້ມີການພັດທະນາການຫຸ້ມຫໍ່ ,ຮັກສາສຸຂະອະນາໄມ ແລະ ເພີ່ມຄວາມດຶງດູດຜູ້ບໍລິໂພກ,ສ້າງຄວາມເຊື່ອໝັ້ນໃຫ້ຜູ້ບໍລິໂພກ,ຮັກສາເອກະລັກປິ້ງໄກ່ລາດເຊໂນໃຫ້ຢັ້ງຢືນ ເພາະວ່າປິ້ງໄກ່ລາດເຊໂນແມ່ນ ມີຊື່ສຽງ ເປັນທີ່ຮູ້ຈັກຂອງຄົນທົ່ວປະເທດເຮົາ.

ສ່ວນທາງດ້ານ ທ່ານ ບຸນທະວີ ສີສຸມັງ ຮອງຫົວໜ້າຫ້ອງການອຸດສາຫະກໍາ-ການຄ້າເມືອງອຸທຸມພອນ ກ່າວລາຍງານວ່າ: ພາຍຫຼັງທີ່ກຸ່ມ ຫຼື ສະມາຄົມຜູ້ຜະລິດປິ້ງໄກ່ລາດເຊໂນ ໄດ້ຮັບອະນຸຍາດໃຫ້ນໍາໃຊ້ກາໝາຍຢ່າງເປັນທາງການແລ້ວ, ເຫັນວ່າໄດ້ຮັບຄວາມນິຍົມເປັນທີ່ຕ້ອງການຂອງສັງຄົມພາຍໃນ ແລະ ນັກທ່ອງທ່ຽວພາຍນອກຫຼາຍຂື້ນ ແລະ ມາຮອດປະຈຸບັນມີຈໍານວນສະມາຊິກທັງໝົດ 52 ຮ້ານ, ເຊິ່ງມີຍອດຂາຍແຕ່ລະວັນປະມານ 1.200 ຫາ 1.500 ໂຕ.

ທີ່ມາ: ເມືອງອຸທຸມພອນ

 

แชร์