ທະນາຄານແຫ່ງ ສປປ ລາວ ອອກແຈ້ງການໃຫ້ປະຊາຊົນມີສະຕິລະມັດລະວັງຕົວ ໃນການແລກປ່ຽນເງິນຕາຕ່າງປະເທດນຳນິຕິບຸກຄົນທີ່ບໍ່ໄດ້ຮັບອະນຸຍາດ

ທະນາຄານແຫ່ງ ສປປ ລາວ ຂໍຖືເປັນກຽດແຈ້ງມາຍັງ ພໍ່ແມ່ປະຊາຊົນ, ຊາວຄ້າຂາຍ, ນັກທຸລະກິດ ທັງພາຍໃນ ແລະຕ່າງປະເທດ, ພະນັກງານ, ທະຫານ ແລະຕໍາຫຼວດ, ຕະຫຼອດຮອດຜູ້ທີ່ອາໄສຢູ່ ສປປ ລາວ ໃນຂອບເຂດທົ່ວປະເທດ ຊາບວ່າ:

ໃນໄລຍະຜ່ານມາທະນາຄານແຫ່ງ ສປປ ລາວ ໄດ້ອອກແຈ້ງຢຸດຕິການອະນຸຍາດດຳເນີນທຸລະກິດແລກປ່ຽນເງິນຕາຂອງຮ້ານແລກປ່ຽນເງິນຕາໃນຂອບເຂດທົ່ວປະເທດ ທັງໝົດ 419 ຮ້ານ ໝາຍວ່າ ສປປ ລາວ ແມ່ນບໍ່ມີການອະນຸຍາດດຳເນີນທຸລະກິດຮ້ານແລກປ່ຽນເງິນຕາແລ້ວ.

ຜ່ານການຕິດຕາມກວດກາເຫັນວ່າມີບຸກຄົນ ຫຼືນິຕິບຸກຄົນຈຳນວນໜຶ່ງຍັງມີການສວຍໃຊ້ຄວາມຊິນເຄີຍກັບລູກຄ້າຂອງຕົນ ແລະມີການໃຫ້ບໍລິການແລກປ່ຽນເງິນຕາທີ່ບໍ່ໄດ້ຮັບອະນຸຍາດໃຫ້ແກ່ສັງຄົມ, ຕໍ່ກັບບັນຫາດັ່ງກ່າວທະນາຄານແຫ່ງ ສປປ ລາວ ໄດ້ມີການລົງຕິດຕາມກວດກາ ແລະ ປະສານສົມທົບກັບກະຊວງປ້ອງກັນຄວາມສະຫງົບໃນການປະຕິບັດມາດຕະການທາງກົດໝາຍຕໍ່ຫົວໜ່ວຍທຸລະກິດທີ່ໃຫ້ບໍລິການແລກປ່ຽນເງິນຕາທີ່ບໍ່ຖືກຕ້ອງດັ່ງກ່າວແຕ່ລະໄລຍະ.

ເຖິງຢ່າງໃດກໍຕາມ, ເພື່ອປະຕິບັດໃຫ້ສອດຄ່ອງຕາມກົດໝາຍ ແລະລະບຽບການ, ບໍ່ເປັນການຊຸກຍູ້ສົ່ງເສີມການແລກປ່ຽນເງິນຕາທີ່ບໍ່ຖືກຕ້ອງ ແລະປ້ອງກັນຄວາມສ່ຽງຈາກປະກົດການຫຍໍ້ທໍ້ຂອງສັງຄົມ ທະນາຄານແຫ່ງ ສປປ ລາວ ຂໍຄວາມຮ່ວມມືມາຍັງ ພໍ່ແມ່ປະຊາຊົນ, ຊາວຄ້າຂາຍ, ນັກທຸລະກິດ ທັງພາຍໃນ ແລະ ຕ່າງປະເທດ, ພະນັກງານ, ທະຫານ ແລະຕໍາຫຼວດ, ຕະຫຼອດຮອດຜູ້ທີ່ອາໄສຢູ່ ສປປ ລາວ ໃນຂອບເຂດທົ່ວປະເທດໃຫ້ນໍາໃຊ້ບໍລິການປ່ຽນເງິນຕານຳທະນາຄານທຸລະກິດ, ໜ່ວຍບໍລິການ ແລະໜ່ວຍແລກປ່ຽນເງິນຕາຂອງທະນາຄານທຸລະກິດທີ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ ເທົ່ານັ້ນຫຼີກລ່ຽງການໃຊ້ບໍລິການແລກປ່ຽນເງິນຕານໍາບຸກຄົນ ຫຼືນິຕິບຸກຄົນທີ່ບໍ່ໄດ້ຮັບອະນຸຍາດລວມທັງຜູ້ທີ່ມີການໂຄສະນາແລກປ່ຽນເງິນຕາຜ່ານສື ແລະຊ່ອງທາງອອນລາຍຕ່າງໆ ຊຶ່ງຖືວ່າບໍ່ຖືກຕ້ອງຕາມກົດໝາຍ ແລະລະບຽບການ.

ດັ່ງນັ້ນ, ຈຶ່ງແຈ້ງມາຍັງພໍ່ແມ່ປະຊາຊົນ, ຊາວຄ້າຂາຍ, ນັກທຸລະກິດທັງພາຍໃນ ແລະຕ່າງປະເທດ, ພະນັກງານ, ທະຫານ ແລະຕຳຫຼວດ, ຕະຫຼອດຮອດຜູ້ທີ່ອາໄສຢູ່ ສປປ ລາວ ໃນຂອບເຂດທົ່ວປະເທດເພື່ອຊາບ ແລະມີສະຕິໃນການແລກປ່ຽນເງິນຕາ.

• 24/04/2023