ຄໍາມ່ວນ ສະຫຼຸບຜົນງານການເຂົ້າຮ່ວມແຂ່ງຂັນກິລາຄົນພິການແຫ່ງຊາດ ຄັ້ງທີ 3

ພິທີສະຫຼຸບຜົນງານດັ່ງກ່າວໄດ້ຈັດຂຶ້ນໃນວັນທີ 7 ເມສາ 2023 ທີ່ຮ້ານອາຫານທ່າແຂກໃໝ່ ເມືອງທ່າແຂກ ແຂວງຄໍາມ່ວນ, ໂດຍການເຂົ້າຮ່ວມຂອງ ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ທັງເປັນປະທານສະມາຄົມກິລາ-ກາຍະກໍາແຂວງ, ມີບັນດາແຂກຖືກເຊີນຂັ້ນແຂວງ, ພະແນກການທີ່ກ່ຽວຂ້ອງຕະຫຼອດຮອດຄູຝຶກ ແລະນັກກິລາຢ່າງພ້ອມພຽງ.

ການເຂົ້າຮ່ວມແຂ່ງຂັນໃນງານມະຫະກຳກິລາຄົນພິການແຫ່ງຊາດ ຄັ້ງທີ 3 ຫຼື “ຊຽງຂວາງ ພາຣາເກມ” ທີ່ແຂວງຊຽງຂວາງ ເປັນເຈົ້າພາບ ໃນຄັ້ງນີ້ ປະກອບມີ 17 ແຂວງ, 1 ນະຄອນຫຼວງວຽງຈັນ ແລະ ມີການຊີງໄຊທັງໝົດ 7 ປະເພດກິລາ. ໃນນີ້ສະເພາະແຂວງຄໍາມ່ວນ ໄດ້ສົ່ງເຂົ້າຮ່ວມ 3 ປະເພດຄື: ແລ່ນ-ລານ, ລອຍນໍ້າ ແລະ ຍົກນໍ້າໜັກ. ຊຶ່ງການແຂ່ງຂັນໄດ້ເລີ່ມແຕ່ວັນທີ 8-18 ກຸມພາ 2023. ຜ່ານການແຂ່ງຂັນຜົນປະກົດວ່າທັບນັກກິລາຄົນພິການແຂວງຄຳມ່ວນ ທັງ 3 ປະເພດ ຍາມາດຍາດມາໄດ້ 12 ຫຼຽນຄໍາ, 6 ຫຼຽນເງິນ ແລະ 2 ຫຼຽນທອງ ລວມ 20 ຫຼຽນ ຈັດຢູ່ໃນອັນດັບທີ 4 ຂອງປະເທດ.

ໃນໂອກາດນີ້, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ໄດ້ຕາງໜ້າມອບໃບຍ້ອງຍໍຂອງທ່ານເຈົ້າແຂວງຄໍາມ່ວນໃຫ້ແກ່ຄະນະນໍາຄູຝຶກ ແລະນັກກິລາ ທີ່ມີຜົນງານປະກອບສ່ວນເຫື່ອແຮງ ແລະສະຕິປັນຍາເຂົ້າໃນຂະບວນການແຂ່ງຂັນກິລາຄົນພິການແຫ່ງຊາດ ຄັ້ງທີ 3 ທີ່ແຂວງຊຽງຂວາງ ເປັນເຈົ້າພາບ. ພ້ອມນັ້ນຍັງໄດ້ມອບເງິນບໍາເນັດໃຫ້ແກ່ພາກສ່ວນຄູຝຶກ ແລະນັກກິລາແຕ່ລະປະເພດທີ່ໄດ້ຮັບຫຼຽນຄໍາ, ຫຼຽນເງິນ ແລະຫຼຽນທອງພ້ອມທັງມີຄໍາເຫັນຊີ້ນໍາມາຍັງພະແນກສຶກສາທິການ ແລະກິລາແຂວງ, ສະຫະພັນກິລາປະເພດຕ່າງໆ, ຄູຝຶກ ແລະນັກກິລາ ຕ້ອງສືບຕໍ່ວາງແຜນຝຶກຊອບເຄື່ອນໄຫວທົດສອບເປັນໄລຍະຍາວ ຈຶ່ງສາມາດຍາດຫຼຽນຕ່າງໆໃຫ້ໄດ້ຫຼາຍຂຶ້ນກວ່າເກົ່າໃນງານແຂ່ງຂັນກິລາຄົນພິການແຫ່ງຊາດ ຄັ້ງທີ 4 ທີ່ນະຄອນຫຼວງວຽງຈັນ ຈະເປັນເຈົ້າພາບໃນທ້າຍປີ 2025 ໂດຍທີ່ແຕ່ລະສະຫະພັນ ຕ້ອງໄດ້ເພີ່ມຄວາມຮັບຜິດຊອບໃຫ້ສູງຂຶ້ນກວ່າເກົ່າເພື່ອພັດທະນາບຸກຄະລາກອນກິລາຂອງແຂວງຄໍາມ່ວນເຂົ້າຮ່ວມເປັນກໍາມະການ, ຄູຝຶກ ແລະ ນັກກິລາລະດັບຊາດກ້າວສູ່ສາກົນສູງຂຶ້ນເລື້ອຍໆ.

ພິເສດໃນຕອນທ້າຍຂອງພິທີສະມາຄົມກິລາ-ກາຍະກໍາແຂວງ ໄດ້ຕາງໜ້າໃຫ້ແກ່ຄູຝຶກ ແລະນັກກິລາມອບກະຕ່າຂອງຂວັນ ອວຍພອນປີໃໝ່ລາວ ພສ 2566 ໃຫ້ແກ່ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນອີກດ້ວຍ.

แชร์