ປິດບັ້ນຝຶກອົບຮົມທິດສະດີການເມືອງ - ການປົກຄອງໄລຍະສັ້ນ

ໃນວັນທີ 7 ເມສານີ້ ທີ່ສານປະຊາຊົນສູງສຸດຈັດພິທີປິດບັ້ນຝຶກອົບຮົມທິດສະດີການເມືອງ - ການປົກຄອງ ໄລຍະສັ້ນ 45 ວັນ ຊຸດທີ VI ປະຈຳປີ 2023 ໃຫ້ແກ່ພະນັກງານຫຼັກແຫຼ່ງຂອງສານປະຊາຊົນ, ອົງການກວດສອບແຫ່ງລັດ ແລະກະຊວງການເງິນ ມີຈຳນວນ 87 ທ່ານ ຍິງ 26 ທ່ານ, ພາຍໃຕ້ການເປັນປະທານຂອງ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກປະທານສານປະຊາຊົນສູງສຸດຊຶ່ງມີທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ,ທ່ານນາງ ບຸນມີ ຈູນລະຈັກ ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດພ້ອມດ້ວຍນັກຝຶກອົບຮົມເຂົ້າຮ່ວມ.

ໂອກາດນີ້, ທ່ານ ກັ້ງ ເຕັມສົມບັດ ຫົວໜ້າສະຖາບັນຄົ້ນຄວ້າ ແລະຝຶກອົບຮົມສານປະຊາຊົນສູງສຸດໄດ້ລາຍງານວ່າ: ການຝຶກອົບຮົມຄັ້ງນີ້ແມ່ນເລັ່ງໃສ່ຍົກລະດັບຄວາມຮູ້ທາງດ້ານທິດສະດີການເມືອງ-ການປົກຄອງ ໃຫ້ແກ່ພະນັກງານຂອງສານປະຊາຊົນໃນຂອບເຂດທົ່ວປະເທດ ໃຫ້ມີຄຸນທາດການເມືອງໜັກແໜ້ນ, ມີຄວາມຮູ້, ຄວາມເຂົ້າໃຈ ແລະ ເຊື່ອມຊຶມຕໍ່ແນວທາງຂອງພັກ, ແຜນພັດທະນາເສດຖະກິດຂອງສັງຄົມຂອງລັດ, ເຫັນໄດ້ມູນເຊື້ອການຊີ້ນໍາ-ນໍາພາຂອງພັກ, ມີທັດສະນະຫຼັກໝັ້ນ, ສາມາດກໍາໄດ້ທິດສະດີມາກ-ເລນິນ, ມີຄຸນສົມບັດສິນທໍາປະຕິວັດ, ມີຈັນຍາບັນ-ຈັນຍາທໍາ ເພື່ອນໍາເອົາທິດສະດີທີ່ໄດ້ຮຽນໄປຜັນຂະຫຍາຍ ແລະໝູນໃຊ້ເຂົ້າໃນວຽກງານຕົວຈິງໃຫ້ມີໝາກຜົນໃນຕໍ່ໜ້າ.

ເນື້ອໃນການຝຶກອົບຮົມແມ່ນປະຕິບັດຕາມຫຼັກສູດຂອງສະຖາບັນການເມືອງ ແລະການປົກຄອງແຫ່ງຊາດຊຶ່ງປະກອບມີ 5 ພາກວິຊາຄື: ພາກວິຊາປັດຊະຍາ ມີທັງໝົດ 6 ບົດ, ພາກວິຊາ ເສດຖະສາດການເມືອງ ມີທັງໝົດ 8 ບົດ, ພາກລັດທິສັງຄົມນິຍົມວິທະຍາສາດ ມີທັງໝົດ 6 ບົດ, ພາກວິຊາບໍລິຫານສາດ ມີທັງໝົດ 8 ບົດ ແລະ ພາກວິຊາກໍ່ສ້າງພັກມີທັງໝົດ 5 ບົດ. ນອກນັ້ນ, ຍັງໄດ້ສຸມໃສ່ຍົກສູງຄຸນທາດການເມືອງໂດຍໄດ້ຈັດການປາຖະກະຖາກ່ຽວກັບຈັນຍາບັນ-ຈັນຍາທໍາຂອງພະນັກງານ-ຜູ້ພິພາກສາ.

ຜົນທີ່ໄດ້ຮັບຈາກການຝຶກອົບຮົມ: ນັກຝຶກອົບຮົມສາມາດຮັບຮູ້ໄດ້ເຖິງວິວັດທະນາການສັງຄົມໃນແຕ່ລະລະບອບຂອງການເຕີບໃຫຍ່ຂະຫຍາຍຕົວ, ນັກຝຶກອົບຮົມສາມາດກຳໄດ້ບັນດາທິດສະດີທີ່ສໍາຄັນ ເຊັ່ນ: 2 ຫຼັກມູນ, 3 ກົດເກນ, 6 ຄູ່ມາດຕະເກນ ເພື່ອຈະໄດ້ ນໍາໄປຜັນຂະຫຍາຍເຂົ້າໃນການປະຕິບັດໜ້າທີ່ວຽກງານຕົວຈິງ ແລະນັກຝຶກອົບຮົມສາມາດຮັບຮູ້ ແລະກໍາແໜ້ນແນວທາງນະໂຍບາຍຂອງພັກໂດຍສະເພາະກໍແມ່ນ 5 ຫຼັກການ, 3 ທິດຊີ້ນຳຂອງພັກເຮົາ.

ໃນໂອກາດດັ່ງກ່າວ ທ່ານ ນາງ ວຽງທອງ ສີພັນດອນ ໄດ້ໃຫ້ກຽດໂອ້ລົມໃຫ້ທິດແກ່ຜູ້ທີ່ສຳເລັດຊຸດຝຶກຮົມຮົບກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຜົນສຳເລັດຂອງຊຸດຝຶກອົບຮົມໃນຄັ້ງນີ້ ແຕ່ຍັງມີຂໍ້ຄົງຄ້າງຈຳນວນໜຶ່ງທີ່ຈະຕ້ອງໄດ້ປັບປຸງແກ້ໄຂເພື່ອເຮັດໃຫ້ການຈັດຝຶກອົບຮົມໃນຄັ້ງຕໍ່ໄປໄດ້ຮັບຜົນດີກວ່າເກົ່າຈຶ່ງມີບາງຄວາມເຫັນ ເພື່ອເປັນທິດທາງນໍາໄປຄົ້ນຄວ້າຜັນຂະຫຍາຍເຂົ້າໃນວຽກງານຕົວຈິງດັ່ງນີ້: ສືບຕໍ່ຢຶດໝັ້ນ ແລະໝູນໃຊ້ທິດທະດີ ມາກ-ເລນິນ ຢ່າງປະດິດສ້າງ, ສອດຄ່ອງກັບສະພາບຈຸດພິເສດຂອງປະເທດເຮົາ ຕິດພັນກັບການຄົ້ນຄວ້າຜັນຂະຫຍາຍແນວຄິດ ໄກສອນ ພົມວິຫານ, ສືບທອດ ແລະ ເສີມຂະຫຍາຍມູນເຊື້ອອັນດີງາມຂອງພັກ, ບູລະນະແນວ ທາງ, ແຜນນະໂຍບາຍຂອງພັກ ໃຫ້ສອດຄ່ອງກັບເງື່ອນໄຂໃໝ່, ຮັບປະກັນຄວາມເປັນເອກະພາບ ນໍາພາເປັນໝູ່ຄະນະ, ພາວະວິໄສ, ໂປ່ງໃສ, ຖືກຕ້ອງຕາມຂໍ້ມູນຫຼັກຖານ ແລະ ກົດໝາຍກໍານົດໄວ້ ຈຶ່ງຈະເຮັດໃຫ້ຄູ່ຄວາມຍອມຮັບຕໍ່ການຕັດສິນ, ພິພາກສາຂອງສານ, ຍອມຮັບ ແລະເຊື່ອຖືຕໍ່ສະຖາບັນຕຸລາການ; ໃຫ້ເອົາໃຈໃສ່ຖືວຽກງານການເມືອງ-ແນວຄິດ ເປັນສະໜາມຮົບແຖວໜ້າອັນດັບໜຶ່ງ; ສືບຕໍ່ຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານທີ່ມີຄຸນທາດການເມືອງທີ່ໜັກແໜ້ນ, ຄຸນສົມບັດສິນທໍາປະຕິວັດ, ເປັນແບບຢ່າງທີ່ດີໃຫ້ແກ່ມະຫາຊົນ ແລະ ເຊີດຊູຄວາມເປັນແບບຢ່າງໃນການດໍາລົງຊີວິດປອດໃສ ຂາວສະອາດ, ປະຢັດ, ຕ້ານການຟຸ່ມເຟືອຍ, ເປັນແບບຢ່າງໃນການປະຕິບັດລະບຽບຂອງພັກ, ກົດໝາຍ ແລະລະບຽບການຕ່າງໆ; ເອົາໃຈໃສ່ສຶກສາອົບຮົມ, ຄຸ້ມຄອງຄອບຄົວ, ຍາດຕິພີ່ນ້ອງ ໃຫ້ເປັນແບບຢ່າງໃນການດໍາລົງຊີວິດທີ່ກ້າວໜ້າ, ບໍ່ໃຫ້ເຮັດໃນສິ່ງທີ່ເສຍຫາຍໃນວຽກງານອັນລວມ ໄປສູ່ຜົນປະໂຫຍດສ່ວນຕົວຄອບຄົວ, ຕ້ານປະກົດການຫຍໍ້ທໍ້ຕ່າງໆ ໃນການລ່ວງລະເມີດກົດໝາຍ; ຕ້ອງຢຶດຖືຈັນຍາບັນ-ຈັນຍາທຳ ຢ່າງເຄັ່ງຄັດ ໂດຍຖືເອົາຈັນຍາທຳທາງດ້ານໜ້າທີ່ເປັນຫຼັກໃນການປະຕິບັດໜ້າທີ່ວຽກງານ, ຖືເອົາປະຊາຊົນເປັນໃຈກາງ, ຈິງໃຈຮັບໃຊ້ປະຊາຊົນປະຕິບັດຕາມຄຳຂວັນທີ່ວ່າ: ພັກເຮົາແມ່ນມາຈາກປະຊາຊົນໂດຍປະຊາຊົນ ແລະຮັບໃຊ້ປະຊາຊົນຢ່າງບໍລິສຸດໃຈໂດຍບໍ່ມີເງື່ອນໄຂໃດໆ.
ທີ່ມາ: ຂ່າວ: ອານຸພົນ

แชร์