ສໍາເລັດກອງປະຊຸມຮ່ວມລະດັບລັດຖະມົນຕີກະຊວງການເງິນ ແລະຜູ້ວ່າການທະນາຄານກາງ ອາຊຽນ ຄັ້ງທີ 9

ເມື່ອບໍ່ດົນມານີ້, ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ (ທຫລ) ພ້ອມດ້ວຍຄະນະໄດ້ສຳເລັດການເຂົ້າຮ່ວມກອງປະຊຸມກອງປະຊຸມຮ່ວມລະດັບ ລັດຖະມົນຕີກະຊວງການເງິນ ແລະຜູ້ວ່າການທະນາຄານກາງ ອາຊຽນ ຄັ້ງທີ 9 ໂດຍການເປັນປະທານຂອງປະເທດອິນໂດເນເຊຍ ພາຍໃຕ້ຄຳຂວັນ: “ອາຊຽນມີຄວາມສຳຄັນເປັນສູນກາງແຫ່ງການພັດທະນາ (ASEAN MATTERS: EPICENTRUM OF GROWTH)” ຊຶ່ງຈັດຂຶ້ນທີ່ບາຫຼີ ປະເທດອິນໂດເນເຊຍ.

ກອງປະຊຸມຄັ້ງນີ້, ໄດ້ຮັບຟັງການນຳສະເໜີແລກປ່ຽນກ່ຽວກັບນະໂຍບາຍ ແລະທ່າອ່ຽງທາງດ້ານເສດຖະກິດ ແລະສາກົນໂດຍອົງການຈັດຕັ້ງສາກົນຄື: ອົງການການເງິນສາກົນ (IMF), ອົງການຄົ້ນຄວ້າເສດຖະກິດມະຫາພາກອາຊຽນ+3 (AMRO),ຄະນະກຳມະການຄຸ້ມຄອງສະຖຽນລະພາບທາງດ້ານການເງິນ (Financial Stability Board-FSB), ທະນາຄານຊໍາລະສາກົນ (Bank International Settlement-BIS), ທະນາຄານພັດທະນາອາຊີ (ADB) ແລະ ທະນາຄານໂລກ (World Bank) ພ້ອມທັງຮັບຟັງຄວາມຄືບໜ້າການຈັດຕັ້ງປະຕິບັດໜ້າວຽກຂອງບັນດາຄະນະກໍາມະການ (Working Committee: WC) ຕ່າງໆ ພາຍໃຕ້ວຽກງານເຊື່ອມໂຍງຂະແໜງການເງິນ-ເງິນຕາອາຊຽນ, ຮັບຮອງເອົາແຜນບຸລິມະສິດຂອງ ອິນໂດເນເຊຍ ພາຍໃຕ້ 3 ຍຸດທະສາດຫຼັກຄື: ການຟື້ນຕົວຄືນໃໝ່ (ເສດຖະກິດແບບດີຈີຕອນ ແລະ ຄວາມຍືນຍົງ ແລະ ແຜນບຸລິມະສິດຂອງບັນດາຄະນະກຳມະການປະຈຳປີ 2023 ໂດຍສະເພາະແຜນບຸລິມະສິດ (Priority Economic Deliverable-PED) ແລະຮັບຟັງການນໍາສະເໜີບັນດາຂໍ້ລິເລີ່ມໃໝ່ທີ່ຢູ່ພາຍໃຕ້ແຜນບຸລິມະສິດ ປີ 2023 ຂອງອິນໂດເນເຊຍ. ພ້ອມດຽວກັນນີ້, ທ່ານຜູ້ວ່າການ ທຫລ ໄດ້ມີຄຳເຫັນຕໍ່ກອງປະຊຸມ, ຊຶ່ງໄດ້ຊົມເຊີຍບັນດາຄະນະກຳມະການທີ່ໄດ້ເອົາໃຈໃສ່ຜັນຂະຫຍາຍບັນດາແຜນວຽກເພື່ອສົ່ງເສີມການເຊື່ອມໂຍງການເງິນ-ເງິນຕາ ໃນພາກພື້ນ ແລະ ໄດ້ເຮັດໃຫ້ບັນດາແຜນບຸລິມະສິດທີ່ໄດ້ກຳນົດໃນປີ 2022 ຜ່ານມາສຳເລັດຜົນຕາມຄາດໝາຍທີ່ວາງໄວ້ ແລະຍັງໄດ້ມີຄຳເຫັນສະໜັບສະໜູນບັນດາຂໍ້ລິເລີ່ມຂອງອາຊຽນຕິດພັນກັບການດຳເນີນທຸລະກຳສະກຸນເງິນທ້ອງຖິ່ນ ແລະ ການເຊື່ອມໂຍງລະບົບຊຳລະໃນພາກພື້ນ. ນອກຈາກນີ້, ໃນກອງປະຊຸມຍັງໄດ້ຮັບຟັງການລາຍງານຄວາມຄືບໜ້າຂອງການຈັດຕັ້ງປະຕິບັດແຜນແມ່ບົດ AEC ຄວາມຄືບໜ້າການຈັດຕັ້ງປະຕິບັດແຜນແມ່ບົດການເຊື່ອມໂຍງຂະແໜງການເງິນ-ເງິນຕາອາຊຽນ ແລະຂໍ້ລິເລີ່ມອື່ນໆພາຍໃຕ້ AFMGM.

ຄຽງຄູ່ກັນນັ້ນ, ທຫລ ຍັງໄດ້ເຂົ້າຮ່ວມກອງປະຊຸມສອງຝ່າຍ ລະຫວ່າງ ທຫລ ແລະທະນາຄານກາງອິນໂດເນເຊຍໂດຍໄດ້ມີການປຶກສາຫາລືກ່ຽວກັບເນື້ອໃນຂອງບົດບັນທຶກຄວາມເຂົ້າໃຈ (MOU) ລະຫວ່າງ ທຫລ ແລະ ທະນາຄານກາງ ອິນໂດເນເຊຍ ໃນການຮ່ວມມືທາງດ້ານລະບົບການຊຳລະ, ນະວັດຕະກຳການເງິນດີຈິຕອນ ແລະ ເພີ່ມທະວີວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ; ເຂົ້າຮ່ວມກອງປະຊຸມພົບປະ 2 ຝ່າຍ ລະຫວ່າງ ທຫລ ແລະ ທະນາຄານພັດທະນາອາຊີ (ADB); ກອງປະຊຸມພົບປະ 2 ຝ່າຍ ລະຫວ່າງ ທຫລ ແລະ ສະພາການຄ້າອາເມຣິກາ-ອາຊຽນ (United States-ASEAN Business Committee (US-ABC)) ເພື່ອເປັນການປຶກສາຫາລືກ່ຽວກັບຄວາມຄືບໜ້າຂອງໜ້າວຽກ ແລະການເຈລະຈາຮ່ວມມືໃນດ້ານຕ່າງໆ.

ນອກຈາກນີ້, ຄະນະນຳຂອງ ທຫລ ຍັງໄດ້ກ່າວເປີດກອງປະຊຸມສຳມະນາລະດັບສູງໃນຫົວຂໍ້: “ການສົ່ງເສີມການເຂົ້າເຖິງການບໍລິການທາງດ້ານການເງິນແບບດີຈີຕອນ ແລະປະຊາສຶກສາສຳລັບຈຸນລະວິສາຫະກິດ ແລະວິສາຫະກິດຂະໜາດນ້ອຍ ແລະກາງ (Promoting Digital Financial Inclusion and Literacy for MSMEs)” ຊຶ່ງ ສປປ ລາວ ໃນນາມເປັນປະທານຮ່ວມຂອງຄະນະກຳມະການການເຂົ້າເຖິງການບໍລິການທາງດ້ານການເງິນອາຊຽນ (WC-FINC).
ທີ່ມາ: ຂ່າວ-ພາບ: ວັນປະເສີດ ສົມບູນຂັນ

แชร์