ອັດຕາເງິນເຟີ້ ໜຶ່ງສາເຫດທີ່ແຮງງານລາວລັ່ງໄຫຼໄປຕ່າງປະເທດ

ບັນຫາເງິນເຟີ້ຍັງເປັນສິ່ງທ້າທາຍຕໍ່ການພັດທະນາເສດຖະກິດ-ສັງຄົມ ໂດຍໃນໄລຍະ 3 ເດືອນຕົ້ນປີ 2023 ອັດຕາເງິນເຟີ້ສືບຕໍ່ເພີ່ມຂຶ້ນລື່ນປີຜ່ານມານອກຈາກກະທົບຕໍ່ການຈັບຈ່າຍລາຍວັນແລ້ວຍັງສົ່ງຜົນກະທົບດ້ານແຮງງານພາຍໃນປະເທດ.

ອີງໃສ່ຂໍ້ມູນຈາກສູນສະຖິຕິແຫ່ງຊາດສະແດງໃຫ້ເຫັນວ່າ: ອັດຕາເງິນເຟີ້ລວມຂອງລາວ ໃນເດືອນທັນວາ 2022 ຊຶ່ງເປັນຕົວເລກຄ່າສະເລ່ຍສູງສຸດຂອງປີຜ່ານມາຢູ່ທີ່ 39,3%; ມາໃນເດືອນມັງກອນ 2023 ອັດຕາເງິນເຟີ້ເພີ່ມຂຶ້ນເປັນ 40,3%, ຕໍ່ມາເດືອນກຸມພາ 41,3% ແລະເດືອນມີນາ ຢູ່ທີ່ 41,0% ນັ້ນໝາຍຄວາມວ່າໄລຍະ 3 ເດືອນຕົ້ນປີ 2023 ຄ່າສະເລ່ຍອັດຕາເງິນເຟີ້ແມ່ນເພີ່ມສູງຂຶ້ນກວ່າປີຜ່ານມາ.

ຕໍ່ກັບບັນຫາດັ່ງກ່າວ ຍ່ອມສົ່ງຜົນກະທົບຕໍ່ການດໍາລົງຊີວິດ ແລະເສດຖະກິດໂດຍລວມ. ໜຶ່ງໃນນັ້ນ, ກໍມີສ່ວນສົ່ງຜົນກະທົບຕໍ່ແຮງງານຊຶ່ງແຮງງານໄວໜຸ່ມຈໍານວນຫຼາຍພາກັນຫຼັ່ງໄຫຼໄປເຮັດວຽກຢູ່ຕ່າງປະເທດລວມທັງແຮງງານຄຸນນະພາບຈໍານວນໜຶ່ງ.

ບົດປະກອບຄໍາເຫັນຕໍ່ກອງປະຊຸມນັກທຸລະກິດລາວ ຄັ້ງທີ 14 ເມື່ອເດືອນມີນາ 2023 ຂອງທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດລາວ ໄດ້ກ່າວກ່ຽວກັບບັນຫາເງິນເຟີ້ບາງຕອນວ່າ: ສະພາບການຂາດເຂີນເງິນຕາ, ອັດຕາແລກປ່ຽນເງິນກີບທຽບກັບສະກຸນເງິນຕາຕ່າງປະເທດເປັນສິ່ງທ້າທາຍອັນໃຫຍ່ຫຼວງ; ການເພີ່ມຂຶ້ນຂອງອັດຕາເງິນເຟີ້ແມ່ນກະທົບເຖິງລາຄາສໍາເລັດຮູບຂອງການຜະລິດ ແລະບໍລິມາດຂົນສົ່ງຍ້ອນການເພີ່ມຂຶ້ນຂອງລາຄານໍ້າມັນ; ຜົນກະທົບອັນຕໍ່ມາແມ່ນການຂາດແຄນແຮງງານໃນອຸດສາຫະກໍາ ເພາະແຮງງານລາວໄປເຮັດວຽກຢູ່ຕ່າງປະເທດຍ້ອນມີລາຍຮັບດີກວ່າເຮັດໃຫ້ມີການຢຸດຕິການຜະລິດກະສິກໍາຢູ່ຫຼາຍແຫ່ງຍ້ອນບໍ່ມີແຮງງານ ແລະການອ່ອນຄ່າຂອງເງິນກີບທີ່ເຮັດໃຫ້ລາຄາສິນຄ້ານໍາເຂົ້າມີມູນຄ່າເພີ່ມຂຶ້ນ.

ທ່ານ ອຸເດດ ສຸວັນນະວົງ ຍັງກ່າວວ່າ: ສະພາບເງິນເຟີ້ ແລະການຂາດແຄນແຮງງານຍັງໄດ້ກະທົບເຖິງການຂະຫຍາຍການລົງທຶນໃນຂະແໜງອຸດສາຫະກໍາປຸງແຕ່ງແລະການບໍລິການ.

ໂອກາດນີ້ທ່ານນາງ ດາລຸນີ ພູມມະສັກ ໜຶ່ງໃນຜູ້ປະກອບການທີ່ມີຫຼາຍທຸລະກິດໃນລາວໄດ້ໃຫ້ທັດສະນະວ່າ: ໃນປັດຈຸບັນປະເທດລາວເຮົາໄດ້ຮັບຜົນກະທົບຈາກເສດຖະກິດຖົດຖອຍ,ອັດຕາເງິນເຟີ້ສູງຂຶ້ນເຮັດໃຫ້ແຮງງານທີ່ມີສີມືຈາກບາງປະເທດກັບຄືນສູ່ລໍາເນົາ ແລະແຮງງານລາວກໍພາກັນໄປຫາງານຢູ່ຕ່າງປະເທດຈໍານວນຫຼາຍ.

แชร์