ໄຂກອງປະຊຸມສຸດຍອດ ຄະນະກຳມາທິການແມ່ນໍ້າຂອງສາກົນ ຄັ້ງທີ 4

ກອງປະຊຸມສຸດຍອດຄະນະກຳມາທິການແມ່ນໍ້າຂອງສາກົນ (MRC) ຄັ້ງທີ 4 ໄດ້ໄຂຂຶ້ນຢ່າງເປັນທາງການໃນວັນທີ 5 ເມສາ 2023 ທີ່ຫໍປະຊຸມແຫ່ງຊາດ ໂດຍມີທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ສົມເດັດ ອັກຄະມະຫາເສນາບໍດີ ເຕໂຊ ຮຸນເຊັນ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ, ທ່ານ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ພ້ອມດ້ວຍຜູ້ແທນຈາກບັນດາປະເທດສະມາຊິກ MRC ແລະ ບັນດາທ່ານຜູ້ຕາງໜ້າຈາກຄູ່ຮ່ວມພັດທະນາເຂົ້າຮ່ວມ.

ໂອກາດນີ້, ທ່ານນາຍົກລັດຖະມົນຕີ ໄດ້ກ່າວບາງຕອນສຳຄັນວ່າ: ສປປ ລາວ ໄດ້ເປັນເຈົ້າພາບຄັ້ງທໍາອິດໃນການຈັດກອງປະຊຸມສຸດຍອດ MRC ຊຶ່ງກົງກັບວັນສ້າງຕັ້ງ MRC ຄົບຮອບ 28 ປີ ໂດຍຈັດຂຶ້ນພາຍໃຕ້ຫົວຂໍ້ “ນະວັດຕະກຳ ແລະການຮ່ວມມື ເພື່ອແມ່ນໍ້າຂອງ ທີ່ໝັ້ນຄົງ ແລະຍືນຍົງ” ອັນໄດ້ເປັນຂີດໝາຍສໍາຄັນ ແລະ ເປັນເວທີພົບປະຂອງການນໍາຂັ້ນສູງຈາກປະເທດສະມາຊິກຄະນະກໍາມາທິການແມ່ນໍ້າຂອງສາກົນ ແລະຜູ້ຕາງໜ້າຈາກຄູ່ຮ່ວມເຈລະຈາ, ຄູ່ຮ່ວມພັດທະນາ ແລະຄູ່ຮ່ວມງານອື່ນໆເພື່ອພ້ອມກັນປຶກສາຫາລືກ່ຽວກັບສະພາບການພັດທະນາ, ສິ່ງທ້າທາຍ ແລະກາລະໂອກາດຕ່າງໆໃນອ່າງແມ່ນໍ້າຂອງ, ທັງເປັນການແລກປ່ຽນຄວາມຮູ້ດ້ານນະວັດຕະກໍາ ແລະເສີມຂະຫຍາຍການຮ່ວມມືເພື່ອປະກອບສ່ວນຢ່າງຕັ້ງໜ້າເຂົ້າໃນການຄຸ້ມຄອງ ແລະພັດທະນາອ່າງແມ່ນໍ້າຂອງໃຫ້ມີຄວາມຍືນຍົງ. ສປປ ລາວ ໄດ້ປະຕິບັດພັນທະສັນຍາແມ່ນໍ້າຂອງ MRC ຢ່າງຕັ້ງໜ້າໂດຍສະເພາະການປະຕິບັດໜ້າທີ່ ແລະພາລະບົດບາດຂອງ MRC ຊຶ່ງມີສຳນັກງານໃຫຍ່ຕັ້ງຢູ່ ສປປ ລາວ ແລະ ຕີລາຄາສູງຕໍ່ກັບຜົນສຳເລັດທີ່ MRC ພາຍໃຕ້ການບໍລິຫານຂອງບັນດາຫົວໜ້າກອງເລຂາ MRC ໃນໄລຍະຜ່ານມາ. ພິເສດ ສປປ ລາວ ແມ່ນມີຄວາມພາກພູມໃຈເປັນຢ່າງຍິ່ງທີ່ຄົນລາວໄດ້ຮັບກຽດເປັນຄັ້ງທໍາອິດໃນການປະຕິບັດໜ້າທີ່ເປັນຫົວໜ້າກອງເລຂາ MRC. ຫວັງເປັນຢ່າງຍິ່ງວ່າບັນດາປະເທດສະມາຊິກຈະສືບຕໍ່ໃຫ້ການສະໜັບສະໜູນກອງເລຂາຄະນະກຳມາທິການແມ່ນໍ້າຂອງສາກົນໃນການຈັດຕັ້ງປະຕິບັດຍຸດທະສາດພັດທະນາອ່າງແມ່ນໍ້າຂອງ ສົກປີ 2021-2030, ບັນດາລະບຽບການ, ບົດແນະນໍາຕ່າງໆທີ່ກ່ຽວຂ້ອງ ແລະຖະແຫຼງການວຽງຈັນທີ່ຈະຮັບຮອງໃນມື້ນີ້.

ທ່ານນາຍົກລັດຖະມົນຕີ ກ່າວຕື່ມວ່າ: ແມ່ນໍ້າຂອງຖືເປັນໜຶ່ງໃນແມ່ນໍ້າຂະໜາດໃຫຍ່ຂອງໂລກທີ່ມີຄວາມອຸດົມສົມບູນໄປດ້ວຍລະບົບນິເວດ ແລະຊີວະນາໆພັນທີ່ຕິດພັນກັບຊີວິດການເປັນຢູ່ຂອງປະຊາຊົນຫຼາຍກ່ວາ 60 ລ້ານຄົນ ທີ່ອາໄສໃນອ່າງແມ່ນໍ້າແຫ່ງນີ້ ແລະໄດ້ນໍາໃຊ້ຊັບພະຍາກອນທໍາມະຊາດດັ່ງກ່າວໃນການດໍາລົງຊີວິດ. ແມ່ນໍ້າຂອງຖືເປັນແມ່ນໍ້າແຫ່ງມິດຕະພາບທີ່ເຊື່ອມໂຍງການພົວພັນຂອງປະຊາຊົນໂດຍສະເພາະການແລກປ່ຽນທາງດ້ານເສດຖະກິດ, ສັງຄົມ ແລະວັດທະນະທໍາຂອງບັນດາປະເທດໃນພາກພື້ນນີ້. ສະນັ້ນ, ຈຶ່ງຮຽກຮ້ອງໃຫ້ບັນດາປະເທດໃນອ່າງແມ່ນໍ້າຂອງທັງໝົດຈົ່ງຮ່ວມມືກັນໃນການຄຸ້ມຄອງອ່າງແມ່ນໍ້າຂອງຕາມຫຼັກການເຄົາລົບອະທິປະໄຕຂອງກັນ ແລະ ກັນ ແລະ ເພື່ອຜົນປະໂຫຍດຮ່ວມກັນດັ່ງຄຳຂວັນ “ໜຶ່ງແມ່ນໍ້າຂອງ ໜຶ່ງອຸດົມການ”.

ທ່ານ ສອນໄຊ ສີພັນດອນ ຍັງໄດ້ກ່າວຕື່ມວ່າ: ສະພາບການປ່ຽນແປງດິນຟ້າອາກາດນັບມື້ນັບຮຸນແຮງເຮັດໃຫ້ສະພາບການຂອງໂລກ ແລະພາກພື້ນມີການປ່ຽນແປງກໍ່ໃຫ້ເກີດໄພນໍ້າຖ້ວມ, ໄພແຫ້ງແລ້ງ ແລະ ສະພາບອາກາດຜັນແປຮຸນແຮງ ຊຶ່ງໄດ້ສົ່ງຜົນກະທົບຕໍ່ຊີວິດ ແລະ ຊັບສິນ ຂອງປະຊາຊົນ ລວມທັງ ພື້ນຖານໂຄງລ່າງຕ່າງໆ. ເພື່ອແກ້ໄຂບັນຫາທີ່ກ່າວມາຂ້າງເທິງນັ້ນ, ສປປ ລາວ ໄດ້ເຮັດວຽກຮ່ວມກັບ ຄະນະກໍາມາທິການແມ່ນໍ້າຂອງສາກົນ ແລະ ຄູ່ຮ່ວມງານທີ່ກ່ຽວຂ້ອງໃນການຂະຫຍາຍຕາໜ່າງສະຖານີອຸຕຸນິຍົມ-ອຸທົກກະສາດ, ການປັບປຸງລະບົບພະຍາກອນແຈ້ງເຕືອນໄພນໍ້າຖ້ວມ-ໄພແຫ້ງແລ້ງລ່ວງໜ້າ ເພື່ອຫຼຸດຜ່ອນຄວາມສ່ຽງຈາກໄພພິບັດໃນຂອບເຂດທົ່ວປະເທດ. ສປປ ລາວ ເຫັນວ່າມີຄວາມຈໍາເປັນໃນການຮ່ວມກັນຫາວິທີທາງທີ່ດີ ແລະ ແທດເໝາະກັບຂົງເຂດຂອງພວກເຮົາເພື່ອເຮັດໃຫ້ການພັດທະນາ ເກີດຜົນປະໂຫຍດສູງສຸດພ້ອມທັງຫຼຸດຜ່ອນຜົນກະທົບຕໍ່ສິ່ງແວດລ້ອມ ແລະຕໍ່ຊຸມຊົນທີ່ບອບບາງເປັນຕົ້ນແມ່ນການເສີມຂະຫຍາຍການນຳໃຊ້ນະວັດຕະກຳໃໝ່ໆ ແລະ ກົນໄກການຮ່ວມມືທີ່ມີປະສິດທິພາບເພື່ອອ່າງແມ່ນໍ້າຂອງທີ່ໝັ້ນຄົງ ແລະຍືນຍົງ.
ທີ່ມາ: ພາບ-ຂ່າວ: ສຸກສະຫວັນ, ສໍານານ

แชร์