ປີ 2022 ມີນັກໂທດໄດ້ຮັບການໃຫ້ອະໄພຍະໂທດ 1.881 ຄົນ ຕ່າງປະເທດ 23 ຄົນ

ໃນວັນທີ 26 ເມສາ 2023 ທີ່ອົງການໄອຍະການປະຊາຊົນສູງສຸດໄດ້ຈັດກອງປະຊຸມສະຫຼຸບວຽກງານອະໄພຍະໂທດ ປະຈຳປີ 2022 ແລະທິດທາງແຜນການປະຈຳປີ 2023 ຂຶ້ນຢ່າງເປັນທາງການໃນຮູບແບບເຊິ່ງໜ້າ ແລະທາງໄກໂດຍໃຫ້ກຽດເປັນປະທານຂອງ ທ່ານ ພົນເອກ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບປະທານຄະນະກໍາມະການອະໄພຍະໂທດລະດັບຊາດມີ ທ່ານ ໄຊຊະນະ ໂຄດພູທອນ ກຳມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດຮອງປະທານຄະນະກໍາມະການອະໄພຍະໂທດ ລະດັບຊາດ (ຜູ້ປະຈໍາການ) ພ້ອມດ້ວຍບັນດາຄະນະກໍາມະການອະໄພຍະໂທດ ລະດັບຊາດ ທີ່ມາຈາກຫ້ອງວ່າການສໍານັກງານປະທານປະເທດ ຫ້ອງວ່າການສໍານັກງານນາຍົກລັດຖະມົນຕີ ກະຊວງປ້ອງກັນຄວາມສະຫງົບ ກະຊວງປ້ອງກັນປະເທດ ກະຊວງຍຸຕິທໍາ ກະຊວງການຕ່າງປະເທດ ສານປະຊາຊົນສູງສຸດສູນກາງແນວລາວສ້າງຊາດ ຮອງເຈົ້າແຂວງ-ນະຄອນຫຼວງ ຜູ້ຊີ້ນຳວຽກງານອະໄພຍະໂທດ ຂັ້ນແຂວງ-ນະຄອນຫຼວງ ພ້ອມດ້ວຍກອງເລຂາຂັ້ນສູນກາງ ແລະທ້ອງຖິ່ນເຂົ້າຮ່ວມ.

ທ່ານ ໄຊຊະນະ ໂຄດພູທອນ ໄດ້ຜ່ານບົດສະຫຼຸບລາຍງານວຽກງານອະໄພຍະໂທດ ປະຈໍາປີ 2022 ແລະ ທິດທາງວຽກງານຈຸດສຸມ ປະຈຳປີ 2023 ໂດຍໄດ້ຍົກໃຫ້ເຫັນດ້ານດີ ຜົນສໍາເລັດ ແລະ ດ້ານອ່ອນ ແລະ ຂໍ້ຄົງຄ້າງ ທີ່ຄະນະກໍາມະການອະໄພຍະໂທດແຕ່ລະຂັ້ນ ໄດ້ເອົາໃຈໃສ່ຈັດຕັ້ງປະຕິບັດວຽກງານອະໄພຍະໂທດ ໃຫ້ມີຜົນສໍາເລັດ ຮັບປະກັນໄດ້ຄວາມຖືກຕ້ອງ ສອດຄ່ອງຕາມລັດຖະບັນຍັດຂອງປະທານປະເທດ ວ່າດ້ວຍການໃຫ້ອະໄພຍະໂທດ ສະແດງອອກ ຄື ນັກໂທດທີ່ໄດ້ຮັບການໃຫ້ອະໄພຍະໂທດ ຕາມລັດຖະດຳລັດຂອງປະທານປະເທດ ປະຈໍາປີ 2022 ມີຈຳນວນທັງໝົດ 1.881 ຄົນ ຍິງ 264 ຄົນ ຕ່າງປະເທດ 23 ຄົນ ຍິງ 6 ຄົນ ພ້ອມນັ້ນ ຄະນະກໍາມະການອະໄພຍະໂທດແຕ່ລະຂັ້ນຍັງໄດ້ຊຸກຍູ້ໃຫ້ກັບພະແນກຍຸຕິທຳໃນຂອບເຂດທົ່ວປະເທດໃນການເກັບຄ່າປັບໃໝ ແລະ ຄ່າເສຍຫາຍທາງແພ່ງທີ່ນັກໂທດຊຳລະໃນບັ້ນຄົ້ນຄວ້າສະເໜີໃຫ້ອະໄພຍະໂທດ ປະຈຳປີ 2022 ມີ ຄ່າເສຍຫາຍທາງແພ່ງ 472.673.333 ກີບ ເງິນຕາຕ່າງປະເທດ 6.000 ບາດ 2.500 ໂດລາ ຄ່າປັບໃໝທາງອາຍາ 3.283.469.500 ກີບ ຍົກໃຫ້ເຫັນດ້ານອ່ອນຄົງຄ້າງຈໍານວນໜຶ່ງທີ່ຈະຕ້ອງໄດ້ສືບຕໍ່ແກ້ໄຂໃຫ້ຕົກໄປ ໃນປີ 2023 ນີ້.

ໃນໂອກາດດັ່ງກ່າວ ທ່ານ ພົນເອກ ວິໄລ ຫຼ້າຄໍາຟອງ ໃນນາມປະທານກອງປະຊຸມຍັງໄດ້ມີຄໍາເຫັນໂອ້ລົ້ມຕໍ່ກອງປະຊຸມໂດຍທ່ານໄດ້ເນັ້ນໜັກໃຫ້ຄະນະກຳມະການອະໄພຍະໂທດແຕ່ລະຂັ້ນ ຕ້ອງໄດ້ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ວຽກງານຂອງຕົນໃຫ້ທັນຕາມກໍານົດເວລາເຫັນໄດ້ເຖິງຄວາມສໍາຄັນຂອງການປະຕິບັດນະໂຍບາຍອະໄພຍະໂທດໃຫ້ແກ່ນັກໂທດເອົາໃຈໃສ່ຄົ້ນຄວ້າກໍາແໜ້ນເນື້ອໃນຂອງກົດໝາຍລັດຖະບັນຍັດວ່າດ້ວຍການໃຫ້ອະໄພຍະໂທດ ແລະນິຕິກໍາຕ່າງໆທີ່ກ່ຽວຂ້ອງ ກັບວຽກງານອະໄພຍະໂທດໃຫ້ເລິກເຊິ່ງຈັດຕັ້ງປະຕິບັດໃຫ້ຖືກຕ້ອງ ແລະຄົບຖ້ວນຍົກສູງຄວາມຮັບຜິດຊອບໃນການຄົ້ນຄວ້າພິຈາລະນານັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດຮັບປະກັນຄວາມຖືກຕ້ອງໂປ່ງໃສຍຸຕິທໍາ.

แชร์