ປີໃໝ່ລາວ ປີ 2023 ທົ່ວປະເທດເສຍຊີວິດຈາກອຸບັດຕິເຫດ 35 ຄົນ

ໃນໄລຍະ 7 ວັນ ( 11-17 ເມສາ 2023 ) ຂອງການສະເຫຼີມສະຫຼອງສົ່ງທ້າຍປີເກົ່າ ແລະຕ້ອນຮັບປີໃໝ່ລາວ ພສ 2566 ທົ່ວປະເທດມີຄົນເສຍຊີວິດຈາກອຸບັດຕິເຫດທາງຖະໜົນ ຈໍານວນ 35 ຄົນ.

ທ່ານ ພັອ ຄໍາເຫຼັກ ໄຊຍະສິດ ຮອງຫົວໜ້າກົມຕໍາຫຼວດຈະລາຈອນກົມໃຫຍ່ຕໍາຫຼວດ ກະຊວງ ປກສ ຖະແຫຼງຂ່າວ ໃນວັນທີ 19 ເມສາ 2023 ວ່າ: ເພື່ອສະກັດກັ້ນ ແລະ ຫຼຸດຜ່ອນອຸບັດຕິເຫດທີ່ຈະເກີດຂຶ້ນໃນໄລຍະສະເຫຼີມ-ສະຫຼອງສົ່ງທ້າຍປີເກົ່າ ແລະຕ້ອນຮັບປີໃໝ່ລາວທາງກົມຕໍາຫຼວດຈະລາຈອນໃນນາມຊີ້ນໍາມະຫາພາກກໍໄດ້ຈັດກອງປະຊຸມກັບຕໍາຫຼວດຈະລາຈອນ ປກສ ແຂວງໃນທົ່ວປະເທດດ້ວຍຮູບແບບທາງໄກ ເພື່ອຫາວິທີໃນການສະກັດກັ້ນ ແລະ ຫຼຸດຜ່ອນອຸບັດຕິເຫດ. ຈາກນັ້ນ, ບັນດາເຈົ້າໜ້າທີ່ຈະລາຈອນແຂວງກໍໄດ້ນໍາເອົາວຽກງານດັ່ງກ່າວຈັດຕັ້ງປະຕິບັດເປັນແຜນອັນລະອຽດຢູ່ພາຍໃນແຂວງຂອງຕົນໂດຍມີການໂຄສະນາປູກຈິດສໍານຶກໃຫ້ຜູ້ໃຊ້ລົດ-ໃຊ້ຖະໜົນພ້ອມທັງຈັດກິດຈະກໍາອື່ນໆ ເປັນຕົ້ນແຈກໜວກກັນກະທົບ, ຕັ້ງຈຸດຈັບຄວາມໄວ, ກວດທາດເຫຼົ້າຢ່າງເປັນຂະບວນການກວ້າງຂວາງ,ທັງເຮັດໜ້າທີ່ຕິດຕາມສະພາບການສັນຈອນຕາມຈຸດ, ຕາມປ້ອມ, ຕາມສະຖານທີ່ຕ່າງໆ ເພື່ອອໍານວຍຄວາມສະດວກໃຫ້ພິທິກໍາທາງສາສະໜາ ແລະມວນຊົນ. ນອກນີ້, ທາງກົມກໍໄດ້ຈັດພະນັກງານລົງຊຸກຍູ້ວຽກງານຮ່ວມກັບຈະລາຈອນແຂວງທັງນີ້ເພື່ອແນໃສ່ໃຫ້ອຸບັດຕິເຫດພາຍໃນທົ່ວປະເທດ.

ເຖິງຈະມີການຈັດຕັ້ງປະຕິບັດວຽກງານປ້ອງກັນພຽງໃດກໍຕາມ, ແຕ່ກໍປັດສະຈາກບໍ່ໄດ້ຍັງມີອຸບັດຕິເຫດທີ່ເກີດຂຶ້ນຕະຫຼອດ 7 ວັນ ທົ່ວປະເທດມີອຸບັດຕິເຫດເກີດຂຶ້ນທັງໝົດ 342 ຄັ້ງ, ພາຫະນະເປ່ເພ 589 ຄັນ, ຄົນໄດ້ຮັບບາດເຈັບ 611 ຄົນ ແລະ ເສຍຊີວິດ 35 ຄົນ ຍິງ 6 ຄົນ. ໃນນີ້, ນະຄອນຫຼວງວຽງຈັນ ເສຍຊີວິດ 7 ຄົນ, ຮອງລົງມາແຂວງສະຫວັນນະເຂດ 5 ຄົນ ຖ້າທຽບໃສ່ປີຜ່ານມາຈໍານວນອຸບັດຕິເຫດ ແລະ ຄົນໄດ້ຮັບບາດເຈັບເພີ່ມຂຶ້ນແຕ່ຄົນເສຍຊີວິດເທົ່າເກົ່າ.

ສໍາລັບອຸບັດຕິເຫດທີ່ເກີດຂຶ້ນໃນໄລຍະ 3 ວັນ ( 14-16 ເມສາ 2023 ) ທົ່ວປະເທດມີອຸບັດຕິເກດເກີດຂຶ້ນທັງໝົດ 194 ຄັ້ງ, ພາຫະນະເປ່ເພ 337 ຄັນ, ຄົນໄດ້ຮັບບາດເຈັບ 348 ຄົນ ແລະເສຍຊີວິດ 18 ຄົນ ຍິງ 2 ຄົນ. ໃນນີ້, ນະຄອນຫຼວງວຽງຈັນ 3 ຄົນ.

ລັກສະນະຂອງການເກີດອຸບັດຕິເຫດທີ່ມີຄົນເສຍຊີວິດ ລົດຈັກຕໍາລົດຍົນ 96 ຄັ້ງ ເສຍຊີວິດ 6 ຄົນ, ລົດຈັກຕໍາລົດຈັກ 106 ຄັ້ງ ເສຍຊີວິດ 5 ຄົນ, ລົດຈັກລົ້ມເອງ 28 ຄັ້ງ ເສຍຊີວິດ 5 ຄົນ, ລົດຈັກຕໍາຄົນຍ່າງ 20 ຄັ້ງ ເສຍຊີວິດ 3 ຄົນ, ລົດບັນທຸກຕໍາລົດຈັກ 8 ຄັ້ງ ເສຍຊີວິດ 1 ຄົນ, ລົດຍົນຕໍາຄົນຍ່າງ 4 ຄັ້ງ ເສຍຊີວິດ 1 ຄົນ, ລົດຍົນຕໍາລົດບັນທຸກ 3 ຄັ້ງ ເສຍຊີວິດ 1 ຄົນ ແລະ ເກີດຈາກກໍລະນີອື່ນໆ ລວມກັນເສຍຊີວິດ 12 ຄົນ.

ສາເຫດຂອງການເກີດອຸບັດຕິເຫດເກີດຈາກດື່ມສິ່ງມືນເມົາ, ຄວາມໄວ, ບໍ່ປ່ອຍສິດ, ຊິງບໍ່ຮັບປະກັນ, ຂັບຂີ່ກິນທາງ, ປ່ຽນທິດທາງ, ບໍ່ແນບຂວາ ແລະອື່ນໆ.
ຂ່າວ: ລັດດາວັນ

แชร์