ປີໃໝ່ລາວປີນີ້ ແຂວງອັດຕະປື ບໍ່ມີຄົນເສຍຊີວິດຈາກອຸບັດເຫດ

ຕາມການລາຍງານຈາກ ທ່ານ ຮອ ສົມໃຈ ນາມປະກາສິດ ຫົວໜ້າກອງສືບສວນ-ສອບສວນ ຄະດີອຸບັດເຫດ ປກສ ແຂວງອັດຕະປື ໃຫ້ສໍາພາດໃນວັນທີ 19 ເມສາ 2023 ນີ້ວ່າ: ໃນໄລຍະການສະເຫລີມສະຫລອງປີໃໝ່ລາວ 2023 ແຕ່ວັນທີ 12-16 ເມສາ 2023 ທົ່ວແຂວງອັດຕະປື ມີອຸບັດເຫດເກີດຂຶ້ນທັງໜົດ 19 ລາຍ. ໃນນີ້, ຢູ່ເມືອງສາມັກຄີໄຊ 9 ລາຍ, ເມືອງໄຊເສດຖາ 6 ລາຍ, ເມືອງພູວົງ, ເມືອງສະໜາມໄຊ ເມືອງລະ 2 ລາຍ ແລະ ສ່ວນເມືອງຊານໄຊ ແມ່ນບໍ່ມີອຸບັດເຫດເກີດຂຶ້ນ. ສໍາລັບອຸບັດເຫດທີ່ເກີດຂຶ້ນມີພາຫະນະເປ່ເພ 25 ຄັນ, ເປ້ເພສົມຄວນ 6 ຄັນ, ມີຄົນຮັບບາດເຈັບເລັກນ້ອຍ 25 ຄົນ, ບາດເຈັບສົມຄວນ 8 ຄົນ, ບາດເຈັບສາຫັດ 1 ຄົນ ແລະບໍ່ມີຜູ້ເສຍຊິວິດ. ລວມມູນຄ່າເສຍຫາຍ ທັງໝົດ 80 ລ້ານກວ່າກີບ. ສ່ວນສາເຫດຂອງການເກີດອຸບັດເຫດແມ່ນຍ້ອນນັກຂັບຂີ່ດື່ມສິ່ງມຶນເມົາ, ນັກຂັບຂີ້ບໍ່ເຄົາລົບກົດລະບຽບຈາລະຈອນ ເຊັ່ນ: ແລ່ນລົດໄວເກີນກຳນົດ, ສະພາບເຕັກນິກຂອງລົດບໍ່ຮັບປະກັນຄວາມປອດໄພ ແລະບັນຫາອື່ນໆ.

ທ່ານ ຮ້ອຍເອກ ສົມໃຈ ນາມປະກາສິດ ຍັງໃຫ້ຮູ້ອີກວ່າ: ອຸບັດເຫດທີ່ເກີດຈຶ້ນໃນປີນີ້, ຖ້າທຽບໃສ່ປີຜ່ານມາແມ່ນເພີ່ມຂຶ້ນ 8 ລາຍ, ແຕ່ທຽບໃສ່ການສູນເສຍກັບປີຜ່ານມາແມ່ນມີໜ້ອຍ, ທັງນີ້ກໍຍ້ອນເຈົ້າໜ້າທີ່ໄດ້ເຮັດໜ້າທີ່ການໂຄສະນາກ່ຽວກັບລະບຽບການສັນຈອນໃຫ້ນັກຂັບຂີ່ຕາມສາຍທາງ ແລະສະຖານທີ່ຕ່າງໆ, ພ້ອມທັງໄດ້ຕັ້ງຈຸດກວດກາ, ສຶກສາອົບຮົມກ່າວເຕືອນຕໍ່ຜູ້ທີລະເມີດ ແລະນຳໃຊ້ເຄື່ອງວິຊາສະເພາະ ເຊັ່ນ: ຈັບຄວາມໄວຂອງຍານພາຫະນະຕາມເສັ້ນທາງຫລວງແຫ່ງຊາດ ແລະ ເຄື່ອງກວດທາດເຫລົ້າ, ຖ້າພົບເຫັນຜູ້ລະເມີດແມ່ນໃຫ້ພັກຜ່ອນ ແລະແນະນຳໃຫ້ພີ່ນ້ອງມາຮັບເພື່ອລີກລ້ຽງການເກີດອຸບັດເຫດ .

ທ່ານ ຮ້ອຍເອກ ສົມໃຈ ນາມປະກາສິດ ຍັງໄດ້ຝາກເຖິງທົ່ວສັງຄົມບໍ່ວ່າຈະຢູ່ໃນເທສະການໃດໆກໍຕາມເວລາໃຊ້ລົດໃຊ້ຖະໜົນ, ນັກຂັບຂີ່ທຸກຄົນໃຫ້ເອົາໃຈໃສ່ປະຕິບັດກົດລະບຽບການສັນຈອນຢ່າງເຂັ້ມງວດ, ຂັບຂີ່ຕ້ອງໃຫ້ກຽດເຊິ່ງກັນ ແລະກັນ, ຫ້າມດື່ມສິ່ງມຶນເມົາແລ້ວຂັບຂີ່ລົດ ແລະກວດເຊັກສະພາບເຕັກນິກລົດກ່ອນອອກເດີນທາງ ເພື່ອລີກລ້ຽງການເກີດອຸບັດເຫດຕາມທ້ອງຖະໜົນ.
ຂ່າວ: ວັດທະນາ

แชร์