ປະທານ ສນຊ ເຂົ້າຢ້ຽມຢາມພົບປະນາຍົກລັດຖະມົນຕີ ສສ ຫວຽດນາມ ເພື່ອເພີ່ມທະວີການຮ່ວມມືຫຼາຍດ້ານ

ເມື່ອວັນທີ 26 ເມສາ ທີ່ຜ່ານມາ ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ເຂົ້າຢ້ຽມຢາມພົບປະ ສະຫາຍ ຟ້າມ ມິງ ຈິງ ກຳມະການກົມການເມືອງສູນກາງພັກ ນາຍົກລັດຖະມົນຕີ ສສ ຫວຽດນາມ ທີ່ສຳນັກງານນາຍົກລັດຖະມົນຕີ.

ການເຂົ້າຢ້ຽມຢາມພົບປະຄັ້ງນີ້, ການນຳຂັ້ນສູງຂອງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ-ສອງລັດ ກໍຄືສອງຊາດ ລາວ-ຫວຽດນາມ ໃນການເພີ່ມພູນຄູນສ້າງ ສາຍພົວພັນອັນເປັນມູນເຊື້ອຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງລັດຖະບານໂດຍສະເພາະແມ່ນໃນຕົ້ນປີນີ້, ສະຫາຍນາຍົກລັດຖະມົນຕີ ສສ ຫວຽດນາມ ໄດ້ເດີນທາງຢ້ຽມຢາມ ເຮັດວຽກຢູ່ ສປປ ລາວ ເຖິງ 2 ຄັ້ງ, ພ້ອມນີ້ ປະທານ ສນຊ ໄດ້ລາຍງານໃນການພົບປະປຶກສາ ກັບ ຄະນະປະຈໍາສູນກາງແນວໂຮມປະເທດຊາດຫວຽດນາມ ເຫັນວ່າມີ ບັນຍາກາດດີຫຼາຍ, ສອງຝ່າຍໄດ້ປະຕິບັດທິດຊີ້ນໍາຂອງ 2 ກົມການເມືອງ ແລະລັດຖະບານ. ສຳລັບການຈັດຕັ້ງປະຕິບັດບົດບັນທຶກຮ່ວມມືທີ່ສອງຝ່າຍໄດ້ເຊັນກັນໃນເດືອນກໍລະກົດ 2022 ນັ້ນ ໄດ້ສໍາເລັດ 4 ໃນ 10 ຂໍ້ທີ່ຕ້ອງເຮັດຮ່ວມກັນ ແລະໄດ້ພ້ອມກັນສຸມໃສ່ການປະຕິບັດອີກ 3 ຂໍ້ ພາຍໃນປີ 2023 ນີ້. ໃນການພົບປະສອງຝ່າຍໄດ້ປຶກສາຫາລື ແລກປ່ຽນບົດຮຽນຊຶ່ງມີບັນດາຫົວຂໍ້ທີ່ສອງຝ່າຍມີຄວາມສົນໃຈ ແລະ ພ້ອມກັນຈັດຕັ້ງປະຕິບັດເພີ່ມຕື່ມຈຳນວນໜຶ່ງ.

ໂອກາດນີ້, ປະທານສູນກາງແນວລາວສ້າງຊາດໄດ້ສະແດງຄວາມຂອບໃຈຕໍ່ຄຳເຫັນອັນຈົບງາມຂອງສະຫາຍນາຍົກລັດຖະມົນຕີທີ່ມີເນື້ອໃນຊີ້ນຳສຳຄັນຫຼາຍປະການຕໍ່ການຮ່ວມມືຂອງສອງອົງການແນວໂຮມ ແລະບັນດາອົງການຄູ່ສັນຍາຮ່ວມມືໃນສະເພາະໜ້າ ແລະຍາວນານ, ຂໍສະແດງຄວາມຂອບໃຈຕໍ່ການສະໜັບສະໜູນແກ່ການຮ່ວມມືຂອງສອງຝ່າຍພວກເຮົາ ແລະຈະຮັບເອົາຄຳເຫັນຂອງສະຫາຍໄປຈັດຕັ້ງປະຕິບັດໃຫ້ເກີດດອກອອກຜົນ;

ໃນວັນດຽວກັນນີ້, ຄະນະຜູ້ແທນຂັ້ນສູງ ສນຊ ແລະຄະນະຂົນຂວາຍປະຊາຊົນສູນກາງພັກກອມມູນິດ ຫວຽດນາມ ໄດ້ສືບຕໍ່ການຮ່ວມມືສອງຝ່າຍ ຢູ່ທີ່ສໍານັກງານຫ້ອງວ່າການສູນກາງພັກ ສສ ຫວຽດນາມ. ຄະນະຜູ້ແທນຂັ້ນສູງຂອງສູນກາງແນວລາວສ້າງຊາດນຳໂດຍສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດພ້ອມດ້ວຍຄະນະໄດ້ພົບປະ ແລະແລກປ່ຽນບົດຮຽນ ກັບ ຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມນຳໂດຍສະຫາຍ ນາງ ບຸ່ຍ ທິ ມິງ ຮວ່າຍ ເລຂາທິການສູນກາງພັກ ຫົວໜ້າຄະນະຂົນຂວາຍ ປະຊາຊົນສູນກາງພັກກອມມູນິດຫວຽດນາມພ້ອມດ້ວຍຄະນະໃນວັນທີ 26 ເມສາຜ່ານມາຢູ່ທີ່ສໍານັກງານຫ້ອງວ່າການສູນກາງພັກ ສສ ຫວຽດນາມ.

ການພົບປະຄັ້ງນີ້, ທັງສອງຝ່າຍໄດ້ພ້ອມກັນທົບທວນຄືນບັນດາເນື້ອໃນບົດບັນທຶກການຮ່ວມມືທີ່ໄດ້ລົງນາມຮ່ວມກັນວັນທີ 29 ມິຖຸນາ 2021 ຊຶ່ງມີເນື້ອໃນ 5 ຂໍ້ທີ່ຈະຕ້ອງປະຕິບັດໃນໄລຍະປີ 2021-2025. ສຳລັບແຜນວຽກຈຸດສຸມຂອງການຮ່ວມມືຂອງສອງອົງການໃນປີ 2023 ແມ່ນຖືເອົາບົດບັນທຶກຮ່ວມມືເປັນບ່ອນອີງ ແລະ ເພີ່ມຕື່ມ 3 ຫົວຂໍ້ ທີ່ສອງຝ່າຍໄດ້ປຶກສາຫາລືຮ່ວມກັນເພື່ອພ້ອມກັນຈັດຕັ້ງປະຕິບັດໃຫ້ມີຜົນສຳເລັດ.
ຂ່າວ-ພາບ: ຈິດຕະພົງ ໂພທິລັກ

แชร์