ພິທີອອກລາງວັນ ຝາກເງິນປຸບ ລຸ້ນປັບຮັບ TOYOTA REVO 2022

ໃນວັນທີ 27 ເມສາ 2023 ຢູ່ເຂດພັດທະນາຄົບວົງຈອນໜອງທາ ນະຄອນຫຼວງວຽງຈັນ ໄດ້ຈັດພິທີອອກລາງວັນ “ຝາກເງິນປຸບລຸ້ນປັບຮັບ TOYOTA REVO 2022” ຂຶ້ນໂດຍການເຂົ້າຮ່ວມເປັນສັກຂີພິຍານຂອງ ທ່ານ ສຸກສະຫວັດ ຈັນທະລາວົງ ຮອງຫົວໜ້າພະແນກການຂໍສ້າງຕັ້ງກົມຄຸ້ມຄອງທະນາຄານທຸລະກິດ ທະນາທານແຫ່ງ ສປປ ລາວ, ທ່ານ ສົມຊາຍ ຍົດສະຫວັນ ຮອງອຳນວຍການໃຫຍ່ທະນາຄານຮ່ວມທຸລະກິດ ລາວ-ຫວຽດ ຈຳກັດ (ທລວ), ທ່ານ ພູທອນ ແກ້ວດວງມະນີ ຫົວໜ້າພະແນກຍຸຕິທຳ ນະຄອນຫຼວງວຽງຈັນ, ມີບັນດາທ່ານຮອງຫົວໜ້າພະແນກກ່ຽວຂ້ອງຈາກນະຄອນຫຼວງວຽງຈັນ ແລະບັນດາສື່ມວນຊົນພ້ອມດ້ວຍລູກຄ້າເງິນຝາກເຂົ້າຮ່ວມ.

ທ່ານ ສົມຊາຍ ຍົດສະຫວັນ ໄດ້ກ່າວວ່າ: ໃນໄລຍະຜ່ານມາທະນາຄານຮ່ວມທຸລະກິດລາວ-ຫວຽດ ໄດ້ສຸມໃສ່ພັດທະນາຫຼາຍຜະລິດຕະພັນບໍລິການເພື່ອຕອບສະໜອງຄວາມຕ້ອງການຂອງ ລູກຄ້າທີ່ນັບມື້ສູງຂຶ້ນ ເຊັ່ນ: ເງິນຝາກປະຈຳຈ່າຍດອກເບ້ຍເປັນງວດ, ເງິນຝາກປະຈຳຈ່າຍດອກເບ້ຍລ່ວງໜ້າ, ເງິນຝາກສະສົມເພື່ອອະນາຄົດລູກຫຼານ, ເງິນຝາກສະສົມເພື່ອບຳນານ, ເງິນຝາກຊີງລາງວັນກໍຄືເງິນຝາກລຸ້ນຊັບຮັບໂຊກຂອງພວກເຮົາ. ນອກນັ້ນ, LaoVietBank ຍັງໄດ້ຮັບການຮ່ວມມື ຈາກບັນດາຄູ່ຮ່ວມທຸລະກິດ ແລະ ລູກຄ້າເປັນຢ່າງດີຕະຫຼອດມາຊຶ່ງກໍເປັນອີກໜຶ່ງທ່າແຮງທີ່ສໍາຄັນໃຫ້ແກ່ LaoVietBank ໃນການສືບຕໍ່ພັດທະນາຢ່າງບໍ່ຢຸດຢັ້ງ.
ປີນີ້, ທະນາຄານຮ່ວມທຸລະກິດ ລາວ-ຫວຽດ ຈໍາກັດ ໄດ້ຈັດຕັ້ງຜັນຂະຫຍາຍຜະລິດຕະພັນເງິນຝາກລາຍການຝາກປຸບ ລຸ້ນປັບຮັບ TOYOTA REVO 2022 ເພື່ອເປັນການສະເຫຼີມສະຫຼອງວັນສ້າງຕັ້ງ ທະນາຄານຮ່ວມທຸລະກິດລາວ-ຫວຽດ ຄົບຮອບ 23 ປີ ແລະທັງເປັນການສົມມະນາບຸນຄຸນລູກຄ້າຊຶ່ງໄດ້ສ້າງໂອກາດໃຫ້ແກ່ລູກຄ້າເງິນຝາກຂອງ ທລວ ມີໂອກາດຖືກລາງວັນຕ່າງໆບໍ່ວ່າຈະເປັນລົດໃຫຍ່, ລົດຈັກ, ໂທລະສັບໄອໂຟນ 14 pro ແລະລາງວັນອື່ນໆອີກຫຼາຍຢ່າງທີ່ສາມາດດຶງດູດພໍ່ແມ່ປະຊາຊົນ, ພໍ່ຄ້າຊາວຂາຍເຂົ້າຮ່ວມຝາກເງິນໃນລາຍການດັ່ງກ່າວນີ້ຢ່າງຫຼວງຫຼາຍເຮັດໃຫ້ຜະລິດຕະພັນນີ້ ກາຍເປັນຜະລິດຕະພັນເງິນຝາກທີ່ນິຍົມຊົມຊອບຂອງລູກຄ້າ ກໍຄືພໍ່ແມ່ປະຊາຊົນ. ລາຍການຝາກເງິນປຸບລຸ້ນປັບຮັບ TOYOTA REVO 2022 ໄດ້ເລີ່ມມາແຕ່ວັນທີ 22 ມິຖຸນາ 2022 ຈົນເຖິງວັນທີ 31 ມີນາ 2023, ສາມາດລະດົມທຶນຈາກລາຍການນີ້ໄດ້ຫຼາຍກວ່າ 1 ພັນຕື້ກີບ, ໂຕເລກຊີງລາງວັນຈໍາໜ່າຍອອກໄປເກືອບ 6 ໝື່ນໂຕເລກ, ຈໍານວນລູກຄ້າລວມທັງໝົດຫຼາຍກວ່າ 2.500 ຄົນ

ສໍາລັບການອອກລາງວັນຄັ້ງນີ້, ໄດ້ແບ່ງອອກເປັນ 5 ລາງວັນຄື: ລາງວັນທີ 1 ລົດ TOYOTA REVO ຜູ້ໂຊກດີໄດ້ແກ່ໝາຍເລກ LVB 45346, ລາງວັນທີ 2 ເປັນລົດຈັກເວັບ 100s ມີ 2 ລາງວັນ ຜູ້ໂຊກດີໄດ້ແກ່ໝາຍເລກ LVB 53599 ແລະ LVB 23146, ລາງວັນທີ 3 ໂທລະສັບໄອໂຟນ 14 pro ຈໍານວນ 3 ລາງວັນ ໄດ້ແກ່ໝາຍເລກ LVB 27899, LVB 08308, LVB 02446, ລາງວັນທີ 4 ຈັກຊັກຜ້າ ຈໍານວນ 5 ລາງວັນ ໄດ້ແກ່ໝາຍເລກ LVB 31466, LVB 47165, LVB 18408, LVB 28286, LVB 35132 ແລະ ລາງວັນທີ 5 ລົດຖີບໄຟຟ້າ ມີ 10 ລາງວັນ ໄດ້ແກ່ໝາຍເລກ LVB 55284, LVB 26743, LVB 19300, LVB 33209, LVB 04603, LVB 45968, LVB 32504, LVB 35967, LVB 07191, LVB 25088. ສ່ວນພິທີມອບ-ຮັບລາງວັນ ໃຫ້ແກ່ລູກຄ່າທີ່ໂຊກດີ ຈະຈັດຂຶ້ນໃນໂອກາດຕໍ່ໄປ.

แชร์