ເເລ່ນທວນໄຟສະຫຼັບສະໜູນງານມະຫາກໍາກິລາຊີເກມຄັ້ງທີ 32 ເເລະອາຊຽນພາລາເກມຄັ້ງທີ 12

ພິທີເເລ່ນທວນໄຟສະໜຫບສະໜູນງານມະຫາກໍາກິລາຊີເກມຄັ້ງທີ 32 ເເລະອາຊຽນພາລາເກມຄັ້ງທີ 12 ທີ່ຣາຊາອານາຈັກກໍາປູເຈຍຮັບກຽດເປັນເຈົ້າພາບ ລະຫວ່າງວັນທີ 5-17 ພຶດສະພາ 2023, ໂດຍພິທີແລ່ນທວນໄຟໄດ້ຈັດຂື້ນໃນຕອນເຊົ້າວັນທີ 25 ເມສາ 2023 ຢູ່ສະຖານເອກອັກຄະຣາຊາທູດ ຣາຊະອານາຈັກກໍາປູເຈຍ ປະຈໍາລາວ, ນະຄອນຫຼວງວຽງຈັນ.

ຊຶ່ງມີທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ຮອງປະທານຄະນະກໍາມະການໂອເເລມປິກເເຫ່ງຊາດລາວ, ທ່ານ ນາງ ຂັນທະລີ ສີລິພົງພັນ ຮອງລັດຖະມົນຕີກະຊວງສຶກສາທິການ ເເລະກິລາ ຮອງປະທານຄະນະກໍາມະການໂອເເລມປິກທັງເປັນປະທານຄະນະກໍາມະການກິລາຄົນພິການເເຫ່ງຊາດລາວ, ທ່ານ ຮໍຊາຣູນ ລັດຖະມົນຕີກະຊວງທ່ອງທ່ຽວ ທັງເປັນທູດພິເສດງານມະຫາກໍາກິລາຊີເກມຄັ້ງທີ 32 ຂອງກໍາປູເຈຍ, ມີເອກອັກຄະຣາຊາທູດເເຫ່ງຣາຊາອາຈັກ ກໍາປູເຈຍປະຈໍາລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍ.

ໃນພິທີມີບັນດາຄະນະປະທານໄດ້ຜັດປ່ຽນກັນມີຄໍາເຫັນກ່ຽວກັບຄວາມຫມາຍຄວາມສໍາຄັນລວມເຖີງຈຸດປະສົງຂອງການຂອງການຈັດພິທີຄັ້ງນີ້ໃນນີ້ສະເພາະທ່ານນາງຂັນທະລີ ສີລິພົງພັນ ຮອງລັດຖະມົນຕີກະຊວງ ສຶກສາທິການ ເເລະກິລາ ຮອງປະທານຄະນະກໍາມະການໂອເເລມປິກທັງເປັນປະທານຄະນະກໍາມະການກິລາຄົນພິການເເຫ່ງຊາດລາວມີຄໍາເຫັນວ່າ:"ການຈັດພິທີເເລ່ນທວນໄຟຄັ້ງນີ້ຖືເປັນການສະຫນັບສະຫນູນຢ່າງເເຂງເເຮງຈາກລັດຖະບານລາວ ໃນການເປັນເຈົ້າພາບງານມະຫາກໍາກິລາຊີເກມຄັ້ງທີ 32 ເເລະ ອາຊຽນພາຣາເກມຄັ້ງທີ 12 ຂອງຣາຊາອານາຈັກກໍາປູເຈຍ ໃນຖານະເປັນປະເທດສະມາຊິກອາຊຽນ ກໍ່ຄືເປັນສະມາຊິກຂອງຄະນະກໍາມະການກິລາອາຊຽນໄລຍະຜ່ານມາກໍ່ຄືປັດຈຸບັນລາວເຮົາໄດ້ປະຕິບັດຕາມພັນທະກໍ່ຄືກະຕິກາຂອງຄະນະກໍາມະການກິລາອາຊຽນວາງອອກຢ່າງເຂັ້ມງວດ ເເລະໄດ້ສົ່ງຄະນະນໍາຄູຝືກ ເເລະນັກກິລາເຂົ້າຮ່ວມການເເຂ່ງຂັນກິລາຊີເກມທີ່ຫລາຍໆປະເທດຜັດປ່ຽນກັນເປັນເຈົ້າພາບທຸກໆ 2 ປີ "

ສໍາລັບການເເລ່ນທວນໄຟສະຫນັບສະຫນູນງານມະຫາກໍາກິລາຊີເກມຄັ້ງທີ 32 ເເລະອາຊຽນພາລາເກມຄັ້ງທີ 12 ໃນຄັ້ງນີ້ ໄດ້ກໍານົດຈຸດນັກກິລາແລ່ນ 6 ຈຸດ ສຳລັບຈຸດທີ 1 ເລີ່ມຕົ້ນຈາກສະຖານທູດກໍາປູເຈຍ ຫາ ສານປະຊາຊົນສູງສຸດ ຫາ ວັດສີເມືອງ ໄລຍະທາງ 1.000 ແມັດ, ຈຸດທີ 2 ຈາກວັດສີເມືອງ ຫາ ກະຊວງເຕັກໂນໂລຊີ ແລະ ການສື່ສານ ໄລຍະທາງ 1.200 ແມັດ, ຈຸດທີ 3 ກະຊວງເຕັກໂນໂລຊີ ແລະ ການສື່ສານ ຫາ ກະຊວງກະສິກຳ ແລະ ປ່າໄມ້ ໄລຍະທາງ 1.000 ແມັດ, ຈຸດທີ 4 ກະຊວງກະສິກຳ ແລະ ປ່າໄມ້ ຫາ ທະນາຄານອິນໂດຈີນ ໄລຍະທາງ 1.000 ແມັດ, ຈຸດທີ 5 ຈາກທະນາຄານອິນໂດຈີນ ຫາປະຕູໂຂງທາດຫຼວງ ໄລຍະທາງ 1.000 ແມັດ ແລະ ຈຸດທີ 6 ຈາກປະຕູໂຂງທາດຫຼວງ ຫາ ຕໍ່ໜ້າພະທາດຫຼວງ ໄລຍະທາງ 300 ແມັດ.

ຊຶ່ງປະເທດລາວເເມ່ນປະເທດສຸດທ້າຍຂອງການເເລ່ນທວນໄຟຖັດຈາກ ຫວຽດນາມ, ຟີລີບປີນ, ອີນໂດເນເຊຍ, ຕີມໍເລສເຕ, ມາເລເຊຍ, ສິງກະໂປ, ໄທ ເເລະມຽນມາ ຫລັງຈາກນັ້ນທວນໄຟດັ່ງກ່າວຈະຖືກນໍາສົ່ງກັບຄືນປະເທດກໍາປະເຈຍຜ່ານດ່ານສາກົນຫນອງນົກຂຽນຊາຍເເດນຕິດຈອດກັບເເຂວງຈໍາປາສັກ.
ພາບ-ຂ່າວ : ເດດອາລຸນ, ພູເງິນ

แชร์