ຄຸ້ມຄອງ ແລະ ຈັດຫາງານຄືໜຶ່ງໃນການຊ່ວຍເຫຼືອປະຊາຊົນໃນຍຸກເງິນເຟີ້

      ໃນຍຸກທີ່ເຄືອງຂອງແພງແລະຄ່າແຮງໜ້ອຍ,ເຮັດແນວໃດເພື່ອທີ່ຈະໄດ້ເງິນມາໃຊ້ຈ່າຍລ້ຽງດູຄອບຄົວໃຫ້ພໍຢູ່ພໍກິນ.ຊອ່ງທາງໜຶ່ງທີ່ເຫັນໄດ້ກໍຄືການຫຼັ່ງໄຫຼອອກໄປເຮັດວຽກຢູ່ຕ່າງແດນຂອງແຮງງານລາວ,ຕໍ່ໜ້າສະພາບການດັ່ງກ່າວ ພາກລັດແມ່ນມີຄວາມເປັນຫ່ວງເພາະມີຜູ້ຄົນຈຳນວນບໍ່ໜ້ອຍທີ່ເດີນທາງໄປຫາວຽກເຮັດງານທຳຢູ່ຕ່າງປະເທດແບບບໍ່ຖືກລະບຽບການ ,ຊຶ່ງຸໄດ້ກາຍເປັນບັນຫາເຄື່ອນຍ້າຍແຮງງານທີ່ຜິດກົດໝາຍ. ດັ່ງນັ້ນ ກະຊວງແຮງງານແລະສະຫວັດດີການສັງຄົມ(ຮສສ)ຈິ່ງໄດ້ຮ່ວມມືກັບຫຼາຍພາກສ່ວນທັງພາຍແລະຕ່າງປະເທດ ເພື່ອໃຫ້ຄຳແນະນຳແລະຊີ້ທາງທີ່ຖືກຕ້ອງແກ່ແຮງງານລາວ.

    ທັງນີ້,ກະຊວງແຮງງານແລະສະຫວັດດີການສັງຄົມ(ລາວ)ກໍ່ໄດ້ຮ່ວມກັບກະຊວງແຮງງານ(ໄທ)ໃນການຈັດສົ່ງແຮງງານລາວໄປເຮັດວຽກຢູ່ປະເທດໄທຕາມລະບົບ MOU , ຈາກຂໍ້ມູນທາງການລະບຸວ່າ ນັບແຕ່ເດືອນມີນາ-ທັນວາ2022 ມີການຈັດສົ່ງແຮງງານລາວໄປເຮັດວຽກຢູ່ໄທ 53.711ຄົນ.ມີການເປີດເຜີຍອີກວ່າ ການເກັບກຳແຮງງານລາວທີ່ເຂົ້າໄປເຮັດວຽກຢູ່ໄທແບບຜິດກົດໝາຍແມ່ນພົບເຫັນເປັນຈຳນວນຫຼາຍເຖິງ 152.424ຄົນ.ລາຍງານຂອງທາງການໄທໄດ້ໃຫ້ຮູ້ຕື່ມວ່າ ນອກຈາກຕົວເລກທີ່ລະບຸມາແລ້ວນັ້ນ,ກໍ່ຍັງມີແຮງງານລາວອີກຈຳນວນຫຼາຍທີ່ເຮັດວຽກຢູ່ໃນປະເທດໄທແບບຜິດກົດໝາຍຊຶ່ງບໍ່ໄດ້ຂຶ້ນທະບຽນຢ່າງເປັນທາງການ.

    ຊຶ່ງເມື່ອບໍ່ດົນມານີ້,ກະຊວງແຮງງານແລະສະຫວັດດີການສັງຄົມ ກໍ່ໄດ້ອອກຈົດໝາຍເຖິງຊາວຜູ້ອອກແຮງງານລາວບັນດາເຜົ່າ.ໂດຍທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ ກໍ່ໄດ້ສະແດງຄວາມເປັນຫ່ວງແລະໃຫ້ຄຳແນະນຳແຮງງານລາວ,ໂດຍທ່ານໄດ້ລະບຸໃນຈົດໝາຍດັ່ງກ່າວ ຊຶ່ງເນັ້ນໜັກວ່າ “ການໄປອອກແຮງງານຢູ່ຕ່າງປະເທດແບບບໍ່ຖືກຕ້ອງຕາມລະບຽບການ ຈະກໍ່ໃຫ້ເກີດຄວາມສ່ຽງຕົກເປັນເຫຍື່ອຂອງຂະບວນການຄ້າມະນຸດຂ້າມຊາດ,ຊຶ່ງຈະເສຍໂອກາດອັນດີທີ່ຄວນຈະໄດ້ຮັບ ແລະເປັນອັນຕະລາຍຕໍ່ຊີວິດຂອງຊາວຜູ້ອອກແຮງງານເອງ”.

    ໃນຈົດໝາຍດຽວກັນຍັງແຈ້ງໃຫ້ຮູ້ວ່າ ພົນລະເມືອງລາວໃນໄວເຮັດວຽກ ໂດຍສະເພາະແມ່ນໄວໜຸ່ມ,ຫາກຕ້ອງການຝຶກວິຊາຊີບແລະຢາກໄປເຮັດວຽກຢູ່ຕ່າງປະເທດ ແມ່ນໃຫ້ໄປພົວພັນແລະຂຶ້ນທະບຽນແຮງງານຢູ່ຫ້ອງການແຮງງານແລະສະຫວັດດີການສັງຄົມປະຈຳເມືອງ(ຫ້ອງການຮສສ ເມືອງ) ຫຼືທີ່ພະແນກແຮງງານແລະສະຫວັດດີການສັງຄົມແຂວງ/ນະຄອນຫຼວງ(ພະແນກ ຮສສ) ແລະສາມາດເຂົ້າໄປພົວພັນໄດ້ທີ່ສູນບໍລິການຈັດຫາງານ ຫຼືບໍລິສັດບໍລິການຈັດຫາງານທີ້ໄດ້ຮັບອະນຸຍາດຈາກພາກລັດ.ເພື່ອຂໍລາຍລະອຽດແລະຄຳແນະນຳທີ່ຖືກຕ້ອງໃນການອອກໄປເຮັດວຽກຢູ່ຕ່າງແດນ.

     ພ້ອມນີ້,ກໍ່ສາມາດຕິດຕໍ່ພົວພັນໄດ້ທີ່ເບີໂທລະສັບຂອງພະແນກຈັດຫາງານ 021 222779 ແລະເບີວ໊ອດແອັບ 020 91114568 ແລະ 020 98999969 ເພື່ອສອບຖາມແລະແຈ້ງຄວາມປະສົງໃນການຝຶກອົບຮົມວິຊາຊີບ ຫຼືການໄປເຮັດວຽກຢູ່ຕ່າງປະເທດ.

 

แชร์