ກອງປະຊຸມສະພາເສດຖະກິດ-ສັງຄົມ (ECOSOC) ຂອງອົງການສະຫະປະຊາຊາດ (ສປຊ) ຄັ້ງທີ 8

ຄະນະຜູ້ແທນກະຊວງການເງິນນໍາໂດຍທ່ານ ພູທະນູເພັດ ໄຊສົມບັດ, ຮອງລັດຖະມົນຕີກະຊວງການເງິນໄດ້ເຂົ້າຮ່ວມກອງປະຊຸມສະພາເສດຖະກິດ-ສັງຄົມ (ECOSOC) ຂອງອົງການສະຫະປະຊາຊາດ (ສປຊ) ຄັ້ງທີ 8 ພາຍໃຕ້ຫົວຂໍ້ “ການຕິດຕາມການສະໜອງທຶນເພື່ອການພັດທະນາ ປະຈໍາປີ 2023 (ECOSOC Forum on Financing for Development)” ຊຶ່ງຈັດຂຶ້ນແຕ່ໃນລະຫວ່າງວັນທີ 17 – 21 ເມສາ 2023 ທີ່ ນິວຢອກ, ສ. ອາເມຣິກາ.

ກອງປະຊຸມເພື່ອຕິດຕາມຄວາມຄືບໜ້າການຈັດຕັ້ງປະຕິບັດແຜນງານ Addis Ababa Action Agenda (AAAA), ແນໃສ່ການຊຸກຍູ້ ການສະໜອງທຶນເຂົ້າໃນການຈັດຕັ້ງບັນດາເປົ້າໝາຍການພັດທະນາແບບຍືນຍົງ (ປພຍ ຫຼື SDGs) ໃຫ້ປະກົດຜົນເປັນຈິງພາຍໃນປີ 2030.

ພ້ອມນັ້ນ, ໄດ້ຮຽກຮ້ອງໃຫ້ເພີ່ມທະວີການຮ່ວມມືໃນການພັດທະນາ ແລະການລົງທຶນ ເພື່ອຈັດຕັ້ງປະຕິບັດ SDGs, ປັບປຸງສະຖາປັດຕະຍາກໍາການເງິນສາກົນ ແລະ ຮູບແບບການສະໜອງທຶນເພື່ອຊ່ວຍເຫຼືອບັນດາປະເທດກໍາລັງພັດທະນາ, ປະຕິບັດນະໂຍບາຍແຫ່ງຊາດ ແລະຂໍ້ລິເລີ່ມຕ່າງໆ ທີ່ສາມາດເລັ່ງລັດການພັດທະນາຍືນຍົງ, ສົ່ງເສີມການຮ່ວມມື, ແລກປ່ຽນບົດຮຽນ, ລະດົມທຶນ ແລະແກ້ໄຂ-ຫຼຸດຜ່ອນ-ປັບໂຄງສ້າງໜີ້ສິນໃຫ້ບັນດາປະເທດທີ່ຖືກກະທົບງ່າຍ ແລະປະເທດດ້ອຍພັດທະນາ.

ໃນກອງປະຊຸມພາກອະພິປາຍທົ່ວໄປ (General debate), ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນໄດ້ເນັ້ນຄວາມສຳຄັນຂອງການລະດົມທຶນພາຍໃນ (Domestic Resource Mobilization), ເຊິ່ງຈະເປັນແຫຼ່ງທຶນຫຼັກ ປະກອບສ່ວນເຂົ້າໃນການພັດທະນາເສດຖະກິດ – ສັງຄົມ ຂອງບັນດາປະເທດກຳລັງພັດທະນາ ເພື່ອບັນລຸເປົ້າໝາຍການພັດທະນາແບບຍືນຍົງ ປີ 2030 (SDGs) ໃນເງື່ອນໄຂທີ່ການຊ່ວຍເຫຼືອທາງການເພື່ອການພັດທະນາ (ຊກພ) ມີທ່າອ່ຽງຫຼຸດລົງ. ໃນນັ້ນ ຕ້ອງເລັ່ງສ້າງຄວາມເຂັ້ມແຂງການຄຸ້ມຄອງການເງິນພາກລັດ ກໍຄືການຫັນເປັນທັນສະໄໝ. ໄດ້ແຈ້ງໃຫ້ຮູ້ຄວາມຄືບໜ້າການຈັດຕັ້ງປະຕິບັດແຜນງານການປະຕິຮູບການຄຸ້ມຄອງການເງິນພາກລັດ ຢູ່ ສປປ ລາວ ຄຽງຄູ່ໄປກັບການຈັດຕັ້ງປະຕິບັດວາລະແຫ່ງຊາດ ແລະການກຽມນໍາໃຊ້ລະບົບຂໍ້ມູນການຄຸ້ມຄອງການເງິນ, ລວມທັງການສືບຕໍ່ປັບປຸງບັນດານິຕິກໍາ ຂອງຂະແໜງລາຍຮັບ. ໄດ້ສະເໜີບັນດາສະຖາບັນການເງິນສາກົນ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາ ເພີ່ມທະວີການຮ່ວມມື ແລະການປະສານງານໃນລວງເລິກເພື່ອຊ່ອຍເຫຼືອບັນດາປະເທດກຳລັງພັດທະນາຄົ້ນຄວ້າມາດຕະການໄລຍະສັ້ນ-ໄລຍະຍາວ ສຳລັບການລະດົມທຶນພາຍໃນ, ຊອກຄົ້ນທາງເລືອກທີ່ເໝາະສົມ ແລະດີສຸດເພື່ອສ້າງຄວາມເຂັ້ມແຂງການເກັບລາຍຮັບຕອບສະໜອງໃຫ້ແກ່ການຟື້ນຟູເສດຖະກິດ, ແລະ ສົ່ງເສີມການຮ່ວມມືລະດັບພາກພື້ນ ແລະສາກົນເພື່ອສ້າງຄວາມເຂັ້ມແຂງໃຫ້ບັນລຸເປົ້າໝາຍດັ່ງກ່າວ.

แชร์