ນາຍົກ ລາວ-ຫວຽດນາມ ພົບປະສອງຝ່າຍ

ໃນວັນທີ 5 ເມສາ 2023 ທີ່ສໍານັກງານນາຍົກລັດຖະມົນຕີ ນະຄອນຫຼວງວຽງຈັນ, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະສອງຝ່າຍ ກັບ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ, ໃນໂອກາດທີ່ສະຫາຍພ້ອມຄະນະເດີນທາງມາເຂົ້າຮ່ວມກອງປະຊຸມສຸດຍອດຄະນະກໍາມາທິການແມ່ນໍ້າຂອງສາກົນ ຄັ້ງທີ 4 ຢູ່ ນະຄອນຫຼວງວຽງຈັນ.

ໃນໂອກາດນີ້, ສະຫາຍ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະສະແດງຄວາມດີໃຈ ທີ່ໄດ້ພົບປະ ກັບ ສະຫາຍ ນາຍົກລັດຖະມົນຕີ ຟ້າມ ມິງ ຈິງ ອີກຄັ້ງ ພ້ອມທັງສະແດງຄວາມຊົມເຊີຍຕໍ່ຜົນສໍາເລັດຂອງການຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ນາຍົກລັດຖະມົນຕີ ຫວຽດນາມ ແລະຄະນະໃນເດືອນມັງກອນ 2023 ຜ່ານມາ. ສອງຝ່າຍໄດ້ທົບທວນຄືນຜົນການຢ້ຽມຢາມໃນເດືອນມັງກອນຜ່ານມາ ແລະເຫັນດີສືບຕໍ່ຊຸກຍູ້, ຈັດຕັ້ງຜັນຂະຫຍາຍບັນດາສັນຍາ ແລະ ຂໍ້ຕົກລົງຕ່າງໆຂອງສອງລັດຖະບານ ລາວ - ຫວຽດນາມ ທີ່ໄດ້ລົງນາມຮ່ວມກັນ ນກອງປະຊຸມ ຄັ້ງທີ 45 ກໍຄື ເນື້ອໃນບົດບັນທຶກ ແລະແຜນການຮ່ວມມື ປະຈໍາປີ 2023 ໃຫ້ປະກົດຜົນເປັນຈິງ, ພ້ອມທັງສືບຕໍ່ຊຸກຍູ້ບັນດາໂຄງການຮ່ວມມື ແລະໂຄງການລົງທຶນຕ່າງໆ ໃຫ້ສໍາເລັດຕາມແຜນການທີ່ກໍານົດໄວ້.

ໃນໂອກາດດຽວກັນ, ສະຫາຍ ຟ້າມ ມິງ ຈິງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນພ້ອມທັງສະແດງຄວາມຊົມເຊີຍຕໍ່ການເປັນເຈົ້າພາບຈັດກອງປະຊຸມສຸດຍອດຄະນະກໍາມາທິການແມ່ນໍ້າຂອງສາກົນ ຄັ້ງທີ 4 ທີ່ໄດ້ຮັບຜົນສໍາເລັດຢ່າງຈົບງາມ.

ໃນຕອນທ້າຍ, ສອງຝ່າຍໄດ້ອວຍພອນໄຊອັນປະເສີດຊຶ່ງກັນ ແລະກັນເນື່ອງໃນໂອກາດປີໃໝ່ລາວທີ່ຈະມາເຖິງນີ້, ທັງອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.
ທີ່ມາ: ຂ່າວ: ກົມການຂ່າວ ກະຊວງການຕ່າງປະເທດ

• 06/04/2023