ທຫລ ແລະກະຊວງ ອຄ ພົບປະສອງຝ່າຍເພື່ອແກ້ໄຂບັນຫາການຄຸ້ມຄອງເສດຖະກິດ

ໃນວັນທີ 4 ເມສາ 2023 ທີ່ທະນາຄານແຫ່ງ ສປປ ລາວ ຈັດກອງປະຊຸມພົບປະລະຫວ່າງການນຳຂອງ ທຫລ ແລະກະຊວງອຸດສາຫະກຳ ແລະການຄ້າ (ອຄ) ໂດຍການເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທຫລ ແລະທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ພ້ອມດ້ວຍຄະນະນຳ, ຄະນະກົມຂອງທັງ 2 ຝ່າຍເຂົ້າຮ່ວມ.

ໃນກອງປະຊຸມ, ໄດ້ຮັບຟັງລາຍງານສະພາບການປະຕິບັດແຜນເງິນຕາຂອງໄຕມາດທີ I ແລະທິດທາງແຜນການຂອງ ໄຕມາດທີ II ຈາກ ທຫລ ພ້ອມທັງປຶກສາຫາລືກ່ຽວກັບບັນຫາການຄຸ້ມຄອງລາຄາສິນຄ້າ; ບັນຫາການສ້າງລະບົບຄຸ້ມຄອງຫົວໜ່ວຍສົ່ງອອກ-ດັດສົມຫົວໜ່ວຍນໍາເຂົ້າສິນຄ້າ; ບັນຫາການຄຸ້ມຄອງບັນດາຮ້ານຂາຍຄໍາ-ວັດຖຸມີຄ່າ ທີ່ຕິດພັນກັບວຽກຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະການຄຸ້ມຄອງອັດຕາແລກປ່ຽນ, ການແລກປ່ຽນເງິນຕາຊະຊາຍ ແລະການອະນຸຍາດໃຫ້ອອມຄໍາ; ບັນຫາການຄຸ້ມຄອງການນໍາໃຊ້ເງິນຕາແບບຊະຊາຍ-ການຕິດປະກາດລາຄາສິນຄ້າ ແລະບໍລິການເປັນເງິນຕາຕ່າງປະເທດຢູ່ສະຖານທີ່ຕ່າງໆ; ການຄຸ້ມຄອງການລົງທຶນໂດຍກົງຂອງຕ່າງປະເທດ (FDI - Foreign Direct Investment). ນອກຈາກນີ້, ຝ່າຍກະຊວງ ອຄ ຍັງໄດ້ລາຍງານສະພາບ ແລະແລກປ່ຽນຄຳຄິດເຫັນກ່ຽວກັບການຄຸ້ມຄອງການນໍາເຂົ້າ-ສົ່ງອອກ ແລະຫັນເອົາເງິນຕາຕ່າງປະເທດທີ່ໄດ້ຈາກການສົ່ງອອກໃຫ້ເຂົ້າສູ່ລະບົບທະນາຄານ; ມາດຕະການການຈໍາກັດການນໍາເຂົ້າສິນຄ້າຟຸ່ມເຟືອຍ; ການຄຸ້ມຄອງການຄ້າທາງເອເລັກໂຕຣນິກ (E-commerce) ແລະບັນຫາປິ່ນອ້ອມອື່ນໆ.

ກອງປະຊຸມໄດ້ມີການຕົກລົງເຫັນດີເພື່ອເຮັດວຽກຮ່ວມກັນໃນຕໍ່ໜ້າເປັນຕົ້ນແມ່ນ: ການຄຸ້ມຄອງລາຄາສິນຄ້າ; ການຄຸ້ມຄອງອັດຕາແລກປ່ຽນ; ອັດຕາເງິນເຟີ້; ການຄຸ້ມຄອງຕິດຕາມ ແລະປະກາດລາຄາສິນຄ້າເປັນເງິນກີບ; ການຄຸ້ມຄອງການນຳໃຊ້ແອັບພິເຄຊັ້ນຂອງຮ້ານຂາຍຄຳ; ການແລກປ່ຽນຂໍ້ມູນລະຫວ່າງກັນ; ການປະຢັດການນຳໃຊ້ເງິນຕາຕ່າງປະເທດຂອງສັງຄົມ ແລະບັນຫາອື່ນໆທີ່ຕິດພັນ.

แชร์