ລາວ-ໄທ ເພີ່ມທະວີການຮ່ວມມືດ້ານພຸດທະສາສະໜາ

ໃນວັນທີ 4 ເມສາທີ່ຜ່ານມາ, ທ່ານ ຄະນອງລິດ ສີສົມບູນ ຫົວໜ້າກົມສາສະໜາສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າພົບປະຢ້ຽມຢາມຂອງ ທ່ານ ອິນພອນ ຈັ່ນອ່ຽມ ຮັກສາການ ຜູ້ອໍານວຍການສໍານັກງານພະພຸດທະສາສະໜາແຫ່ງ ຣາຊະອານາຈັກໄທ ພ້ອມດ້ວຍຄະນະ, ມີທ່ານເອກອັກຄະຣາຊະທູດ ແຫ່ງຣາຊະອານາຈັກໄທ ປະຈຳ ສປປ ລາວ ແລະພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.

ການພົບປະຄັ້ງນີ້, ເພື່ອເປັນການສົ່ງເສີມພຸດທະສາສະໜາຂອງຊາວພຸດລະຫວ່າງ ລາວ-ໄທ ໂດຍໄດ້ແລກປ່ຽນບົດຮຽນການຄຸ້ມຄອງສາສະໜາໃຫ້ຢູ່ພາຍໃຕ້ລະບຽບກົດໝາຍ ແລະການໄປມາຫາສູ່ກັນຂອງພະສົງ, ສາມະເນນ ລາວ ແລະໄທ ໃຫ້ໄປຕາມລະບຽບຂັ້ນຕອນ. ຕະຫລອດໄລຍະຜ່ານມາໄດ້ແລກປ່ຽນຄະນະຢ້ຽມຢາມ ເຊິ່ງກັນ ແລະກັນ ລະຫວ່າງສຳນັກງານພະພຸດທະສາສະໜາແຫ່ງຊາດ ຣາຊະອານາຈັກໄທ ແລະ ຄະນະຜູ້ແທນກົມສາສະໜາ ສນຊ ໃນໄລຍະຜ່ານມາໄດ້ສ້າງເງື່ອນໄຂໃຫ້ທັງສອງຝ່າຍໄດ້ຮັດແໜ້ນການຮ່ວມມືກັນແບບເພື່ອນມິດເພື່ອຮ່ວມມືໃນການຊຸກຍູ້ສົ່ງເສີມວຽກງານດ້ານພຸດທະສາສະໜາໃຫ້ມີຄວາມເຂັ້ມແຂງ ແລະຈະເລີນຮຸ່ງເຮືອງສືບຕໍ່ໄປ.

ໂອກາດນີ້, ໄດ້ມີພິທີເຊັນບົດບັນທຶກຊ່ວຍຈໍາຮ່ວມມືດ້ານພະພຸດທະສາສະໜາລະຫວ່າງສຳນັກງານພະພຸດທະສາສະໜາແຫ່ງຊາດ ຣາຊະອານາຈັກໄທ ແລະ ກົມສາສະໜາສູນກາງແນວລາວສ້າງຊາດໂດຍເປັນກຽດເຂົ້າຮ່ວມຂອງ ທ່ານ ຄໍາໄຫລ ສີປະເສີດ ຮອງປະທານ ຜູ້ປະຈໍາການ ສນຊ ຊຶ່ງເນື້ອໃນບົດບັນທຶກຊ່ວຍຈໍາສອງຝ່າຍມີດັ່ງນີ້: ສອງຝ່າຍຈະສົ່ງເສີມ ແລະສະໜັບສະໜູນໃຫ້ເກີດການມີສ່ວນຮ່ວມໃນເວທີການປະຊຸມ, ສຳມະນາ, ການປຶກສາຫາລື, ການເຈລະຈາຕ່າງໆ ດ້ານພະພຸດທະສາສະໜາໃຫ້ແກ່ຜູ້ແທນ; ສອງຝ່າຍຈະຜັດປ່ຽນເດີນທາງໄປຢ້ຽມຢາມ ແລະເຮັດວຽກຮ່ວມກັນຢ່າງໜ້ອຍປີລະໜຶ່ງຄັ້ງເພື່ອແລກປ່ຽນບົດຮຽນ ແລະທັດສະນະສຶກສາ ໃຫ້ເກີດການຮຽນຮູ້ ແລະພັດທະນາກິດຈະການງານດ້ານພຸດທະສາສະໜາເພື່ອເສີມສ້າງຄວາມສຳພັນອັນດີງາມລະຫວ່າງສອງປະເທດໃຫ້ເປັນປົກກະຕິ, ເພື່ອໃຫ້ການຮ່ວມມືດ້ານພຸດທະສາສະໜາໃນລະດັບທະວິພາຄີ ແລະສາກົນອັນກໍ່ໃຫ້ເກີດປະໂຫຍດຮ່ວມກັນທັງສອງປະເທດ.
ທີ່ມາ: ຂ່າວ-ພາບ: ສຸວັນລີ

• 06/04/2023