ໂຮງຮຽນການເມືອງ ແລະການປົກຄອງແຂວງຄໍາມ່ວນ ເປີດຊຸດຮຽນທິດສະດີການເມືອງ ຂັ້ນກາງ ຮຸ່ນທີ I

ໂດຍປະຕິບັດຕາມຂໍ້ຕົກລົງ ຂອງສະຖາບັນການເມືອງ ແລະການປົກຄອງແຫ່ງຊາດວ່າດ້ວຍການອະນຸມັດເປີດຊຸດຮຽນທິດສະດີການເມືອງ ຂັ້ນກາງ ຮຸ່ນທີ I ຢູ່ໂຮງຮຽນການເມືອງ ແລະການປົກຄອງແຂວງຄຳມ່ວນ ວັນທີ 6 ເມສາ 2023 ໂຮງຮຽນການເມືອງ ແລະ ການປົກຄອງ ແຂວງຄໍາມ່ວນ ໄດ້ເປີດຊຸດຮຽນທິດສະດີການເມືອງ ຂັ້ນກາງ ລະບົບ 6 ເດືອນ ຮຸ່ນທີ I ໂດຍການເຂົ້າຮ່ວມຂອງທ່ານ ປ.ອ ດາວສະຫວັນ ເຄືອມີໄຊ ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດ, ທ່ານ ສົມພົງ ວັນໄພທອງ ຫົວໜ້າຄະນະໂຄສະນາອົບຮົມແຂວງຄຳມ່ວນ, ມີບັນດາຄະນະຄູ-ອາຈານ, ແຂກຖືກເຊີນຕະຫຼອດເຖິງນັກສຶກສາເຂົ້າຮ່ວມ.

ທ່ານ ແກ້ວວັນໄຊ ສຸກແສນທອງ ຫົວໜ້າໂຮງຮຽນການເມືອງ ແລະການປົກຄອງ ແຂວງຄຳມ່ວນ ໄດ້ຜ່ານແຜນການຮຽນ-ການສອນ ທິດສະດີການເມືອງ ຂັ້ນກາງ ລະບົບ 6 ເດືອນ ສົກປີ 2023 ເພື່ອຕອບສະໜອງກັບຄວາມຮຽກຮ້ອງຕ້ອງການ ໃນພາລະກິດປ່ຽນແປງໃໝ່ຂອງພັກເຮົາ ໃນປະຈຸບັນ, ສະເພາະໜ້າ ແລະ ຍາວນານ ໂດຍສະເພາະແຜນການພັດທະນາຊັບພະຍາກອນມະນຸດຢູ່ຂັ້ນທ້ອງຖິ່ນ, ເພື່ອບຳລຸງທິດສະດີການເມືອງໃຫ້ແກ່ພະນັກງານນໍາພາ-ຄຸ້ມຄອງ, ນາຍທະຫານ ແລະ ນາຍຕໍາຫຼວດຢູ່ອົງການຈັດຕັ້ງພັກ-ລັດ ແລະ ອົງການຈັດຕັ້ງມະຫາຊົນຂັ້ນທ້ອງຖິ່ນ, ຍົກລະດັບຄວາມຮູ້, ຄວາມສາມາດດ້ານທິດສະດີການເມືອງ, ແນວຄິດໄກສອນ ພົມວິຫານ, ແນວທາງຂອງພັກ, ນະໂຍບາຍການຄຸ້ມຄອງຂອງລັດ, ເຮັດໃຫ້ພະນັກງານມີແນວຄິດຫຼັກໝັ້ນ, ເຊື່ອໝັ້ນຕໍ່ການນໍາພາຂອງພັກ, ເຊື່ອໝັ້ນຕໍ່ອຸດົມການກໍ່ຄືພາລະກິດປ່ຽນແປງໃໝ່ຢ່າງມີຫຼັກການຂອງພັກ, ສ້າງພະນັກງານນໍາພາ-ຄຸ້ມຄອງ ຢູ່ທ້ອງຖິ່ນ ໃຫ້ມີຄຸນທາດການເມືອງທີ່ໜັກແໜ້ນ, ມີລະດັບຄວາມສາມາດໃນການຄຸ້ມຄອງ ແລະປະຕິບັດຕາມແນວທາງນະໂຍບາຍຂອງພັກໃຫ້ປະກົດຜົນເປັນຈິງ,ສ້າງພະນັກງານນຳພາ-ຄຸ້ມຄອງ ໃຫ້ມີຄວາມຮູ້ທາງດ້ານທິດສະດີ ແລະ ພຶດຕິກຳຕົວຈິງ ແລະ ນໍາໃຊ້ຄວາມຮູ້ດັ່ງກ່າວ ນໍາໃຊ້ເຂົ້າໃນວຽກງານທີ່ຕົນຮັບຜິດຊອບ ໃຫ້ມີປະສິດທິພາບສູງຂຶ້ນ. ເຊິ່ງໃນຊຸດຮຽນທິດສະດີການເມືອງ ຂັ້ນກາງ ຮຸ່ນທີ I ຂອງໂຮງຮຽນການເມືອງ ແລະ ການປົກຄອງແຂວງຄໍາມ່ວນ ສົກປີ 2023 ປະກອບມີນັກສຶກສາຈຳນວນທັງໝົດ 60 ຄົນ, ຍິງ 12 ຄົນ ໂດຍຈະໃຊ້ເວລາໃນການຮຽນທັງໝົດ 6 ເດືອນ ຫຼື 29 ອາທິດ, ປະກອບມີກຸ່ມວິຊາປັດຊະຍາ ແລະວັດທະນະທຳ, ກຸ່ມວິຊາ ເສດຖະສາດມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາສາດ, ແນວຄິດ ໄກສອນ ພົມວິຫານ, ກຸ່ມວິຊາພື້ນຖານການຄຸ້ມຄອງບໍລິຫານລັດ, ກຸ່ມວິຊາປະຫວັດສາດພັກ ແລະ ກໍ່ສ້າງພັກ, ກຸ່ມວິຊາບັງຄັບ ແລະ ຫົວຂໍ້ລາຍງານເພີ່ມ ແລະ ການຂຽນບົດລາຍງານຈົບຂັ້ນ. ເນື່ອງໃນໂອກາດເປີດການຮຽນ-ການສອນ ຄັ້ງນີ້ພະນັກງານຄູ-ອາຈານ ພ້ອມດ້ວຍນັກສຶກສາຍັງໄດ້ຮ່ວມວາງກະຕ່າດອກໄມ້ ຢູ່ທີ່ອະນຸສອນສະຖານ ປະທານ ໄກສອນ ພົມວິຫານ ເພື່ອສະແດງເຖິງຄວາມເຄົາລົບຮັກ ແລະຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ ຂອງທ່ານ ປະທານ ໄກສອມ ພົມວິຫານ.

ພາບ-ຂ່າວ: ກອງຄຳ

 

แชร์