ປຶກສາຫາລືການສົ່ງເສີມ ແລະອຳນວຍຄວາມສະດວກດ້ານການຄ້າ ປະເທດແມ່ນໍ້າຂອງ-ແມ່ນໍ້າລ້ານຊ້າງ
ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມເວທີປຶກສາຫາລື ພາຍໃຕ້ຫົວຂໍ້: “ແລກປ່ຽນບົດຮຽນ ດ້ານການສົ່ງເສີມ ແລະອໍານວຍຄວາມສະດວກດ້ານການຄ້າ ລະຫວ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ”ຂຶ້ນໃນວັນທີ 25 ເມສານີ້ ທີ່ນະຄອນຫຼວງວຽງຈັນ, ຈັດໃນຮູບແບບເຊິ່ງໜ້າ ແລະ ທາງໄກ, ໂດຍການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ, ມີພາກລັດ ແລະພາກທຸລະກິດ ຂອງບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ຄື: ສປປ ລາວ, ສປ ຈີນ, ກຳປູເຈຍ,ມຽນມາ, ໄທ ແລະສສ ຫວຽດນາມ ເຂົ້າຮ່ວມຊຶ່ງເວທີປຶກສາຫາລືດັ່ງກ່າວແມ່ນໄດ້ຮັບການສະໜັບສະໜູນ ຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ.
ຊຶ່ງຈຸດປະສົງແມ່ນເພື່ອແລກປ່ຽນບົດຮຽນ ແລະປະສົບການກ່ຽວກັບການຈັດຕັ້ງປະຕິບັດວຽກງານການສົ່ງເສີມ ແລະອຳນວຍຄວາມສະດວກດ້ານການຄ້າຂອງປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ເປັນຕົ້ນແມ່ນການຈັດຕັ້ງປະຕິບັດບັນດານິຕິກຳ, ຂໍ້ກຳນົດ ແລະ ລະບຽບຕ່າງໆ ທີ່ກ່ຽວຂ້ອງກັບການອຳນວຍຄວາມສະດວກດ້ານການຄ້າ ໃນໄລຍະຜ່ານມາ ພ້ອມທັງທົບທວນ ແລະ ຕີລາຄາຄືນເຖິງກາລະໂອກາດ, ສິ່ງທ້າທາຍ ແລະ ຂໍ້ຫຍຸ້ງຍາກໃນການສົ່ງເສີມການຄ້າຂ້າມແດນກັບບັນດາປະເທດແມ່ນໍ້າຂອງເພື່ອສ້າງສະພາບແວດລ້ອມທີ່ດີເພື່ອອຳນວຍຄວາມສະດວກດ້ານການຄ້າ ແລະການລົງທຶນ ແລະວາງແຜນທິດທາງແຜນການໃນຕໍ່ໜ້າ.
ເວທີປຶກສາຫາລືໃນຄັ້ງນີ້ຜູ້ເຂົ້າຮ່ວມໄດ້ມີການແລກປ່ຽນຄໍາຄິດຄໍາເຫັນ, ຂໍ້ມູນຂ່າວສານກ່ຽວກັບທ່າແຮງບົ່ມຊ້ອນ ແລະວຽກງານຈຸດສຸມໃນການພັດທະນາເສດຖະກິດ-ສັງຄົມຂອງປະເທດຕົນໂດຍສະເພາະວຽກງານການເຊື່ອມໂຍງ-ເຊື່ອມຈອດ ດ້ານພື້ນຖານໂຄງລ່າງ, ດ້ານເສດຖະກິດ, ການຄ້າ ແລະການລົງທຶນໃນບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ.
ເວທີປຶກສາຫາລືໃນຄັ້ງນີ້ໄດ້ດໍາເນີນໄປດ້ວຍບັນຍາກາດທີ່ດີມີການແລກປ່ຽນບົດຮຽນ, ປະສົບການ ແລະ ຄໍາຄິດເຫັນຢ່າງກົງໄປກົງມາກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກລວມທັງບັນດາຂໍ້ສະເໜີແນະໃນການຈັດຕັ້ງປະຕິບັດວຽກງານການສົ່ງເສີມ ແລະອຳນວຍຄວາມສະດວກດ້ານການຄ້າໃນຕໍ່ໜ້າແນໃສ່ການຊຸກຍູ້ເສດຖະກິດ ແລະຍາດແຍ່ງເອົາຜົນປະໂຫຍດຕົວຈິງມາສູ່ປະຊາຊົນ ຂອງປະເທດແມ່ນໍ້າຂອງກໍຄືໃນພາກພື້ນ ແລະສາກົນ.
ນອກຈາກນີ້, ໃນວັນທີ 26 ເມສາ 2023, ບັນດາຜູ້ເຂົ້າຮ່ວມເວທີປຶກສາຫາລືຈາກບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ຍັງໄດ້ໄປທັດສະນະສຶກສາ ແລະຢ້ຽມຊົມສະຖານທີ່ຕ່າງໆ ທີ່ເປັນທ່າແຮງດ້ານການພັດທະນາຂອງແຂວງຫຼວງພະບາງຕື່ມອີກ.
ຂ່າວ: ກະຊວງການຕ່າງປະເທດ
