ການປະຕິບັດມາດຖານສາກົນ ດ້ານລາຍງານການເງິນມີສິ່ງທ້າທາຍຫຼາຍຢ່າງ

ສະຫະພັນນັກບັນຊີອາຊຽນ (AFA) ຮ່ວມກັບສະພາວິຊາຊີບນັກບັນຊີ ແລະນັກກວດສອບ (LCPAA) ຈັດກອງປະຊຸມວິຊາການແລກປ່ຽນຄໍາຄິດຄໍາເຫັນກ່ຽວກັບສິ່ງທ້າທ້າຍໃນການຈັດຕັ້ງປະຕິບັດມາດຖານສາກົນດ້ານການລາຍງານການເງິນ (IFRS) ປີ2023 ໂດຍສະເພາະບັນດາປະເທດອານຸພາກພື້ນລຸ່ມແມ່ນໍ້າຂອງ (CLMV ສປປ ລາວ, ກຳປູເຈຍ, ມຽນມາ, ສສ ຫວຽດ ນາມ) ໃນວັນທີ 28 ເມສາ 2023 ຜ່ານມາ, ທີ່ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມເປີດກອງປະຊຸມຂອງ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີປະທານສະຫະພັນນັກບັນຊີອາຊຽນ, ປະທານສະພາວິຊາຊີບນັກບັນຊີ ແລະນັກກວດສອບ ສປປ ລາວ, ຫົວໜ້າກົມຄຸ້ມຄອງການບັນຊີກະຊວງການເງິນ, ຕາງໜ້າທະນາຄານແຫ່ງ ສປປ ລາວ, ສະມາຊິກສະພາວິຊາຊີບນັກບັນຊີ ແລະນັກກວດສອບ, ພ້ອມດ້ວຍນັກຊ່ຽວຊານທີ່ມາຈາກກໍາປູເຈຍ, ລາວ, ມຽນມາ ແລະ ສສ ຫວຽດ ນາມເຂົ້າຮ່ວມ.

ກອງປະຊຸມໄດ້ຮ່ວມກັນແລກປ່ຽນບົດຮຽນຄໍາຄິດຄໍາເຫັນ, ຂໍ້ມູນຂ່າວສານ, ປະສົບການ ແລະເປັນເວທີສົນທະນາບັນຫາກ່ຽວກັບສິ່ງທ້າທ້າຍໃນການຈັດຕັ້ງປະຕິບັດມາດຖານສາກົນດ້ານການລາຍງານການເງິນ ປີ 2023 ຂອງບັນດາວິສາຫະກິດທີ່ຮັບໃຊ້ຜົນປະໂຫຍດສາທາລະນະໃນອາຊຽນ, ສິ່ງທ້າທາຍໃນການຈັດຕັ້ງປະຕິບັດ IFRS ສໍາລັບວິສາຫະກິດຂະໜາດນ້ອຍ ແລະ ຂະໜາດກາງ ຫລື SMEs ໃນອາຊຽນ. ພ້ອມກັນນີ້, ໄດ້ຍົກບາງບັນຫາມານໍາສະເໜີກ່ຽວພັນກັບພາກສ່ວນຄຸ້ມຄອງ ແລະ ຈັດຕັ້ງປະຕິບັດມາດຕະຖານການລາຍງານການເງິນຫລ້າສຸດຂອງບັນດາປະເທດລຸ່ມແມ່ນໍ້າຂອງເປັນຕົ້ນກ່ຽວກັບການປະເມີນໃນການຂ້າມຜ່ານສູ່ການຈັດຕັ້ງປະຕິບັດ IFRS ຢູ່ ສປປ ລາວ ກໍຄື ບົດຮຽນຂອງພາກພື້ນ ແລະສາກົນ.

ໂອກາດນີ້, ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນໄດ້ສະແດງຄວາມຊົມເຊີຍຕໍ່ຄວາມພະຍາຍາມຂອງການພັດທະນາວິຊາຊີບບັນຊີໃນອາຊຽນ ໃຫ້ມີຄຸນນະພາບທີ່ສູງຂຶ້ນ, ຖືເປັນການສະໜັບສະໜູນການພັດທະນາເສດຖະກິດ-ສັງຄົມອາຊຽນ. ປັດຈຸບັນ ສປປ ລາວ ມີສາຫະກິດທີ່ຮັບໃຊ້ຜົນປະ ໂຫຍດສາທາລະນະທັງໝົດ 77 ຫົວໜ່ວຍ. ໃນນັ້ນ, ປະກອບດ້ວຍບັນດາທະນາຄານທຸລະກິດ 44 ຫົວໜ່ວຍ, ບໍລິສັດທີ່ຈົດທະບຽນໃນຕະຫລາດຫລັກຊັບ 11 ຫົວໜ່ວຍ ແລະ ບໍລິສັດປະກັນໄພ 23 ຫົວໜ່ວຍ ແລະກອງປະຊຸມຄັ້ງນີ້ຫວັງວ່າສະມາຊິກສະພາວິຊາຊີບນັກບັນຊີ ແລະນັກກວດສອບລາວເປັນເຈົ້າການແລກປ່ຽນປະສົບການ ແລະ ບົດຮຽນຕົວຈິງເພື່ອເປັນທິດທາງໃນການຈັດຕັ້ງປະຕິບັດມາດຖານສາກົນດ້ານການລາຍງານການເງິນໃຫ້ມີປະສິດທິຜົນສູງສຸດ.
ຂ່າວ-ພາບ: ກະຊວງການເງິນ

แชร์