ປະທານອົງການກາແດງແຫ່ງຊາດລາວຕ້ອນຮັບຜູ້ຊ່ຽວຊານວຽກງານເລືອດ

ເມື່ອບໍ່ດົນມານີ້ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ຕ້ອນຮັບທ່ານ ນາງ ມິເຊວ ໂວເລັກ (Ms.Michelle Wsolak) ຄະນະກອງເລຂາ, ຫົວໜ້າຝ່າຍວິຊາການໜ່ວຍງານເລືອດສະພາກາແດງອົດສະຕາລີ, ທ່ານ ດຣ. ຊຶກວົງ ລີ (Cheuk-Kwong lee) ຜູ້ປະສານງານປະຈຳພາກພື້ນອາຊີ-ປາຊີຟິກ, ຫົວໜ້າໜ່ວຍງານບໍລິການເລືອດ ອົງການກາແດງຮ່ອງກົງ ໃນໂອກາດມາເຄື່ອນໄຫວເຮັດວຽກຢູ່ ສປປ ລາວ ໃນລະຫວ່າງວັນທີ 20-25 ເມສາ 2023.

ເພື່ອໃຫ້ຄຳປຶກສາ ແລະແນະນຳດ້ານການບໍລິການເລືອດທີ່ປອດໄພໃນກະກຽມເພື່ອທົດສອບເອົາໃບຢັ້ງຢືນຄຸນນະພາບສາກົນ (AABB Fundamental Standard Certificatione) ໃຫ້ແກ່ສະຖາບັນເລືອດແຫ່ງຊາດ, ພ້ອມທັງປັບປຸງວຽກງານຄຸນນະພາບເລືອດໃຫ້ມີມາດຕະຖານສາກົນເພື່ອບັນລຸເປົ້າໝາຍການບໍລິຈາກເລືອດດ້ວຍຄວາມສະໝັກໃຈບໍ່ຮຽກຮ້ອງສີ່ງຕອບແທນ, ທັງເປັນການຮັບປະກັນການສະໜອງເລືອດປອດໄພ, ພຽງພໍ ແລະທັນເວລາໃຫ້ແກ່ຄົນເຈັບຜູ້ທີ່ຕ້ອງການໃສ່ເລືອດຊຶ່ງກຳລັງປິ່ນປົວຢູ່ຕາມໂຮງໝໍແຫ່ງຕ່າງໆ.

ໂອກາດນີ້, ທ່ານປະທານອົງການກາແດງແຫ່ງຊາດລາວ ໄດ້ສະແດງຄວາມຂອບໃຈຕໍ່ທັງ 2 ທ່ານ ທີ່ໄດ້ໃຫ້ການຊ່ວຍເຫຼືອວຽກງານການບໍລິຈາກເລືອດໃຫ້ມີຄວາມເຂັ້ມແຂງຂຶ້ນຕື່ມແນໃສ່ຮັບປະກັນການຕອບສະໜອງເລືອດທີ່ພຽງພໍ, ປອດໄພ ແລະທັນເວລາ ໃຫ້ແກ່ຄົນເຈັບທີ່ຕ້ອງການບໍ່ວ່າຈະຢູ່ໃນລະດັບສູນກາງ, ລະດັບແຂວງ ແລະ ລະດັບເມືອງໃນຂອບເຂດທົ່ວປະເທດຊຶ່ງເຫັນວ່າມີຄວາມສໍາຄັນ ແລະຈໍາເປັນ, ຖ້າບໍ່ມີການຕອບສະໜອງເລືອດທີ່ທ່ວງທັນໃນເວລາຄົນເຈັບຕ້ອງການແລ້ວບາງເທື່ອເຂົາເຈົ້າຫຼົ່ານັ້ນອາດເສຍຊີວິດໄດ້.

แชร์