ຄະນະນັກກິລາລາວ ຄວ້າ 2 ຫຼຽນຄໍາ, 7 ຫຼຽນເງິນ 33 ຫຼຽນທອງ ງານກິລາຊີເກມ ຄັ້ງທີ 31

ພິທີສະຫຼຸບຜົນງານຄະນະນັກກິລາລາວ ຊຸດສ້າງຜົນງານຄວ້າ 2 ຫຼຽນຄໍາ, 7 ຫຼຽນເງິນ ແລະ 33 ຫຼຽນທອງ ໃນງານມະຫະກຳກິລາຊີເກມ ຄັ້ງທີ 31 ທີ່ ສສ ຫວຽດນາມ ເປັນເຈົ້າພາບ ຈັດຂຶ້ນເມື່ອວັນທີ 21 ເມສາ 2023 ທີ່ຫ້ອງປະຊຸມຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ໃຫ້ກຽດເຂົ້າຮ່ວມໂດຍ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ຮສ.ປອ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ແລະທ່ານ ແສງພອນ ພົນອາມາດ ຫົວໜ້າກົມກິລາລະດັບສູງກະຊວງສຶກສາທິການ ແລະກິລາ ພ້ອມດ້ວຍຄະນະນໍາ, ຄະນະຄູຝຶກ, ນັກກິລາ ແລະສື່ມວນຊົນ ຢ່າງພ້ອມພຽງ.

ໂອກາດນີ້, ທ່ານ ແສງພອນ ພົນອາມາດ ໄດ້ລາຍງານໃຫ້ຮູ້ວ່າ: ສຳລັບການເຂົ້າຮ່ວມງານມະຫະກຳກິລາຊີເກມ ຄັ້ງທີ 31 ທີ່ສສ ຫວຽດນາມ ເປັນເຈົ້າພາບ ໃນລະຫວ່າງວັນທີ 12-23 ພຶດສະພາ 2022, ທັບນັກກິລາລາວເຮົາສາມາດຍາດມາໄດ້ທັງໝົດ 2 ຫຼຽນຄໍາ, 7 ຫຼຽນເງິນ ແລະ 33 ຫຼຽນທອງ ຈາກການສົ່ງເຂົ້າຮ່ວມ 30 ປະເພດກິລາ ໂດຍມີຄະນະນໍາ, ຄູຝຶກ ແລະນັກກິລາເຂົ້າຮ່ວມທັງໝົດ 511 ຄົນ. ຊຶ່ງຜົນງານດັ່ງກ່າວຖືວ່າສໍາເລັດຕາມເປົ້າໝາຍສາມາດຍາດໄດ້ຫຼຽນຫຼາຍກວ່າຊີເກມ ຄັ້ງທີ 30 ໃນປີ 2019 ທີ່ປະເທດຟິລິບປິນ. ສະນັ້ນ, ເພື່ອເປັນການຍ້ອງຍໍຊົມເຊີຍຕໍ່ກັບຜົນງານດັ່ງກ່າວທາງລັດຖະບານ ກໍໄດ້ປະດັບຫຼຽນໄຊແຮງງານ ຊັ້ນ II, ຊັ້ນ III ແລະຫຼຽນກາແຮງງານ ໃຫ້ແກ່ຄະນະນໍາ, ຄະນະຄູຝຶກ ແລະນັກກິລາ ທີ່ເຂົ້າຮ່ວມຢ່າງສົມກຽດ. ພ້ອມດຽວກັນນີ້, ຍັງໄດ້ມີການມອບເງິນອັດສີດຈາກບໍລິສັດຫ້າງຮ້ານຕ່າງໆ ເຊັ່ນ: ບໍລິສັດ ເບຍລາວ ຈໍາກັດ ອຸປະຖຳເງິນລາງວັນ 234.000.000 ກີບ ແລະ ສະໜັບສະໜູນຜະລິດຕະພັນເຄື່ອງດື່ມ, ເຄື່ອງນຸ່ງ ແລະ ເງິນສົດທັງໝົດ 633.287.000 ກີບ, ບໍລິສັດ ລາວໂທລະຄົມມະນາຄົມ ມະຫາຊົນ ອຸປະຖໍາເປັນເງິນລາງວັນທັງໝົດ 370.000.000 ກີບ. ນອກນັ້ນ, ຍັງມີບັນດາອົງການການຈັດຕັ້ງ, ພາກລັດ, ບັນດາບໍລິສັດ ແລະບຸກຄົນທີ່ເປັນຄະນະບໍລິຫານງານສະຫະພັນໄດ້ປະກອບສ່ວນຊຸກຍູ້ນັກກິລາຂອງແຕ່ລະປະເພດກິລາເປັນເງິນທັງໝົດເກືອບ 4 ຕື້ກວ່າກີບ.

ຕອນທ້າຍພິທີ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດກ່າວຄຳໂອວາດໂດຍທ່ານໄດ້ເນັ້ນໃຫ້ທຸກພາກສ່ວນທີ່ກ່ຽວຂ້ອງ ໃຫ້ໄດ້ສືບຕໍ່ອອກແຮງຝຶກຊ້ອມເພື່ອຍາດແຍ່ງເອົາໄຊຊະນະ ແລະ ສ້າງກຽດຊື່ສຽງມາໃຫ້ປະເທດຊາດໃນການເຂົ້າຮ່ວມແຂ່ງຂັນໃນມະຫະກຳກິລາຊີເກມ ຄັ້ງທີ 32 ທີ່ຣາຊະອານາຈັກກໍາປູເຈຍ ເປັນເຈົ້າພາບໃນເດືອນພຶດສະພາ 2023.
ຂ່າວໂດຍ: ສົງການ ພັນແພງດີ

แชร์