ແຕ່ງຕັ້ງທ່ານ ນາງ ໝອນຄຳ ສຸກສິງຫາ ເປັນປະທານສະມາຄົມທຸລະກິດບໍລິການທ່ອງທ່ຽວແຂວງອຸດົມໄຊຄົນໃໝ່

ພິທີມອບ-ຮັບໜ້າທີ່ສະມາຄົມທຸລະກິດບໍລິການທ່ອງທ່ຽວ ແຂວງອຸດົມໄຊ ລະຫວ່າງ ຜູ້ເກົ່າ ແລະຜູ້ໃໝ່ ຈັດຂຶ້ນໃນວັນທີ 27 ເມສານີ້ ທີ່ຫ້ອງປະຊຸມພະແນກ ຖວທ ແຂວງ ໂດຍການເຂົ້າຮ່ວມເປັນກຽດຂອງ ທ່ານ ເພັງ ສຸດາວອນ ຮອງຫົວໜ້າພະແນກ ຖວທ ແຂວງອຸດົມໄຊ,ມີຫົວໜ້າຂະແໜງທ່ອງທ່ຽວ,ຄະນະສະມາຄົມທຸລະກິດບໍລິການທ່ອງທ່ຽວພ້ອມດ້ວຍພະນັກງານວິຊາການພາຍໃນຂະແໜງທ່ອງທ່ຽວເຂົ້າຮ່ວມ.

ອີງຕາມຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຄະນະທີ່ປຶກສາ ແລະຄະນະສະມາຄົມທຸລະກິດບໍລິການສະໄໝທີ 4 ແລະຜ່ານບົດບັນທຶກ ມອບ-ຮັບ ໜ້າທີ່ຄວາມຮັບຜິດຊອບ ລະຫວ່າງ ຄະນະສະມາຄົມ ຊຸດເກົ່າ ແລະ ຊຸດໃໝ່ພ້ອມທັງໄດ້ຜ່ານຮ່າງລະບຽບກົດລະບຽບຂອງສະມາຄົມ. ຈາກນັ້ນ ໄດ້ມີການເຊັນບົດບັນທຶກ ມອບ-ຮັບ ໜ້າທີ່ລະຫວ່າງ ທ່ານ ທອງສຸກ ບຸນນະລາດ ຮອງປະທານສະມາຄົມຊຸດເກົ່າ ແລະທ່ານນາງ ໝອນຄຳ ສຸກສິງຫາ ປະທານສະມາຄົມ ຊຸດໃໝ່.

ຄະນະສະມາຄົມຊຸດໃໝ່ ປະກອບມີ 8 ທ່ານ ຄື: ທ່ານ ນາງ ໝອນຄຳ ສຸກສິງຫາ ເປັນປະທານ ຊີ້ນຳລວມ ແລະການບໍລິຫານສະມາຄົມ, ທ່ານ ສຸຂີ ສີວັນໄຊ ເປັນຮອງ ຮັບຜິດຊອບກຸ່ມຮ້ານບັນເທີງ ແລະ ຄາຣະໂອເກະ, ທ່ານ ຄຳປະສົງ ສີຣິປັນຍາ ເປັນຮອງ ຮັບຜິດຊອບກຸ່ມບໍລິສັດທ່ອງທ່ຽວ ແລະ ແຫຼ່ງທ່ອງທ່ຽວ,ທ່ານ ນາງ ສະຖາພອນ ລາດສະວົງ ເປັນຄະນະຮັບຜິດຊອບກຸ່ມໂຮງແຮມ ແລະລີສອດ, ທ່ານ ບຸນເພັງ ລາວເມົາ ເປັນຄະນະ ຮັບຜິດຊອບກຸ່ມເຮືອນພັກ,ທ່ານ ສຸລິວົງ ກົ່ງ ເປັນຄະນະ ຮັບຜິດຊອບກຸ່ມຮ້ານອາຫານ,ທ່ານ ເພັດນິນ ໂດຍນຸບຸນ ເປັນຄະນະຮັບຜິດຊອບກຸ່ມຫ້ອງເຊົ່າ, ເຮືອນເຊົ່າ,ຄອນໂດ,ທ່ານ ນາງ ເພັດລາວັນ ເປັນຄະນະ ຮັບຜິດຊອບກຸ່ມຮ້ານບໍລິການນວດ ແລະ ສະປາ ແລະ ທ່ານ ອຸດອນ ສໍດາລາ ເປັນຄະນະຮັບຜິດຊອບກຸ່ມລົດບໍລິການທ່ອງທ່ຽວ.

ກອງປະຊຸມຍັງໄດ້ປຶກສາຫາລືປະກອບຄຳຄິດຄຳເຫັນຕໍ່ການເຄື່ອນໄຫວຂອງສະມາຄົມໄລຍະຜ່ານມາເພື່ອແນໃສ່ປັບປຸງດ້ານອ່ອນຂໍ້ຄົງຄ້າງໃຫ້ດີຂຶ້ນກວ່າເກົ່າພ້ອມທັງປັບປຸງຮ່າງລະບຽບໃຫ້ສົມບູນ ແລະສາມາດນຳໃຊ້ໄດ້.

ໂອກາດດັ່ງກ່າວ ທ່ານ ເພັງ ສຸດາວອນ ຮອງຫົວໜ້າພະແນກ ຖວທ ໄດ້ໂອ້ລົມຊີ້ທິດແກ່ຄະນະສະມາຄົມຊຸດໃໝ່ໂດຍເນັ້ນໃຫ້ສືບຕໍ່ປັບປຸງການຈັດຕັ້ງຂອງສະມາຄົມໃຫ້ມີຄວາມເຂັ້ມແຂງ, ນຳພາສະມາຊິກເຄື່ອນໄຫວໃຫ້ໄດ້ຮັບຜົນສຳເລັດ ສິ່ງສຳຄັນແມ່ນການເຕົ້າໂຮມຄວາມສາມັກຄີພາຍໃນສະມາຄົມກໍຄືສະມາຊິກໃຫ້ມີຄວາມໜັກແໜ້ນ ແນໃສ່ເຮັດໃຫ້ບັນດາທຸລະກິດບໍລິການທ່ອງທ່ຽວພາຍໃນແຂວງອຸດົມໄຊນັບມື້ໄດ້ຮັບການພັດທະນາທາງດ້ານປະລິມານ ແລະຄຸນນະພາບເພື່ອດຶງດູດນັກທ່ອງທ່ຽວເຂົ້າມາທ່ຽວແຂວງອຸດົມໄຊໃຫ້ນັບມື້ຫຼາຍຂຶ້ນ.

แชร์