ປະດັບຫຼຽນໄຊອິດສະຫຼະໃຫ້ສະຫະພັນແມ່ຍິງ ສສ ຫວຽດນາມ

ລັດຖະບານແຫ່ງ ສປປ ລາວ ໄດ້ປະດັບຫຼຽນໄຊອິດສະຫຼະຊັ້ນ II ໃຫ້ປະທານສະຫະພັນແມ່ຍິງ ສສ ຫວຽດນາມ, ຫຼຽນໄຊອິດສະຫຼະຊັ້ນ III ໃຫ້ຮອງປະທານສະຫະພັນແມ່ຍິງ ສສ ຫວຽດນາມ 2 ທ່ານ, ຫຼຽນໄຊແຮງງານຊັ້ນ III ໃຫ້ 1 ກົມກອງ, ຫຼຽນໄຊມິດຕະພາບໃຫ້ 3 ທ່ານ ແລະ 15 ກົມກອງ ຂຶ້ນໃນວັນທີ 4 ເມສາ 2023 ທີ່ໂຮງແຮມເມືອງແທັງ ນະຄອນຫຼວງວຽງຈັນ ໂດຍເປັນກຽດປະດັບຂອງສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ຮອງປະທານປະເທດແຫ່ງ ສປປ ລາວ, ມີຕາງໜ້າເອກອັກຄະລັດຖະທູດ ສສ ຫວຽດນາມ ປະຈຳລາວ, ສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ສະຫາຍ ນາງ ຮາທິຫງ່າ ກຳມະການສູນກາງພັກ ປະທານສະຫະພັນແມ່ຍິງ ສສ ຫວຽດນາມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນໄລຍະເຄື່ອນໄຫວຢ້ຽມຢາມ ສປປ ລາວ ແຕ່ວັນທີ 3-7 ເມສານີ້ ຂອງຄະນະຜູ້ແທນສະຫະພັນແມ່ຍິງ ສສ ຫວຽດນາມ ນໍາໂດຍ ສະຫາຍ ນາງ ຮາທິຫງ່າ ກຳມະການສູນກາງພັກ ປະທານສະຫະພັນແມ່ຍິງ ສສ ຫວຽດນາມ ກໍໄດ້ເຂົ້າຢ້ຽມຂໍ່ານັບສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກຮອງປະທານປະເທດແຫ່ງ ສປປ ລາວ. ໂອກາດນີ້ ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ໃນຄັ້ງນີ້ຂອງຄະນະຜູ້ແທນຂັ້ນສູງ ສະຫະພັນແມ່ຍິງ ສສ ຫວຽດນາມ ຊຶ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ທີ່ມີມາແຕ່ດົນນານແລ້ວນັ້ນໃຫ້ນັບມື້ແໜ້ນແຟ້ນຍິ່ງໆຂຶ້ນ.

ໃນວັນດຽວກັນນີ້, ຄະນະຜູ້ແທນສະຫະພັນແມ່ຍິງລາວ-ຫວຽດນາມໄດ້ພົບປະສອງຝ່າຍ, ຝ່າຍລາວນໍາໂດຍສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ ແລະ ຄະນະຜູ້ແທນສະຫະພັນແມ່ຍິງ ສສ ຫວຽດນາມ ນໍາໂດຍສະຫາຍ ນາງ ຮາທິຫງ່າ ກຳມະການສູນກາງພັກ ປະທານສະຫະພັນແມ່ຍິງ ສສ ຫວຽດນາມ.

ການພົບປະຄັ້ງນີ້, ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບການຈັດຕັ້ງປະຕິບັດວຽກງານເສີມຂະຫຍາຍການຮ່ວມມືໃນໄລຍະຜ່ານມາ. ໂດຍສະເພາະໃນໄລຍະ 1 ປີຜ່ານມາສະຫະພັນແມ່ຍິງລາວ ໄດ້ໄປເຄື່ອນໄຫວຢ້ຽມຢາມ ແລະ ເຮັດວຽກທາງການຢູ່ ສສ ຫວຽດນາມ ໃນລະຫວ່າງວັນທີ 30 ມິຖຸນາ-8 ກໍລະກົດ 2022 ຊຶ່ງເປັນປະກອບສ່ວນເຂົ້າໃນການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ, ສະເຫຼີມສະຫຼອງ 2 ວັນປະຫວັດສາດຄື: ວັນສ້າງຕັ້ງສາຍພົວພັນການທູດລະຫວ່າງລາວ-ຫວຽດນາມ, ຫວຽດນາມ-ລາວ ຄົບຮອບ 60 ປີ (5 ກັນຍາ 1962-5 ກັນຍາ 2022), ວັນເຊັນສົນທິສັນຍາມິດຕະພາບການຮ່ວມມື ຄົບຮອບ 45 ປີ (18 ກໍລະກົດ 1977-9 ກໍລະກົດ 2022) ແລະເຂົ້າຮ່ວມພິທີປະດັບຫຼຽນໄຊຂອງລັດຖະບານຫວຽດນາມໃຫ້ການນໍາ, ກົມກອງ ແລະ ບຸກຄົນຂອງສະຫະພັນແມ່ຍິງລາວ ແລະວຽກງານຮ່ວມມືດ້ານອື່ນໆ ທີ່ທັງສອງຝ່າຍມີຄວາມສົນໃຈນໍາກັນ.
ທີ່ມາ: ຂ່າວ-ພາບ: ວັນເພັງ

แชร์