ກາເຟດາວ ຕັ້ງເປົ້າປີນີ້ 400 ຕື້ກີບ ແລະເພີ່່ມເງິນເດືອນພະນັກງານ

ເຖິງວ່າຈະພົບອຸປະສັກ ແລະສີ່ງທ້າທາຍຫຼາຍຢ່າງກໍ່ຕາມ ແຕ່ຄະນະບໍລິຫານງານຂອງບໍລິສັດຍັກໃຫຍ່ ໃນການຜະລິດກາເຟລາວ ຢ່າງບໍລິສັດກາເຟດາວ ຈໍາກັດ ຈະສູ້ຊົນຢ່າງສຸດຄວາມສາມາດເພື່ອຂັບເຄື່ອນການຜະລິດ ແລະການຈໍາໜ່າຍທັງພາຍໃນ ແລະຕ່າງປະເທດເພີ່ມຂຶ້ນບັນລຸເປົ້າໝາຍ 400 ຕື້ກີບ ໃນສົກ ປີ 2023 ແລະປະຈຸບັນສ້າງມາດຖານຢັ້ງຢືນການເປັນໂຮງງານອຸດສາຫະກໍາ ແລະພ້ອມດ້ວຍການຂຶ້ນເງິນເດືອນແກ່ພະນັກງານແກ້ໄຂຊີວິດການເປັນຢູ່.

ທ່ານ ວັນນະດາ ພົມມະສະຖິດ ຜູ້ອໍານວຍການໃຫຍ່ ບໍລິສັດກາ ເຟດາວ ຈໍາກັດ, ໄດ້ໃຫ້ສໍາພາດຕໍ່ນັກຂ່າວໜັງສືພິມເສດຖະກິດ-ສັງຄົມ ປະຈໍາແຂວງເມື່ອບໍ່ດົນມານີ້ວ່າ: ສໍາລັບການຈັດຕັ້ງປະຕະບັດແຜນການຜະລິດ ແລະຈໍາໜ່າຍກາເຟດາວ ໃນປີ 2022 ຜ່ານມາພວກ ເຮົາໄດ້ວາງຄາດໝາຍສູ້ຊົນຍອດຂາຍທັງພາຍໃນ ແລະຕ່າງປະ ເທດໄວ້ທີ 300 ຕື້ກີບ, ຜ່ານການຈັດຕັ້ງປະຕິບັດຕົວຈິງແມ່ນເກີນຄາດໝາຍທີ່ວາງໄວຄືສາມາດສ້າງລາຍຮັບໄດ້ທັງໝົດ 305 ຕື້ກີບ, ສໍາລັບໃນສົກປີ 2023 ນີ້ ພວກເຮົາໄດ້ວາງຄາດໝາຍໄວ້ 400 ຕື້ກີບ, ຊຶ່ງຖືວ່າເປັນຕົວເລກທີ່ສູງພໍສົມຄວນ ແລະ ການທີ່ຈະບັນລຸໄດ້ນັ້ນມັນກໍ່ຕ້ອງມີຫຼາຍປັດໄຈ, ເປັນຕົ້ນແມ່ນການເຂົ້າຫາ ແຫຼ່ງທຶນ, ຊຶ່ງປະຈຸບັນພັກ-ລັດຖະບານເພີ່ນກໍ່ໄດ້ເອົາໃຈໃສ່ໃນການສະໜອງທຶນ ແລະຄາດວ່າພວກເຮົາຈະໄດ້ຮັບແຫຼ່ງທຶນກູ້ຢຶມຈາກລັດຖະບານ, ໂດຍສະເພາະແມ່ນກະຊວງການເງິນຈະສະໜັບສະໜູນເຮັດໃຫ້ພວກເຮົາສາມາດເຂົ້າເຖິງແຫຼ່ງທຶນໄດ້ຫຼາຍຂຶ້ນ, ອີກດ້ານໜຶ່ງຕະຫຼາດຍີ່ປຸ່ນພວກເຮົາກໍ່ໄດ້ເລີ່ມສົ່ງອອກແຕ່ທ້າຍປີ 2022 ແລະປີນີ້ຄາດວ່າຈະໄດ້ດໍາເນີນການສົ່ງອອກເປັນປົກຄະຕິ, ເນື່ອງຈາກວ່າຕະຫຼາດຍີ່ປຸ່ນໄດ້ ຮັບຮອງເອົາກາເຟດາວ ເປັນທີ່ຮຽບຮ້ອຍແລ້ວ ແລະພວກເຮົາຄິດວ່າຈະໄດ້ສົ່ງຂາຍໄປໄດ້ໃນທົ່ວໂລກ, ທ່ານອະທິບາຍວ່າ: ການສົ່ງກາເຟອອກໄປປະເທດຍີ່ປຸ່ນນັ້ນແມ່ນໄດ້ໃຊ້ເວລາ 6 ເດືອນໃນການປະສານງານຕິດຕໍ່ໃນການນໍາເຂົ້າ, ໂດຍສະເພາະແມ່ນປະເພດອາຫານເຂົາເຈົ້າຈະມີຄວາມເຂັ້ມງວດຫຼາຍແຕ່ພວກເຮົາກໍ່ສາມາດຜ່ານຜ່າ ແລະສົ່ງຂາຍທາງອອນລາຍໄດ້.

ທ່ານຜູ້ອໍານວຍການໃຫ້ຮູ້ຕື່ມວ່າ: ປະຈຸບັນຕະຫຼາດຈີນ ເລີ່ມເກີດຂຶ້ນຫຼາຍ ແລະ ນັບມື້ໃຫ້ຄວາມສົນໃຈຕໍ່ຜະລິດຕະພັນກະເຟດາວຫຼາຍຂຶ້ນ, ຊຶ່ງໃນ 3 ເດືອນຕົ້ນປີ 2023 ຜ່ານມານີ້ພວກເຮົາໄດ້ຮັບອໍເດີ້ 3 ຕູ້ຄອນເທເນີ ແລະຈະມີການສົ່ງອອກພາຍຫຼັງປີໃໝ່ລາວແລ້ວ, ນອກນີ້ກາເຟດາວໄດ້ມີຄູ່ຮ່ວມຍຸດທະສາດດ້ານທຸລະກິດຄື: ກຸ່ມ ບໍລິສັດໂຊກໄຊ ທີ່ຈະເຂົ້າມາຊ່ວຍທັງການເພີ່ມການຂາຍ ແລະເຂົ້າມາເຮັດ OEM ໃນນາມແບຣນ ຂອງບໍລິສັດໂຊກໄຊເອງນໍາ.

ນີ້ແມ່ນເວົ້າສະເພາະຜະລິດຕະພັນໂດຍລວມແຕ່ຄວາມຈິງໃນການຟື້ນຟູຂັບເຄື່ອນກາເຟດາວພວກເຮົາສາມາດເປີດຕະຫຼາດຂາຍເປັນກາເຟຜົງຕື່ມທີ່ຈະສາມາດສ້າງລາຍຮັບໃຫ້ພວກເຮົາເພີ່ມຂື້ນອີກ ແລະ ພວກເຮົາຍັງມີຄວາມສາມາດຂົ້ວກາເຟໄດ້ຕື່ມເພາະໃນປະຈຸບັນພວກເຮົາຂົ້ວພຽງແຕ່ 50%, ສະນັ້ນຕ້ອງໄດ້ເພີ່ມກໍາລັງຂົ້ວກາເຟສູງຂຶ້ນເພື່ອສະໜອງໃຫ້ບັນດາຮ້ານຂາຍກາເຟໃຫຍ່ໆໃນທົ່ວປະເທດ.

ດ້ານວັດຖຸດີບທ່ານ ວັນນະດາ ພົມມະສະຖິດ ຢໍ້າວ່າ: ປະຈຸບັນເຫັນວ່າຍັງມີພຽງພໍໃຫ້ແກ່ການຜະລິດເນື່ອງຈາກການເກັບຊື້ຫຼັກໆແມ່ນນໍາກຸ່ມບໍລິສັດດາວເຮືອງ, ຊຶ່ງເປັນບໍລິສັດທີ່ມີກາເຟ ສະຕ໊ອກໄວ້ຫຼາຍຢູ່ແລ້ວ, ນອກນີ້ຍັງມີແຜນເປີດການປະມູນບໍລິ ສັດທີ່ເກັບຊື້ກາເຟພາຍໃນແຂວງທີ່ສາມາດຜ່ານລະບຽບ, ມາດຖານຂອງບໍລິສັດ ແລະກ້າວເຂົ້າສູ່ການຄູ່ຮ່ວມພັດທະນາ, ປະຈຸບັນເຖິງວ່າພວກເຮົາຈະໄດ້ຮັບຜົນກະທົບຈາກບັນຫາໄພເງິນເຟີ້, ຄ່າຄອງຊີບສູງ ແລະບັນຫາອື່ນໆ... ແຕ່ພວກເຮົາກໍ່ມີຄວາມໝັ້ນໃຈຈະສາມາດສ້າງລາຍຮັບໃຫ້ໄດ້ຕາມເປົ້າໝາຍທີ່ວາງໄວ້, ພິເສດທາງບໍລິສັດຍັງໄດ້ເພີ່ມເງິນເດືອນໃຫ້ແກ່ພະນັກງານອີກເພື່ອແກ້ໄຂຊີວິດການເປັນຢູ່ໃນແຕ່ລະວັນກັບສະພາບເສດຖະກິດຝຶດເຄືອງຄືໃນປະຈຸບັນ.

ໂດຍ: ໂພທິຣາຊ 

แชร์