ເສດຖະກິດມະຫາພາກອາຊຽນ+3 ຄາດຄະເນການເຕີບໂຕໃນປີ 2023 ຢູ່ລະດັບ 4,6 ສ່ວນຮ້ອຍ ແລະອັດຕາເງິນເຟີ້ຢູ່ລະດັບ 4,7 ສ່ວນຮ້ອຍ

ໃນວັນທີ 2 ພຶດສະພາ 2023 ຜ່ານມານີ້, ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ພ້ອມດ້ວຍຄະນະຂອງກະຊວງການເງິນ, ໄດ້ເຂົ້າຮ່ວມກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງ ອາຊຽນ+3 ຄັ້ງທີ 26(26th ASEAN+3 Finance Ministers and Central Bank Governors’ Meeting ຫຼື AFMGM+3) ໂດຍການເປັນປະທານຮ່ວມລະຫວ່າງປະເທດອິນໂດເນເຊຍ ແລະປະເທດຍີ່ປຸ່ນ.

ສຳລັບກອງປະຊຸມຄັ້ງນີ້ໄດ້ຮັບຟັງການລາຍງານຂອງບັນດາອົງການຈັດຕັ້ງສາກົນ-ອົງການຕິດຕາມເສດຖະກິດມະຫາພາກອາຊຽນ+3 (AMRO), ທະນາຄານພັດທະນາອາຊີ (ADB) ແລະອົງການກອງທຶນສາກົນ (IMF) ກ່ຽວກັບ ສະພາບການຂະຫຍາຍຕົວທາງດ້ານເສດຖະກິດຂອງພາກພື້ນ ແລະສາກົນ,ໂດຍສະເພາະພາກພື້ນອາຊຽນ+3 ຄາດຄະເນການເຕີບໂຕໃນປີ 2023 ຢູ່ໃນລະດັບ 4,6 ສ່ວນຮ້ອຍ ແລະອັດຕາເງິນເຟີ້ຢູ່ໃນລະດັບ 4,7 ສ່ວນຮ້ອຍ.

ກອງປະຊຸມໃນຄັ້ງນີ້, ໄດ້ປຶກສາຫາລືດ້ານນະໂຍບາຍ ແລະມາດຕະການຕ່າງໆໃນການເພີ່ມທະວີວຽກງານການຮ່ວມມືດ້ານເສດຖະກິດ-ການເງິນຂອງອາຊຽນ+3 ໃຫ້ມີສະຖຽນລະພາບ ແລະໝັ້ນທ່ຽງ,ທັງເປັນການຊຸກຍູ້ ແລະ ອຳນວຍຄວາມສະດວກໃຫ້ແກ່ການຄ້າ ແລະການລົງທຶນພາຍໃນອາຊຽນ +3 ເພື່ອຟື້ນຟູເສດຖະກິດໃຫ້ມີຄວາມເຂັ້ມແຂງ. ເຖິງວ່າໃນປີຜ່ານມາບັນດາພາກພື້ນໄດ້ຮັບຜົນກະທົບຫຼາຍຈາກການລະບາດຂອງພະຍາດໂຄວິດ-19 ແລະສືບຕໍ່ດ້ວຍບັນຫາຂໍ້ຄັດແຍ່ງ ແລະ ລາຄານໍ້າມັນກໍຄືສິນຄ້າອັດຕາເງິນເຟີ້ທີ່ເພີ່ມຂຶ້ນສູງ, ແຕ່ການເຕີບໂຕເສດຖະກິດຂອງພາກພື້ນອາຊຽນ+3 ຍັງຢູ່ໃນລະດັບສະຖຽນ, ເນື່ອງຈາກການເປີດປະເທດ ແລະການຫຼຸດຜ່ອນການຈຳກັດໃນການເດີນທາງ, ການຊົມໃຊ້ພາຍໃນທີ່ດີຂຶ້ນເຮັດໃຫ້ພາກການຜະລິດກໍມີການຂະຫຍາຍຕົວ.

ພ້ອມນີ້, ກອງປະຊຸມໄດ້ຮັບຮອງຖະແຫຼງການຮ່ວມກອງປະຊຸມ ຄັ້ງທີ 26 ແລະ ຮັບຮອງບັນດາຄວາມຄືບໜ້າຂອງວຽກງານການຮ່ວມມືດ້ານການເງິນອາຊຽນ+3, ປະກອບດ້ວຍ: ການຄົ້ນຄວ້າກົນໄກການເງິນໃໝ່ຂອງພາກພື້ນ (Regional Financial Arrangement: RFA) ທີ່ເປັນເຄື່ອງມືທີ່ຈະຊຸກຍູ້ໃຫ້ປະເທດສະມາຊິກລະດົມທຶນໄດ້ໄວຂຶ້ນ, ເພື່ອນໍາມາຮັບໃຊ້ໃຫ້ແກ່ວຽກງານການຮັກສາສະຖຽນລະພາບທາງດ້ານການເງິນ-ເງິນຕາຂອງພາກພື້ນອາຊຽນ+3; ບັນດາຄວາມຄືບໜ້າການຄົ້ນຄວ້າວຽກງານຂໍ້ລິເລີ່ມຊຽງໃໝ່ເປັນກົນໄກຫຼາຍຝ່າຍ (Chiang Mai Initiative Multilateralization – CMIM), ໂດຍສະເພາະການທົດລອງກູ້ CMIM (Test Run) ແລະ ການກູ້ເງິນເປັນສະກຸນເງິນທ້ອງຖິ່ນ. ພ້ອມນັ້ນ, ກໍໄດ້ຮັບຮອງແຜນວຽກງານປະຈໍາປີ ແລະ ງົບປະມານ ອົງການຕິດຕາມເສດຖະກິດມະຫາພາກອາຊຽນ+3 (ASEAN+3 Macro -economic Research Office: AMRO) ປະຈໍາປີ 2024; ມີການປະເມີນຜົນການຈັດຕັ້ງປະຕິບັດວຽກງານຂໍ້ລິເລີ່ມພັດທະນາຕະຫຼາດພັນທະບັດອາຊີໄລຍະກາງ 2019-2022 (Roadmap of Asian Bond Market Initiative) ແລະ ໄດ້ຮັບຮອງແຜນໄລຍະກາງໃໝ່ 2023-2026, ຊຶ່ງສືບຕໍ່ຊຸກຊູ້ ແລະ ສົ່ງເສີມການອອກພັນທະບັດທ້ອງຖິ່ນສຳລັບປະເທດສະມາຊິກອາ ຊຽນ+3 ແລະ ສະໜັບສະໜູນປະເທດສະມາຊິກໃນການພັດທະນາພື້ນຖານໂຄງລ່າງຕະຫລາດພັນທະບັດ. ແຜນຈັດຕັ້ງປະຕິບັດຂໍ້ລິເລີ່ມຂອງວຽກງານການສະໜອງທຶນສຳລັບການປະກັນໄພຄວາມສ່ຽງຈາກໄພພິບັດທາງທຳມະຊາດອາຊຽນ+3 (ASEAN+3 Disaster Risk Financing Initiative).

ຄຽງຄູ່ກັນນີ້, ກອງປະຊຸມດັ່ງກ່າວ, ຄະນະຜູ້ແທນກະຊວງການເງິນຍັງໄດ້ເຂົ້າຮ່ວມກອງປະຊຸມປິ່ນອ້ອມເປັນຕົ້ນ: ກອງປະຊຸມລັດຖະມົນຕີການເງິນ ແລະຜູ້ວ່າການທະນາຄານກາງແບບພິເສດຄົບຮອບ 50 ປີສາຍພົວພັນອາຊຽນ-ຍີ່ປຸ່ນ, ຊຶ່ງໄດ້ແລກປ່ຽນກ່ຽວກັບການສ້າງຄວາມເຂັ້ມແຂງການຮ່ວມມືດ້ານການເງິນລະຫວ່າງອາຊຽນຍີ່ປຸ່ນ,ການຮັດແໜ້ນການຮ່ວມມືດ້ານການເງິນ ແລະບົດສະເໜີກ່ຽວກັບຂົງເຂດການຮ່ວມມືໃໝ່ ຫຼືການສືບຕໍ່ການຮ່ວມືໃນອະນາຄົດເຊັ່ນ: ການເງິນດິຈິຕອນ, ຄວາມຍືນຍົງທາງດ້ານການເງິນ ແລະການຫັນຕາມຕ່ອງໂສ້ການສະໜອງ. ກອງປະຊຸມສອງຝ່າຍເພື່ອປຶກສາຫາລືແຜນການຮ່ວມມືລະຫວ່າງສອງປະເທດ ແລະການເສີມສ້າງການຮ່ວມມືດ້ານການເງິນໃນຂອບອາຊຽນໃນອະນາຄົດ.
ທີ່ມາ: ກະຊວງການເງິນ

แชร์