ລາວ-ຈີນຮ່ວມມືກັນສ້າງຫຼັກສູດຄູພາສາຈີນ 2+2

ວັນທີ 26 ເມສາ ທີ່ຜ່ານມາ ສູນຮ່ວມມືພາສາຕ່າງປະເທດກະຊວງສຶກສາທິການແຫ່ງ ສປ ຈີນ ແລະ ມະຫາວິທະຍາໄລຊົນເຜົ່າກວາງຊີ ສປ ຈີນ ຮ່ວມກັບມະຫາວິທະຍາໄລແຫ່ງຊາດລາວ (ມຊ) ໄດ້ຈັດພິທີເຊັນສັນຍາຮ່ວມສ້າງຫຼັກສູດຄູພາສາຈີນລະບົບ 2+2 ຢູ່ທີ່ສະຖາບັນຂົງຈື້ ມຊ, ໂດຍຝ່າຍຈີນເປັນຜູ້ສະໜອງທຶນການສຶກສາ 60 ທຶນໃຫ້ແກ່ນັກສຶກສາລາວ, ຕາງໜ້າຝ່າຍລາວລົງນາມໂດຍທ່ານ ອຸດົມ ພອນຄໍາເພັງ ອະທິການບໍດີ ມຊ, ຝ່າຍຈີນແມ່ນທ່ານ ມາຈ້ຽນເຟີ່ຍ ອຳນວຍການໃຫຍ່ສູນຮ່ວມມືແລກປ່ຽນພາສາຈີນ-ພາສາຕ່າງປະເທດ ແລະທ່ານ ເຊ້ຍຊ້າງກົວ ອະທິການບໍດີ ມະຫາວິທະຍາຊົນເຜົ່າກວງຊີ. ຝ່າຍລາວເຂົ້າຮ່ວມເປັນສັກຂີພິຍານໂດຍທ່ານ ພຸດ ສິມມະລາວົງ ລັດຖະມົນຕີກະຊວງສຶກສາທິການ ແລະກິລາ ແລະຝ່າຍຈີນແມ່ນທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປຈີນ ປະຈໍາ ສປປ ລາວ ພ້ອມດ້ວຍສາມພາກສ່ວນທີ່ກ່ຽວຂ້ອງ.

ອີງຕາມຂໍ້ມູນໃຫ້ຮູ້ວ່າ: ການເຊັນສັນຍາຮ່ວມມືຂອງ 3 ພາກສ່ວນ ແມ່ນແນໃສ່ການພັດທະນາທາງດ້ານພາສາ ແລະວັດທະນະທໍາຈີນ ເຊິ່ງສູນຮ່ວມມືພາສາຕ່າງປະເທດຂອງຈີນ ແລະມະຫາວິທະຍາໄລຊົນເຜົ່າກວາງຊີໄດ້ໃຫ້ທຶນການສຶກສາ 60 ທຶນ ລວມມູນຄ່າ 2,3 ລ້ານກວ່າຢວນ, ເຊິ່ງມີລະບົບຮຽນຢູ່ ມຊ 2 ປີ ຫຼັງຈາກນັ້ນຮຽນຢູ່ ສປ ຈີນອີກ 2 ປີ.

ທ່ານ ພຸດ ສິມມະລາວົງ ຕາງໜ້າໃຫ້ກະຊວງສຶກສາທິການ ແລະກິລາແຫ່ງ ສປປ ລາວ ສະແດງຄວາມຂອບໃຈເປັນຢ່າງສູງຕໍ່ສູນແລກປ່ຽນຮ່ວມມື, ມະຫາວິທະຍາໄລຊົນເຜົ່າກວາງຊີ ແລະສຶກສາແຂວງກວາງຊີທີ່ຍາມໃດກໍໃຫ້ການຊ່ວຍເຫຼືອສປປລາວຕະຫຼອດມາ.ການເຊັນສັນຍາຄັ້ງນີ້ຍັງແມ່ນເນື່ອງໃນໂອກາດວັນສ້າງຕັ້ງສາຍພົວພັນທາງການທູດລາວ-ຈີນຄົບຮອບ 62 ປີ ຕື່ມອີກ (25/04/1961-25/04/2023)ອັນໄດ້ກາຍເປັນເຫດການທີ່ມີຄວາມໝາຍຄວາມສໍາຄັນຫຼາຍ, ສປປລາວ ຍາມໃດກໍຍຶດໝັ້ນໃນຫຼັກການຈີນດຽວ, ຢືນຄຽງບ່າຄຽງໄຫຼ່ນໍາສະຫາຍຈີນຕາມທິດ 4 ດີ ແລະຄູຮ່ວມຊະຕາກໍາດຽວກັນຕະຫຼອດມາ.

ທ່ານ ອຸດົມ ພອນຄໍາເພັງ ກໍ່ໄດ້ສະແດງຄວາມຮູ້ບຸນຄຸນ ແລະກ່າວວ່າ: ການຮ່ວມມືຄັ້ງນີ້ເປັນການປູພື້ນຖານໃຫ້ແກ່ການສຶກສາດ້ານພາສາຈີນ, ສ້າງຄວາມເຂັ້ມແຂງດ້ານບຸກຄະລາກອນພາສາຈີນ ເຊິ່ງຈະເປັນສິ່ງໜຶ່ງທີ່ສາມາດຮັບປະກັນຄຸນນະພາບການຮຽນ, ການສອນພາສາຈີນໃຫ້ແກ່ນັກສຶກສາລາວໃຫ້ມີຄຸນນະພາບສູງຂື້ນ.
ໃນໂອກາດດຽວກັນທ່ານ ມາຈ້ຽນເຟີ່ຍ ອຳນວຍການໃຫຍ່ສູນຮ່ວມມືແລກປ່ຽນພາສາຈີນ-ພາສາຕ່າງປະເທດ ຝ່າຍຈີນກໍ່ໄດ້ສະແດງຄວາມຊົມເຊີຍ ແລະດີໃຈທີ່ໄດ້ເຫັນຝ່າຍລາວແຕ່ລະຂັ້ນໄດ້ເອົາໃຈໃສ່ສະໜັບສະໜູນເຮັດໃຫ້ຫຼັກສູດຄູພາສາຈີນ ແລະຫຼັກສູດພາສາຈີນໄດ້ຮັບການພັດທະນາຢ່າງວ່ອງໄວເຊິ່ງເປັນການສ້າງສາຍພົວພັນການທູດມິດຕະພາບຂອງຄົນຮຸ້ນຕໍ່ໆໄປຕື່ມອີກ. ທ່ານກ່າວວ່າ:ສູນແລກປ່ຽນຮ່ວມມືພາສາຈີນ-ພາສາຕ່າງປະເທດແມ່ນສະຖາບັນໜຶ່ງໃນການສະໜອງການຮຽນພາສາຈີນໃຫ້ແກ່ປະຊາຄົມໂລກ, ເພື່ອເຂົ້າໃຈຈີນພວກເຮົາພະຍາຍາມຍົກລະດັບການໃຫ້ບໍລິການທີ່ດີ, ພະຍາຍາມໃຫ້ການຮ່ວມມືໃຫ້ແກ່ຕ່າງປະເທດໃນການພັດທະນາການສຶກສາພາສາຈີນ. ໃນອະນາຄົດພວກເຮົາຈະຮ່ວມກັບສຶກສາແຂວງກວາງຊີ ແລະມະຫາວິທະຍາໄລຊົນເຜົ່າກວາງຊີສືບຕໍ່ຊຸກຍູ້ສົ່ງເສີມ ແລະຊ່ວຍເຫຼືອການພັດທະນາການສຶກສາພາສາຈີນຢູ່ ສປປ.ລາວ ເພື່ອສ້າງຜົນງານປະກອບສ່ວນເສີມສ້າງສາຍສໍາພັນມິດຕະພາບລະຫວ່າງສອງຊາດລາວ-ຈີນໃຫ້ດີຂື້ນໄປເລື້ອຍໆ.

แชร์