ກະແສຕບ-ຮັບຈາກນັກທ່ອງທ່ຽວ ສ ເກົາຫຼີ ຫຼັງໂຄວິດ -19

ກົມໂຄສະນາການທ່ອງ ທ່ຽວ ຮ່ວມກັບສູນອາຊຽນ - ສ. ເກົາຫຼີ ໄດ້ຈັດສຳມະນາກ່ຽວກັບ ແນວໂນ້ມ ແລະກະແສນັກທ່ອງທ່ຽວ ສ.ເກົາຫຼີ ພາຍຫຼັງການແພ່ລະບາດຂອງພະຍາດໂຄວິດ-19 ໃນວັນທີ 20 ເມສາ 2023 ທີ່ແຂວງຫລວງພະບາງໂດຍການເປັນປະທານຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະທ່ອງທ່ຽວ (ຖວທ), ມີທ່ານ ກິມ ເຮຢົງ ເລຂາທິການໃຫຍ່ ສູນອາຊຽນ-ສ. ເກົາຫຼີ, ທ່ານ ນາງ ມະນີສາຄອນ ທຳມະວົງໄຊ ຮອງຫົວໜ້າກົມໂຄສະນາການທ່ອງທ່ຽວ, ມີວິທະຍາກອນຈາກປະເທດ ສ. ເກົາຫລີ ພ້ອມດ້ວຍພະແນກການທີ່ກ່ຽວ ຂ້ອງ ແລະ ພາກທຸລະກິດພາຍໃນ ແຂວງຫລວງພະບາງ ເຂົ້າຮ່ວມ.

ການສຳມະນາຄັ້ງນີ້, ເປັນກາ ລະໂອກາດອັນສຳຄັນໃນການສົ່ງເສີມຮ່ວມມືດ້ານວຽກງານການທ່ອງທ່ຽວ ລະຫວ່າງ ລາວ-ສ. ເກົາຫຼີ ໃຫ້ນັບມື້ນັບເຂັ້ມແຂງ ແລະກວ້າງຂວາງຍິ່ງຂຶ້ນ, ທັງເປັນເວທີສົນທະນາແລກປ່ຽນບົດຮຽນ ແລະຄຳຄິດຄຳເຫັນ ເພື່ອສ້າງຄວາມເຂົ້າໃຈລະຫວ່າງພາກລັດ ແລະ ພາກເອກະຊົນຂອງທັງ ສອງປະເທດ ເພື່ອພ້ອມກັນຄົ້ນຄວ້າເບິ່ງສະພາບຄວາມຕ້ອງການຕົວຈິງ, ຊອກຫາວິທີການທີ່ເໝາະສົມ ແລະ ສອດຄ່ອງເພື່ອ ອຳນວຍຄວາມສະດວກ ແລະ ເຮັດໃຫ້ການທ່ອງທ່ຽວລາວ-ສ.ເກົາຫຼີ ນັບມື້ນັບມີທ່າແຮງ ແລະຂະຫຍາຍຕົວຂຶ້ນ.

ທ່ານຮອງລັດຖະມົນຕີກະຊວງ ຖວທ ອຸ່ນທວງ ຂາວພັນ ໃຫ້ຮູ້ວ່າ: ວຽກງານການທ່ອງທ່ຽວເປັນຂະແໜງການໜຶ່ງທີ່ມີຄວາມສຳຄັນ ແລະມີບົດບາດຕໍ່ການພັດທະນາເສດຖະກິດ-ສັງຄົມຂອງຫຼາຍປະເທດໃນທົ່ວໂລກກ່ອນມີການແພ່ລະບາດຂອງພະຍາດໂຄວິດ-19, ເຖິງວ່າຫຼາຍປະເທດຈະໄດ້ຮັບຜົນກະທົບຫຼາຍພຽງໃດກໍຕາມ, ແຕ່ພາຍຫລັງທີ່ທົ່ວໂລກສາມາດສະກັດກັ້ນ ແລະຜ່ອນຜັນບັນດາມາດ ຕະການຂອງການແພ່ລະບາດພະຍາດດັ່ງກ່າວອັນໄດ້ເຮັດໃຫ້ການ ທ່ອງທ່ຽວກັບມາຟື້ນຕົວໄວຢ່າງ ເຫັນໄດ້ຊັດເຈນທີ່ສຸດຂອງທຸກປະເທດໃນໂລກ.

ສຳລັບ ສປປ ລາວ, ລັດຖະບານໄດ້ເອົາໃຈໃສ່ ແລະເຫັນຄວາມສໍາຄັນຂອງວຽກງານການທ່ອງທ່ຽວສະເໜີມາໂດຍສະເພາະພາຍຫລັງການແຜ່ລະບາດຂອງພະຍາດໂດວິດ-19 ໂດຍໄດ້ກໍານົດວຽກງານການທ່ອງທ່ຽວເປັນວຽກງານບຸລິມະສິດໃນການກະຕຸ້ນ, ຊຸກຍູ້ເສດຖະກິດຂອງຊາດໃນການປະກອບສ່ວນເຂົ້າພັດທະນາສ້າງອາຊີບ, ສ້າງວຽກເຮັດງານທຳໃຫ້ແກ່ປະຊາຊົນບັນດາເຜົ່າໃນຂອບເຂດທົ່ວປະເທດ. ພ້ອມນີ້, ສປປ ລາວ ໄດ້ມີການເປີດກວ້າງການພົວພັນ-ຮ່ວມມືກັບ ບັນດາປະເທດໃນປະຊາຄົມອາຊຽນ, ອາຊີປາຊີຟິກ ແລະ ສາກົນ. ສປປ ລາວ ແລະ ສ.ເກົາຫຼີ ມີສາຍພົວພັນມິດຕະພາບ ແລະການຮ່ວມມືທີ່ເປັນມູນເຊື້ອສະໜິດແໜ້ນມາແຕ່ດົນນານ ໂດຍໄດ້ມີ ການຮ່ວມມືກັນທາງດ້ານທຸລະກິດ, ການຊ່ວຍເຫຼືອກັນໃນການພັດທະນາບ້ານຕ່າງໆ, ການເດີນທາງທ່ອງທ່ຽວລະຫວ່າງປະເທດພາຍຫລັງທີ່ ສປປ ລາວ ໄດ້ເປີດປະເທດຢ່າງເຕັມຮູບແບບ.

ມາຮອດເດືອນທັນວາ ປີ 2022 ໄດ້ມີນັກທ່ອງທ່ຽວສາກົນ ເຂົ້າມາ 1.294.365 ຄົນ (ມີກຸ່ມນັກທ່ອງທ່ຽວຈາກບັນດາປະເທດອາຊຽນ ຄື: ນັກທ່ອງທ່ຽວຈີນ ແລະ ນັກທ່ອງທ່ຽວ ສ.ເກົາຫລີ). ນັກທ່ອງທ່ຽວ ສ.ເກົາຫລີ ແມ່ນກຸ່ມຕະຫລາດໃຫຍ່ຂອງຈໍານວນນັກທ່ອງທ່ຽວທີ່ເຂົ້າມາທ່ຽວ ສປປ ລາວ ຫລາຍທີ່ສຸດ, (ສໍາລັບຕົວເລກນັກທ່ອງທ່ຽວເກົາຫລີ ໄລຍະ 2 ເດືອນຕົ້ນປີ 2023 ນີ້, ມີຈຳນວນ 34.326 ເທື່ອຄົນ) ຊຶ່ງຮູບແບບການທ່ອງທ່ຽວຂອງນັກທ່ອງທ່ຽວ ສ. ເກົາຫຼີ ແມ່ນຈະ ມາເປັນກຸ່ມໃຫຍ່ (ເກົາຫລີຟີເວີ), ມີການບອກຕໍ່ໆໂຄສະນາເປັນວົງ ກວ້າງ, ມີການມາທ່ອງທ່ຽວຍາວຕໍ່ເນື່ອງໃນທຸກໆລະດູການ ແລະ ມີນັກຮ້ອງ, ນັກສະແດງຈາກເກົາຫຼີ ມາສ້າງກິດຈະກຳຕ່າງໆ ທີ່ເປັນສີສັນໃຫ້ການທ່ອງທ່ຽວຂອງ ສປປ ລາວ ຊຶ່ງສະຖານທີ່ທ່ອງທ່ຽວຍອດນິຍົມແມ່ນເມືອງວັງວຽງ, ແຂວງວຽງຈັນ ແລະແຂວງຫລວງພະບາງ.
ຂ່າວ: ວຽງສະຫວັນ

แชร์