ເຊັນ MOU ຮ່ວມທຸລະກິດ ແລະກິດຈະການຮ່ວມການຄ້າ

ພິທີເຊັນສັນຍາ MOU ລະຫວ່າງສະມາຄົມນັກທຸລະກິດໜຸ່ມ ເມືອງຈັນທະບູລີ ຕາງໜ້າໂດຍ ບໍລິສັດ ເດີພາວເວີອັອຟໄລຟ, ບໍລິສັດ ມີດີ 998 ລາວ ກັບ ບໍສິສັດ ມີດີ 998 ປະເທດໄທ ໄດ້ຈັດຂຶ້ນໃນວັນທີ 3 ເມສານີ້ທີ່ບ້ານໜອງທາເໜືອ ເມືອງຈັນທະບູລີ ນະຄອນຫຼວງວຽງຈັນ, ໂດຍການເຂົ້າຮ່ວມຂອງ ທ່ານ ດວງຕາ ສຸລິວົງ ເຈົ້າເມືອງຈັນທະບູລີ, ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກຜູ້ອໍານວຍການໃຫຍ່ໜັງສືພິມປະຊາຊົນ, ທ່ານພັນເອກ ພູເຂົາ ທະນູທອງ ຫົວໜ້າສະຖາບັນການຢາ-ການແພດຢາພື້ນເມືອງກອງທັບ, ມີບັນດາແຂກຖືກເຊີນເຂົ້າຮ່ວມ.

ທ່ານ ຕາມ໋ອງ ປະທານສະມາຄົມ ນັກທຸລະກິດໜຸ່ມເມືອງຈັນທະບູລີ ໄດ້ກ່າວວ່າ: ສະມາຄົມນັກທຸລະກິດ ໜຸ່ມເມືອງຈັນທະບູລີ, ພາຍໃຕ້ການຊີ້ນໍາ-ນໍາພາ ຂອງເມືອງກໍຄືຄະນະຊາວໜຸ່ມເມືອງ ໄດ້ວາງແຜນໃນການສົ່ງເສີມສະມາຊິກ ຊາວໜຸ່ມ - ໄວໜຸ່ມ ພາຍໃນເມືອງຈັນທະບູລີຕໍ່ຜູ້ວ່າງງານເພື່ອຈັດຝຶກອົບຮົມສ້າງວິຊາຊີບໃຫ້ກະເຈົ້າໄດ້ມີວຽກເຮັດງານທໍາທີ່ດີສາມາດສ້າງລາຍຮັບກຸ້ມຕົນເອງ ແລະຄອບຄົວໄດ້ ແລະຈະສົ່ງເສີມດ້ານກະສິກໍາ ໂດຍການປູກພັກປອດສານພິດ ແລະພວກເຮົາກໍາລັງຊອກຫາຊ່ອງທາງ ແລະສະຖານທີ່ຢູ່ຄາດວ່າຈະໄດ້ເຂດ ບ້ານບໍ່ນາງົວ ແລະບ້ານໜອງປີງ, ອັນຕໍ່ມາແມ່ນຈະສົ່ງເສີມການຄ້າຂາຍ ແລະການບໍລິການເພື່ອເປັນຕະຫຼາດຮອງຮັບໃຫ້ແກ່ສິນຄ້າ ແລະ ຜະລິດຕະພັນຂອງບໍລິສັດຕໍ່ຊາວຄ້າຂາຍຢູ່ພາຍໃນເມືອງທີ່ຊອກສະຖານທີ່ຄ້າຂາຍບໍ່ໄດ້, ປັດຈຸບັນພວກເຮົາກໍາລັງຊອກສະຖານທີ່ ແລະຊອກກຸ່ມເປົ້າໝາຍຢູ່. ໃນເບື້ອງຕົ້ນແມ່ນຈະເປີດເປັນຕະຫຼາດນັດຂອງສະມາຄົມເສຍກ່ອນ, ເລີ່ມຈາກຂະໜາດນ້ອຍໄປຫາຂະໜາດໃຫຍ່.

ສໍາລັບໃນພິທີເຊັນສັນຍາ MOU ຄັ້ງນີ້ລະຫວ່າງທ່ານ ທັດຊະທໍາ ພະສຸທັນໄພຄິນ ປະທານ ບໍລິສັດ ມີດີ 998 ປະເທດໄທ ແລະທ່ານ ນາງ ພຸດທະສອນ ຊະວິສຸກ ບໍລິສັດ ມີດີ ບໍລິສັດ ເດີພາວເວີລາວ, ໂດຍມີແຂກເຊີນເປັນສັກຂີພິຍານ.

ເນື້ອໃນສັນຍາການຮ່ວມມືການຄ້າຄູ່ສັນຍາທັງສອງຝ່າຍໄດ້ຕົກລົງຈັດຕັ້ງດໍາເນີນທຸລະກິດ, ກິດຈະການຮ່ວມການຄ້າເພື່ອເປັນຕົວແທນການຈໍາໜ່າຍແຕ່ຜູ້ດຽວແບບລະບົບເຄືອຂ່າຍຮ່ວມກັນໂດຍແບ່ງໜ້າທີ່ຮັບຜິດຊອບ ແລະເຮັດໃຫ້ເກີດຜົນກໍາໄລມາແບ່ງປັນກັນ ແລະ ທັງສອງຝ່າຍຕົກລົງເຮັດສັນຍາລົງນາມຮ່ວມທຸລະກິດ, ກິດຈະການຮ່ວມການຄ້າພາຍໃຕ້ຊື່ບໍລິສັດ ມີດີ 998 ປະເທດລາວ ຈໍາກັດຜູ້ດຽວ ແລະ ກັບ ບໍສິສັດ ມີດີ 998 ຈໍາກັດ.

ບໍລິສັດມີດີ 998 ລາວ ຈໍາກັດຜູ້ດຽວ ເຮັດໜ້າທີ່ເປັນຝ່າຍບໍລິຫານກິດຈະກຳຈັດຫາຕຶກອາຄານ, ສໍານັກງານກຳນົດຍຸດທະສາດແຜນນະໂຍບາຍ ແລະກົດລະບຽບ, ການຕະຫຼາດ, ການຝຶກອົບຮົມສະມາຊິກ, ການຄີລະຫັດສະມາຊິກ, ຄຸມສະຕ໋ອກ, ການສັ່ງສິນຄ້າ, ຈ່າຍເງິນໂບນັດ ແລະກິດຈະກຳອື່ນໆ ໃນ ສປປ ລາວ ທັງໝົດ, ບໍສິສັດ ມີດີ 998 ກຣຸບຈໍາກັດ ເຮັດໜ້າທີ່ເປັນຜູ້ສະໜອງຜະລິດຕະພັນສິນຄ້າທຸກສະນິດ, ກຳນົດແຜນການຕະຫຼາດເຮັດເວັບໄຊໃຫ້ກັບບໍລິສັດ ມິດີ 998 ລາວ ຈໍາກັດຜູ້ດຽວ, ໂຄສະນາຜະລິດຕະພັນສິນຄ້າທາງຢູທູບ ແລະເປັນທີ່ປຶກສາໃຫ້ກັບມິດີ 998 ລາວ ຈໍາກັດຜູ້ດຽວ ແລະຮັບຜິດຊອບກິດຈະກຳຕ່າງໆທາງຝັ່ງໄທ ແລະອື່ນໆ ຈົນຄົບສົມບູນສາມາດດຳເນີນການໄດ້, ຄູ່ສັນຍາທັງສອງໄດ້ຕົກລົງກັນພາຍຫຼັງເຊັນສັນຍາແລ້ວທັງສອງຝ່າຍຈະເຂົ້າເຮັດໜ້າທີ່ຕາມທີ່ໄດ້ຕົກລົງໃນສັນຍາທັນທີ.
(ຂ່າວ: ບຸນອູ້ມ, ພາບ: ຕອມ)

แชร์