ຄຳມ່ວນ ມອບລາງວັນໃຫ້ນັກຮຽນເກັ່ງເຂົ້າຮ່ວມສອບເສັງ ລະດັບຊາດ ສົກຮຽນ 2022-2023

ໃນວັນທີ 21 ເມສາຜ່ານມາ, ໄດ້ຈັດມີພິທີມອບ-ຮັບລາງວັນ ໃຫ້ນັກຮຽນເກັ່ງທີ່ເປັນຕົວແທນຂອງແຂວງຄໍາມ່ວນ ເຂົ້າຮ່ວມແຂ່ງຂັນນັກຮຽນເກັ່ງລະດັບຊາດ ປະຈໍາ ສົກຮຽນ 2022-2023 ໂດຍມີທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະກິລາແຂວງ, ຕາງໜ້າຂະແໜງການທີ່ກ່ຽວຂ້ອງ, ບັນດາຄະນະອໍານວຍການໂຮງຮຽນ, ພະນັກງານຄູ-ອາຈານ, ຜູ້ປົກຄອງ ແລະ ນ້ອງນັກຮຽນເຂົ້າຮ່ວມ, ທັງນີ້ກໍເພື່ອເປັນການຊຸກຍູ້, ສົ່ງເສີມ ແລະໃຫ້ກໍາລັງໃຈແກ່ນັກຮຽນເກັ່ງ, ທັງເປັນການສ້າງ ແຮງບັນດານໃຈ ແລະແບບຢ່າງທີ່ດີໃຫ້ແກ່ນ້ອງນັກຮຽນຄົນອື່ນໆ.

ໃນພິທີ,ທ່ານ ດາລີວັນ ໄຊຍະເກດ ຮັກສາການຫົວໜ້າຂະແໜງສາມັນໄດ້ໃຫ້ຮູ້ວ່າ: ຜົນການສອບເສັງແຂ່ງຂັນນັກຮຽນເກັ່ງລະດັບແຂວງໃນຊັ້ນປະຖົມ ແລະຊັ້ນມັດທະຍົມສຶກສາສົກຮຽນ 2022-2023 ສອບເສັງ ໄດ້ອັນດັບທີ 1, 2, 3 ແລະ ໄດ້ຄະແນນ 7 ຂຶ້ນໄປທັງໝົດ 13 ຄົນ, ຍິງ 10 ຄົນ, ນັກຮຽນເກັ່ງທີ່ສອບເສັງໄດ້ລາງວັນ ຊົມເຊີຍ 36 ຄົນ, ຍິງ 3 ຄົນ, ນັກຮຽນເກັ່ງທີ່ສອບເສັງໄດ້ອັນດັບທີ 1 ຂອງແຕ່ລະວິຊາແມ່ນໄດ້ເປັນຕົວແທນຂອງແຂວງເຂົ້າຮ່ວມແຂ່ງຂັນນັກຮຽນເກັ່ງລະດັບຊາດ (ມ4 ແລະ ມ7) ໃນ 4 ວິຊາຫລັກຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະເຄມີສາດ (ສໍາລັບວິຊາພາສາອັງກິດ ແລະຊັ້ນປະຖົມສຶກສາ (ປ5) ແມ່ນບໍ່ໄດ້ ສອບເສັງລະດັບຊາດ) ຊຶ່ງຕົວແທນຂອງແຂວງຄໍາມ່ວນທີ່ເຂົ້າຮ່ວມສອບເສັງລະດັບຊາດມີທັງໝົດ 8 ຄົນ, ຍິງ 5 ຄົນ.

ການແຂ່ງຂັນນັກຮຽນເກັ່ງລະດັບຊາດໄດ້ຈັດຂຶ້ນໃນລະຫວ່າງວັນທີ 4-7 ເມສາ 2023 ທີ່ມະຫາວິທະຍາໄລແຫ່ງຊາດ ນະຄອນຫລວງວຽງຈັນໂດຍມີ 3 ກິດຈະກໍາຫລັກຄື: ສອບເສັງແຂ່ງຂັນນັກຮຽນເກັ່ງ, ທັດສະນະສຶກສາ ແລະຖາມ-ຕອບ ວິທະຍາສາດ ໂດຍມີຕົວແທນນັກຮຽນຈາກ 17 ແຂວງ ແລະ 1 ນະຄອນຫຼວງເຂົ້າຮ່ວມ ທັງໝົດ 144 ຄົນ, ຍິງ 68 ຄົນ. ສໍາລັບຜົນການສອບເສັງນັກຮຽນເກັ່ງລະດັບຊາດຂອງນັກຮຽນຈາກແຂວງຄໍາມ່ວນ ວິຊາພາສາລາວ-ວັນນະຄະດີຂັ້ນ ມ4 ສາມາດຍາດໄດ້ອັນດັບທີ 2 ຄື: ນາງ ເຄັກ ເມັກສະຫວັນ ຈາກໂຮງຮຽນ ມສ ເທີນ-ຫີນບູນ ເມືອງຄູນຄໍາ ດ້ວຍຄະແນນ 7.20, ວິຊາຟີຊິກສາດ ຂັ້ນ ມ4 ສາມາດຍາດໄດ້ອັນດັບທີ 6 ຄື:ທ້າວ ເພັດນໍາໂຊກ ສຸວັນມະນີ ຈາກໂຮງຮຽນຄໍາມ່ວນ-ກວາງບິ່ງ ເມືອງທ່າແຂກ ດ້ວຍຄະແນນ 5.28, ວິຊາພາສາລາວ-ວັນນະຄະດີ ຂັ້ນ ມ7 ສາມາດຍາດໄດ້ອັນດັບທີ 9 ຄືນາງ ອາລຸນນ້າ ສຸວັນນະສາວ ຈາກໂຮງຮຽນ ມປ ທ່າແຂກດ້ວຍຄະແນນ 5.05.
ທີ່ມາ: ຂປລ. ຂ່າວ-ພາບ: ແດງສະຫວັດ

แชร์