ເປີດແລ້ວ ການສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດ ສົກສຶກສາ 2022-2023

ການສອບເສັງສອບເສັງນັກຮຽນເກັ່ງຊັ້ນມັດທະຍົມສຶກສາ (ມ.4 ແລະ ມ.7) ລະດັບຊາດ ປະຈໍາສົກຮຽນ 2022-2023 ໄດ້ຈັດຂຶ້ນເມື່ອວັນທີ 4 ເມສາ 2023 ທີ່ມະຫາວິທະຍາໄລແຫ່ງຊາດ (ມຊ), ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ຜູ້ອຳນວຍການສະຖາບັນ, ສຳນັກພິມ, ສູນ, ຄູນຳພາແຕ່ລະແຂວງທົ່ວປະເທດຕະຫຼອດຮອດພະນັກງານ, ຄູອາຈານ, ຄະນະກຳມະການຍາມຫ້ອງສອງເສັງ ແລະຕົວແທນນັກຮຽນເກັ່ງຈາກແຕ່ລະແຂວງທົ່ວປະເທດເຂົ້າຮ່ວມ.

ໃນໂອກາດດັ່ງກ່າວ, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ການຈັດສອບເສັງນັກຮຽນເກັ່ງຂັ້ນ ມ.4 ແລະ ມ.7 ລະດັບຊາດ ສົກຮຽນ 2022-2023 ແມ່ນເປັນການກະຕຸກຊຸກຍູ້ການຮຽນການສອນໃນໂຮງຮຽນໃຫ້ດີຂຶ້ນ, ເຮັດໃຫ້ນັກຮຽນມີຄວາມບຸກບືນ ຫ້າວຫັນໃນການຄົ້ນຄວ້າຮໍ່າຮຽນ, ຄູມີການພັດທະນາການສອນ ແລະ ຍົກລະດັບຄວາມຮູ້ທາງດ້ານວິຊາສະເພາະຂອງຕົນ, ຊຶ່ງເປັນເງື່ອນໄຂອັນດີປະກອບເຂົ້າໃນການປັບປຸງ ແລະ ພັດທະນາຄຸນນະພາບການສຶກສາໃນແຕ່ລະຊັ້ນຮຽນ. ພ້ອມກັນກັນ, ຍັງເປັນການສ້າງໂອກາດໃຫ້ນັກຮຽນໄດ້ສະແດງອອກທາງດ້ານພອນສະຫວັນ, ດ້ານຄວາມຮູ້, ຄວາມສາມາດ ແລະ ຫົວຄິດປະດິດສ້າງຂອງຕົນເອງ ໃນວິຊາພາສາລາວ-ວັນນະຄະດີ, ຄະນິດສາດ, ເຄມີສາດ ແລະ ຟີຊິກສາດ; ສ້າງຂະບວນການ, ສະພາບແວດລ້ອມໃຫ້ນັກຮຽນທີ່ມີຄວາມຮູ້, ພອນສະຫວັນໃນວິຊາທີ່ຕົນມາສອບເສັງນັກຮຽນເກັ່ງລະດັບຊາດນີ້ ໄດ້ມີໂອກາດເຂົ້າຮ່ວມແຂ່ງຂັນ ແລະ ມີມາດຕະຖານທາງດ້ານຄວາມຮູ້ທີ່ຫຍັບເຂົ້າໃກ້ພາກພື້ນ ແລະ ສາກົນເທື່ອລະກ້າວ; ເພື່ອສົ່ງເສີມການຮຽນການສອນໃນໂຮງຮຽນສາຍສາມັນສຶກສາ ໂດຍສະເພາະແມ່ນຊັ້ນມັດທະຍົມສຶກສາໃນທົ່ວປະເທດໃຫ້ມີບັນຍາກາດຟົດຟື້ນ, ມີລັກສະນະແຂ່ງຂັນກັນ ເພື່ອປັບປຸງຄຸນນະພາບຂອງການສຶກສາໃຫ້ສູງຂຶ້ນເລື້ອຍໆ;ເປັນການຍ້ອງຍໍ ແລະເປີດໂອກາດໃຫ້ນັກສອບເສັງທີ່ໄດ້ອັນດັບທີ 1, 2 ແລະ 3 ໄດ້ຮັບການສະໜັບສະໜູນເຂົ້າຮຽນຕໍ່ໃນລະດັບທີ່ສູງ (ໃນວິຊາທີ່ຕົນສອບເສັງ).

ພ້ອມດຽວກັນນັ້ນ, ທ່ານລັດຖະມົນຕີ ສສກ ຍັງໄດ້ຮຽກຮ້ອງໃຫ້ຄະນະກຳມະການ,ອະນຸກຳມະການທຸກຝ່າຍຕ້ອງເຮັດໜ້າທີ່ດ້ວຍຄວາມຮັບຜິດຊອບສູງ,ເປັນເຈົ້າການ, ເຮັດສຳເລັດໜ້າທີ່ຢ່າງເປັນທຳ ແລະ ຮັບປະກັນຄວາມໂປ່ງໃສ; ສຳລັບນັກສອບເສັງຕ້ອງຊື່ສັດສຸດຈະລິດ, ສຶກສາຫົວບົດໃຫ້ລະອຽດຖີ່ຖ້ວນແລ້ວຈຶ່ງຄ່ອຍຕອບ, ກວດກາຄືນຄຳຕອບແຕ່ລະຂໍ້ ແລະເຮັດໃຫ້ແລ້ວທັນຕາມກຳນົດເວລາສິ່ງສຳຄັນຕ້ອງປະຕິບັດຕາມລະບຽບການສອບເສັງຢ່າງເຂັ້ມງວດເພື່ອເຮັດໃຫ້ການຈັດການສອບເສັງນັກຮຽນເກັ່ງລະດັບຊາດໃນຄັ້ງນີ້ ດຳເນີນໄປດ້ວຍຜົນສຳເລັດອັນຈົບງາມ ຮັບປະກັນທາງດ້ານຄຸນນະພາບ ແລະ ປາສະຈາກຫາງສຽງໃດໆ ແລະທີ່ສຳຄັນຂໍໃຫ້ລູກຫຼານທຸກຄົນຈົ່ງພ້ອມກັນຮັກສາສຸຂະພາບຂອງຕົນເອງພ້ອມເຊື່ອໝັ້ນວ່າລູກຫຼານນັກຮຽນເກັ່ງນີ້ຈະສາມາດສ້າງຊື່ສຽງໃຫ້ປະເທດຊາດໃນອະນາຄົດທີ່ດີ.

ສຳລັບການສອບເສັງນັກຮຽນເກັ່ງລະດັບຊາດ ຂັ້ນ ມ.4 ແລະ ມ.7 ໃນສົກນີ້ ໄດ້ດໍາເນີນເປັນເວລາ 1 ວັນ (4 ເມສາ) ໂດຍສອບເສັງໃນ 4 ວິຊາ ຄື: ວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ວິຊາເຄມີສາດ, ມີຕົວແທນນັກຮຽນເຂົ້າຮ່ວມແຂວງລະ 8 ນ້ອງ ລວມ 144 ນ້ອງ, ຍິງ 64 ນ້ອງ. ຫຼັງຈາກນັ້ນ, ໃນວັນທີ 5 ເມສາ 2023 ແມ່ນໄດ້ນຳພານັກສອບເສັງໄປທ່ຽວຊົມ ແລະທັດສະນະສຶກສາຫໍພິພິຕະພັນ ທ່ານ ໄກສອນ ພົມວິຫານ, ພະທາດຫຼວງວຽງຈັນ, ສວນວັດທະນະທຳວັດຊຽງຄວນ; ວັນທີ 6 ເມສາ 2023 ເຂົ້າຮ່ວມກິດຈະກຳ ຖາມ-ຕອບ ວິທະຍາສາດ ແລະ ວັນທີ 7 ເມສາ 2023 ສະຫຼຸບ ແລະ ປະກາດຜົນ.

แชร์