ສະຖາບັນການເງິນ ຈຸລະພາກ ໄຊນິຍົມ ສະຫລຸບ ວຽກງານ ແລະ ວາງທິດທາງແຜນການປີ 2023

ກອງປະຊຸມ ສະຫລຸບວຽກງານຮອບດ້ານ ປະຈໍາປີ 2022 ແລະ ທິດທາງແຜນການ ປີ 2023 ຂອງສະຖາບັນການເງິນ ຈຸລະພາກ ທີ່ບໍ່ຮັບເງິນຝາກ ໄຊນິຍົມ ຈັດຂຶ້ນໃນວັນທີ 27 ເມສາ 2023 ທີ່ຫ້ອງປະຊຸມ ອົງການໄອຍະການປະຊາຊົນ ໂດຍການເປັນປະທານຮ່ວມຂອງ ທ່ານ ຄອນສະຫວັນ ດວງສຸກ ອຳນວຍການ ສະຖາບັນການເງິນ ຈຸລະພາກ ທີ່ບໍ່ຮັບເງິນຝາກ ໄຊນິຍົມ ແລະ ທ່ານ ຄຳຈັນ ລາວຈືເບັງ ຮອງຫົວຫນ້າພະແນກ ແຜນການ ແລະ ການລົງທຶນ ແຂວງອຸດົມໄຊ, ຄະນະສະພາບໍລິຫານ ສະຖາບັນການເງິນ ຈຸລະພາກ ທີ່ບໍ່ຮັບເງິນຝາກ ໄຊນິຍົມ, ມີຕາງຫນ້າຂະແຫນງການກ່ຽວຂ້ອງຂັ້ນແຂວງ, ຫົວຫນ່ວຍບໍລິການ ຈາກແຂວງບໍ່ແກ້ວ ແລະ ແຂວງຫລວງນ້ຳທາ, ບັນດາເມືອງ ຕະຫລອດຮອດ ພະນັກງານພາຍໃນສະຖາບັນ ເຂົ້າຮ່ວມ.

ກອງປະຊຸມໄດ້ສະຫລຸບ ຕີລາຄາຄືນ ຜົນການເຄື່ອນໄຫວຈັດຕັ້ງປະຕິບັດວຽກງານ ຮອບດ້ານ ຕະຫລອດໄລຍະ 1 ປີຜ່ານມາ ໂດຍຍົກໃຫ້ເຫັນ ດ້ານດີ-ຜົນງານ,ດ້ານອ່ອນ-ຂໍ້ຄົງຄ້າງ ແລະ ທິດທາງແຜນການ ປີ 2023. ເຊິ່ງໃນຕະຫລອດໄລຍະ 1 ປີ ຜ່ານມາສະຖາບັນການເງິນ ຈຸລະພາກ ທີ່ບໍ່ຮັບເງິນຝາກ ໄຊນິຍົມ ສາມາດຍາດໄດ້ຜົນສຳເລັດໃນຫລາຍດ້ານ ໂດຍສະເພາະ ສາມາດສະຫນອງການບໍລິການ ຈຳນວນ 294 ບ້ານ, ມີສະມາຊິກທັງຫມົດ 35.609 ທ່ານ,ສະມາຊິກເງິນກູ້ ຈຳນວນ 5.510 ບັນຊີ ທຽບໃສ່ແຜນ ປະຕິບັດໄດ້ 81,69%. ໃນນີ້ ຍອດເຫລືອ ເງິນຝາກລູກຄ້າທັງຫມົດ 3ຕື້ 8 ຮ້ອຍ 50 ກວ່າລ້ານກີບ, ຍອດເງິນກູ້ ກຳລັງເຄື່ອນໄຫວ ທັງຫມົດ 40 ຕື້ 9 ຮ້ອຍກວ່າລ້ານກີບ ທຽບໃສ່ແຜນການປີ ເທົ່າກັບ 102%, ມີສະ ມາຊິກຄ້າງຈ່າຍ ທີ່ເປັນຫນີ້ 31 ວັນ ຂຶ້ນໄປ ຈຳນວນ 628 ບັນຊີ, ຈຳນວນເງິນກູ້ທີ່ມີຄວາມສ່ຽງ 6 ຕື້ 1 ຮ້ອຍກວ່າລ້ານກີບ, ອັດຕາສ່ວນ ກຸ້ມຕົນເອງ ທາງດ້ານການເງິນ 200% ແລະ ມອບພັນທະອາກອນລາຍໄດ້ ປະຈໍາປີ 2022 ຈໍານວນ1 ຕື້ 6 ຮ້ອຍກວ່າລ້ານກີບ.

ໃນນີ້ ອາກອນເງິນເດືອນ 172 ລ້ານກວ່າກີບ ແລະ ອາກອນ ກຳໄລ 1 ຕື້5 ຮ້ອຍກວ່າກລ້ານກີບ, ດ້ານລາຍຮັບ ຈາກການດຳເນີນງານ ທັງຫມົດ 18 ຕື້ 5 ຮ້ອຍກວ່າລ້ານກີບທຽບໃສ່ແຜນ ປະຕິບັດໄດ້ 132%, ດ້ານລາຍຈ່າຍ ທັງຫມົດ 9 ຕື້ 2 ຮ້ອຍກວ່າລ້ານກີບ ທຽບໃສ່ແຜນການປີ ເທົ່າກັບ 74%. ນອກຈາກ ວຽກງານວິຊາສະເພາະວຽກງານດ້ານການເມືອງ-ແນວຄິດ,ລະບົບການຄຸ້ມຄອງ, ການຈັດຕັ້ງ, ວຽກງານຂະບວນການ,ປ້ອງກັນ ແລະ ອື່ນໆ ກໍໄດ້ມີການເຄື່ອນໄຫວ ແລະ ມີຜົນສຳເລັດຕາມລະດັບຄາດຫມາຍ.ກອງປະຊຸມຜູ້ເຂົ້່ຮ່ວມໄດ້ພ້ອມກັນມີຄຳເຫັນຕໍ່ກັບບົດສະຫລຸບ ແລະ ທິດທາງແຜນການ.

ຕໍ່ຜົນສໍາເລັດ ທີ່ຍາດມາໄດ້ມີ ພະນັກງານໄດ້ຮັບການຍ້ອງຍໍຈາກທ່ານເຈົ້າແຂວງປະເພດດີເດັ່ນ ຈຳນວນ 9 ທ່ານ,ຍິງ 3 ທ່ານ ແລະ ໄດ້ຮັບໃບຊົມເຊີຍ ຈຳນວນ 23ທ່ານ,ຍິງ 11 ທ່ານໃຫ້ກຽດມອບໂດຍທ່ານ ຄຳຈັນ ລາວຈືເບັງ ຮອງຫົວຫນ້າພະແນກ ແຜນການ ແລະ ການລົງທຶນ ແຂວງ, ຄະນະສະພາບໍລິການ ສະຖາບັນການເງິນ ຈຸລະພາກ ທີ່ບໍ່ຮັບເງິນຝາກ ໄຊນິຍົມ ແລະ ທ່ານ ຄອນສະຫວັນ ດວງສຸກ ອຳນວຍການ ສະຖາບັນການເງິນ ພັດປ່ຽນກັນມອບ.

แชร์