ບໍລິສັດ ຈີນທຽນສາກົນ ເອົາເຄື່ອງຊ່ວຍເຫຼືອເສີມທັກສະໃຫ້ເດັກນ້ອຍໃນລາວ ມູນຄ່າ 2,4 ຕື້ກີບ

ສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ) ໄດ້ຮັບເຄື່ອງຊ່ວຍເຫຼືອມີຄື: ເຄື່ອງຫຼິ້ນເສີມທັກສະສຳລັບເດັກນ້ອຍ, ອຸປະກອນການຮຽນຊຶ່ງມີມູນຄ່າທັງໝົດ 2 ຕື້ກວ່າກີບ ຈາກ ບໍລິສັດ ຈີນທຽນສາກົນ ຈຳກັດ ຜູ້ດຽວ (jintian international. Sole ltd) ປະຈຳລາວ ເພື່ອນໍາໄປມອບຕໍ່ໃຫ້ເດັກນ້ອຍໃນໂຮງຮຽນແຫ່ງຕ່າງໆ ທີ່ຢູ່ຫ່າງໄກສອກຫຼີກ ໃນທົ່ວປະເທດ. ຕາງໜ້າ ສຊປລ ກ່າວຮັບໂດຍທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານ ສຊປລ ແລະກ່າວມອບໂດຍ ທ່ານ ນາງ ລີ ລຽນລຽນ (Li LianLian) ປະທານບໍລິສັດ ຈີນທຽນສາກົນ ຈຳກັດຜູ້ດຽວ ປະຈຳລາວ, ມີຫົວໜ້າພະແນກ-ຮອງພະແນກ ແລະພາກສ່ວນກ່ຽວຂ້ອງເຂົ້າຮ່ວມ. ພິທີມອບ-ຮັບ ເຄື່ອງດັ່ງກ່າວ, ໄດ້ຈັດຂຶ້ນໃນວັນທີ 1 ພຶດສະພາຜ່ານມາ ທີ່ ສຊປລ.

ທ່ານ ມອນໄຊ ລາວມົວຊົ່ງ ໄດ້ກ່າວສະແດງຄວາມຂອບໃຈນຳ ທ່ານ ນາງ ລີ ລຽນລຽນກໍຄື ບໍລິສັດ ທີ່ນຳເຄື່ອງດັ່ງກ່າວ ທີ່ມາຊ່ວຍເຫຼືອໃນຄັ້ງນີ້ ແລະໃຫ້ຄໍາໝັ້ນສັນຍາວ່າຈະນໍາເອົາເຄື່ອງດັ່ງກ່າວໄປແຈກຢາຍໃຫ້ເດັກນ້ອຍໃນໂຮງຮຽນແຫ່ງຕ່າງໆໃນ ສປປ ລາວ ຢ່າງທົ່ວເຖິງ ແລະຂໍອວຍພອນໄຊໃຫ້ບໍລິສັດຈົ່ງມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ.
ທີ່ມາ: ຂ່າວ-ພາບ: ວັນເພັງ

• 02/05/2023