ອັດຕາເງິນເຟີ້ ສປປ ລາວ ເດືອນ ເມສາ 2023 ໃນລະດັບ 39,9% ຢູ່ໃນທ່າອ່ຽງ ທີ່ສຶບຕໍ່ຕຊ່າລົງທຽບໃສ່ສາມເດືອນຜ່ານມາ

ສະພາບ ອັດຕາເງິນເຟີ້ລວມຂອງ ສປປ ລາວ ໃນ ເດືອນເມສາ 2023 ຢູ່ໃນລະດັບ 39,9% ຊຶ່ງເຫັນວ່າຢູ່ໃນທ່າອ່ຽງ ທີ່ສືບຕໍ່ຕໍ່າລົງເລັກນ້ອຍເມື່ອທຽບໃສ່ ສາມເດືອນຕົ້ນປີຜ່ານມາ (ອັດຕາເງິນເດືອນມັງກອນ, ກຸມພາ ແລະ ມີນາ 2023 ຢູ່ໃນລະດັບ 40,3%; 41,3% ແລະ 41,0% ຕາມລໍາດັບ). ເມື່ອສັງເກດຕາມຫມວດສິນຄ້າ, ຫມວດທີ່ມີອັດຕາເງິນເຟີ້ ສູງກວ່າຫມູ່ແມ່ນ ຫມວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 52,2%, ຫມວດຮັກສາສຸຂະພາບ ແລະ ຢາ ເພີ່ມຂຶ້ນ 42,5%, ຫມວດຮ້ານອາຫານ ແລະ ໂຮງແຮມ ເພີ່ມຂຶ້ນ 37,4%, ຫມວດເຄື່ອງໃຊ້ໃນເຮືອນ ເພີ່ມຂຶ້ນ 34,2%, ຄົມມະນາຄົມ ແລະ ຂົນສົ່ງ ເພີ່ມຂຶ້ນ 32,7%, ຫມວດທີພັກອາໄສ, ນ້ໍາປະປາ, ໄຟຟ້າ ແລະ ເຊື້ອເພີງຫຸງຕົ້ມ ເພີ່ມຂຶ້ນ 26,6%, ຫມວດເຫຼົ້າ ແລະ ຢາສູບ ເພີ່ມຂຶ້ນ 26,2%.

ເຖິງແມ່ນວ່າ ອັດຕາເງິນເຟີ້ລວມມີທ່າອ່ຽງຕ່ໍາລົງເມື່ອທຽບກັບໄລຍະສາມເດືອນຕົ້ນປີ, ແຕ່ຫລາຍລາຍການ ສິນຄ້າຍັງມີລາຄາສືບຕໍ່ເພີ່ມຂຶ້ນເມື່ອທຽບກັບເດືອນຜ່ານມາເຊິ່ງໂດຍລວມເພີ່ມຂຶ້ນ 1,7% ໃນນັ້ນ, ລາຕາຊິ້ນຫມູ ເພີ່ມ ຈາກ 76.349 ກີບ/ກິໂລ ມາເປັນ 78.449 ກີບ/ກິໂລ, ລາຄາຊີ້ນງົວປະເພດ 1 ເພີ່ມຈາກ 105.725 ກີບ/ກິໂລ ມາ ເປັນ 108.221 ກີບ/ກິໂລ, ໄກ່ພັນປອກເພີ່ມຈາກ 62.712 ກີບ/ໂຕ ມາເປັນ 65.255 ກີບ/ໂຕ, ປານີນລ້ຽງ ເພີ່ມ ຈາກ 43.460 ກີບ/ກິໂລ ມາເປັນ 45.627 ກີບ/ກິໂລ ແລະ ລາຄາເຝີເພີ່ມຈາກ 22.739 ກີບ/ຖ້ວຍ າເປັນ 23.353 ກີບ/ຖ້ວຍ. ນອກຈາກນັ້ນ, ຫລາຍປະເພດສິນຄ້າ ຍົກເວັ້ນນໍ້າມັນລ້ວນແຕ່ມີລາຄາເພີ່ມຂຶ້ນ.

ສະພາບການເພີ່ມຂຶ້ນຂອງລາຄາສິນຄ້າໃນເດືອນເມສາ 2023 ເຖິງແມ່ນວ່າ ບໍ່ໄດ້ຮັບຄວາມກົດດັນຈາກການ ເພີ່ມຂຶ້ນຂອງລາຄານ້ໍາມັນກໍ່ຕາມ (ນໍາ້ມັນລາຄາຫລຸດລົງເມື່ອທຽບກັບເດືອນຜ່ານມາ), ແຕ່ລາຄາສິນຄ້າໂດຍລວມຍັງ ສືບຕໍ່ເພີ່ມຂຶ້ນເນື່ອງຈາກ ເປັນໄລຍະເທດສະການປີໃຫມ່ລາວທີ່ມີຄວາມຕ້ອງການຫລາຍຂຶ້ນ ສົ່ງຜົນເຮັດໃຫ້ຫລາຍ ລາຍການສິນຄ້າມີລາຄາເພີ່ມຂຶ້ນ ແລະ ພ້ອມກັນນັ້ນ ກໍ່ແມ່ນໄດ້ຮັບຄວາມກົດດັນຈາກການອ່ອນຄ່າຂອງເງິນກີບທີ່ຍັງ ສືບຕໍ່ອ່ອນຄ່າ ເຊິ່ງເຮັດໃຫ້ລາຄາສິນຄ້ານໍາເຂົ້າຍັງສືບຕໍ່ເພີ່ມຂຶ້ນ.

ທີ່ມາ: ສູນສະຖິຕິແຫ່ງຊາດ

 

แชร์