ຄະນະກຳມາທິການແມ່ນໍ້າຂອງສາກົນ ກຽມເນື້ອໃນໃຫ້ແກ່ກອງປະຊຸມສຸດຍອດ ຄັ້ງທີ 4

ໃນວັນທີ 4 ເມສານີ້, ຄະນະກຳມາທິການແມ່ນໍ້າຂອງສາກົນ (MRC) ໄດ້ຈັດກອງປະຊຸມລັດຖະມົນຕີເພື່ອກຽມໃຫ້ແກ່ກອງປະຊຸມສຸດຍອດຄະນະກຳມາທິການແມ່ນໍ້າຂອງສາກົນ ຄັ້ງທີ 4 ແລະບັນດາກອງປະຊຸມຮ່ວມກັບຄູ່ເຈລະຈາ, ຄູ່ຮ່ວມພັດທະນາ ແລະຄູ່ຮ່ວມງານອື່ນໆ ທີ່ ສປປ ລາວ ໄດ້ຮັບກຽດເປັນເຈົ້າພາບທີ່ຈະຈັດຂຶ້ນໃນວັນທີ 5 ເມສາ 2023 ຢູ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໂດຍມີບັນດາລັດຖະມົນຕີ, ຮອງລັດຖະມົນຕີຈາກກະຊວງກ່ຽວຂ້ອງຈາກປະເທດສະມາຊິກ MRC ພ້ອມດ້ວຍນັກຄົ້ນຄວ້າ, ຊ່ຽວຊານຈາກພາກພື້ນ ແລະສາກົນເຂົ້າຮ່ວມ.

ໂອກາດນີ້,ທ່ານນາງ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະສິ່ງແວດລ້ອມ,ປະທານຄະນະກຳມະການແມ່ນໍ້າຂອງແຫ່ງຊາດ,ສະມາຊິກສະພາມົນຕີ ຄະນະກໍາມາທິການແມ່ນໍ້າຂອງສາກົນສຳລັບ ສປປ ລາວ ໄດ້ມີຄຳເຫັນກ່າວເປີດກອງປະຊຸມວ່າ: ກອງປະຊຸມລັດຖະມົນຕີໃນຄັ້ງນີ້, ໄດ້ທົບທວນຄືນຜົນສໍາເລັດຂອງຄະນະກໍາມາທິການແມ່ນໍ້າຂອງສາກົນນັບແຕ່ສຳເລັດການຮັບຮອງຖະແຫລງການ ສຽມຣຽບ ໃນປີ 2018 ຢ່າງເປັນທາງການໂດຍເນັ້ນໃຫ້ເຫັນບາງຜົນສຳເລັດເຖິງແມ່ນວ່າຈະມີສິ່ງທ້າທາຍໃນພາກພື້ນ, ນອກຈາກນັ້ນຍັງຈະນໍາສະເໜີຜົນຂອງກອງປະຊຸມສຳມະນາວິຊາການສາກົນທີ່ໄດ້ຈັດຜ່ານມາໂດຍມີຜູ້ຊ່ຽວຊານຫລາຍຮ້ອຍຄົນຈາກທົ່ວໂລກເຂົ້າຮ່ວມ ເພື່ອລະດົມແນວຄວາມຄິດ, ກົນໄກທີ່ເປັນນະວັດຕະກໍາ ແລະ ການຮ່ວມມືທີ່ຈະເຮັດໃຫ້ແມ່ນໍ້າຂອງມີຄວາມໝັ້ນຄົງ ແລະ ຍືນຍົງໃນອະນາຄົດ, ເຊິ່ງຜົນຂອງກອງປະຊຸມລັດຖະມົນຕີ ທີ່ຈັດຂຶ້ນໃນມື້ນີ້, ຈະເປັນສ່ວນສຳຄັນໃຫ້ແກ່ ການປຶກສາຫາລືຂອງບັນດາຫົວໜ້າລັດຖະບານປະເທດສະມາຊິກ ຄະນະກໍາມາທິການແມ່ນໍ້າຂອງສາກົນ, ເຊິ່ງກອງປະ ຊຸມ ທີ່ຈະຈັດຂຶ້ນ ໃນວັນທີ 5 ເມສາ ບັນດາຫົວໜ້າລັດຖະບານປະເທດສະມາຊິກ MRC ຈະໄດ້ຢ້ຳຄືນຄຳໝັ້ນສັນຍາທາງການເມືອງສູງສຸດຕໍ່ການຮ່ວມມືໃນອ່າງແມ່ນໍ້າຂອງ, ໜ້າທີ່ ແລະພາລະບົດບາດຂອງຄະນະກຳມາທິການແມ່ນໍ້າຂອງສາກົນ ແລະ ການພັດທະນານໍ້າ ແລະ ຊັບພະຍາ ກອນທີ່ກ່ຽວຂ້ອງໃນອ່າງແມ່ນໍ້າຂອງ ຢ່າງຍຸຕິທຳ ແລະຍືນຍົງ.

ທ່ານ ນາງ ບຸນຄຳ ວໍລະຈິດ ຍັງໃຫ້ຮູ້ອີກວ່າ: ໃນໄລຍະ 28 ປີຜ່ານມາ,ຄະນະກໍາມາທິການແມ່ນໍ້າຂອງສາກົນສາມາດບັນລຸໄດ້ບັນດາໝາກຜົນອັນສຳຄັນເປັນຕົ້ນ ການສ້າງວິໄສທັດຮ່ວມກັນເພື່ອເຮັດໃຫ້ເສດຖະກິດຈະເລີນຮຸ່ງເຮືອງ,ສັງຄົມມີຄວາມຍຸຕິທຳ, ສິ່ງແວດລ້ອມມີຄວາມອຸດົມສົມບູນ ແລະທົນທານຕໍ່ສະພາບການປ່ຽນແປງຂອງດິນຟ້າອາກາດໃນອ່າງແມ່ນໍ້າຂອງ.ຜົນສຳເລັດດັ່ງກ່າວ,ແມ່ນໝາກຜົນຂອງຄວາມພະຍາຍາມຮ່ວມກັນ ແລະການຮ່ວມມືທີ່ໄວ້ເນື້ອເຊື່ອໃຈກັນຂອງທຸກປະເທດສະມາຊິກຄະນະກໍາມາທິການແມ່ນໍ້າຂອງສາກົນພາຍໃຕ້ສັນຍາແມ່ນໍ້າຂອງປີ 1995.

ອ່າງແມ່ນໍ້າຂອງເປັນໜຶ່ງໃນອ່າງຮັບນໍ້າ ທີ່ມີລະບົບນິເວດອຸດົມສົມບູນທີ່ສຸດໃນໂລກເຊິ່ງເຮັດໜ້າທີ່ປຽບເໝືອນສາຍໄຍຊີວິດຂອງປະຊາຊົນ, ທຸລະກິດ ແລະ ບັນດາລະບົບນິເວດ ໃນທຸກໆປະເທດໃນອ່າງແມ່ນໍ້າຂອງ ແລະ ຍັງເປັນດິນແດນຂອງພືດພັນນາໆຊະນິດ, ເປັນທີ່ຢູ່ອາໄສຂອງປະຊາຊົນຫລາຍກວ່າ 60 ລ້ານຄົນ ແລະ ເປັນບ່ອນເຮັດການປະມົງນໍ້າຈືດທີ່ໃຫຍ່ທີ່ສຸດຂອງໂລກເຊິ່ງສາມາດສະໜັບສະໜູນການດຳລົງຊີວິດຂອງປະຊາຊົນຫລາຍສິບລ້ານຄົນໃນພາກພື້ນອີກດ້ວຍ.

ແມ່ນໍ້າຂອງມີທັງໂອກາດໃນການພັດທະນາແບບຍືນຍົງ ແລະພ້ອມດຽວກັນກໍຍັງສິ່ງທ້າທາຍເຊິ່ງບາງສ່ວນຂອງອ່າງແມ່ນໍ້າຂອງແມ່ນໄດ້ຮັບການພັດທະນາທີ່ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດ, ຄວາມໝັ້ນຄົງທາງດ້ານຊັບພະຍາກອນນໍ້າ ແລະ ປົກປ້ອງສັງຄົມຈາກຄວາມສ່ຽງທີ່ກ່ຽວຂ້ອງກັບນໍ້າໂດຍສະເພາະແມ່ນໄພນໍ້າຖ້ວມ ແລະ ໄພແຫ້ງແລ້ງ. ເຖິງຢ່າງໃດກໍຕາມ, ບາງສ່ວນຂອງອ່າງແມ່ນໍ້າຂອງ ຍັງພົບກັບສິ່ງທ້າທາຍຈຳນວນໜຶ່ງ ເຊິ່ງອາດສົ່ງຜົນກະທົບດ້ານລົບ. ໃນຂະນະທີ່ພວກເຮົາມີຄວາມປິຕິຍິນດີຕໍ່ກັບ ການຂະຫຍາຍຕົວດ້ານເສດຖະກິດ ແລະ ຊີວິດການເປັນຢູ່ຂອງປະຊາຊົນທີ່ນັບມື້ນັບດີຂຶ້ນເປັນກ້າວໆ ເຊິ່ງເຮັດໃຫ້ພາກພື້ນມີຊີວິດຊີວານັ້ນພວກເຮົາຈໍາເປັນຕ້ອງສ້າງແນວທາງໃໝ່ສຳລັບການຄຸ້ມຄອງ ແລະການພັດທະນາຊັບພະຍາກອນນໍ້າໃນອ່າງແມ່ນໍ້າຂອງໃຫ້ມີຄວາມສົມດຸນ ແລະ ເໝາະສົມຍິ່ງໆຂຶ້ນໄປໂດຍສະເພາະການຫັນເປັນອຸດສະຫະກຳ ແລະການເພີ່ມຂຶ້ນສູງຂອງຈຳນວນປະຊາກອນແມ່ນໄດ້ສ້າງພາລະອັນໜັກໜ່ວງໃຫ້ແກ່ຊັບພະຍາກອນທຳມະຊາດຢ່າງຫລີກລ້ຽງບໍ່ໄດ້.

ການຮັບຮອງ ແລະຈັດຕັ້ງປະຕິບັດຍຸດທະສາດການພັດທະນາອ່າງແມ່ນໍ້າຂອງ ສົກປີ 2021-2030 ແລະແຜນຍຸດທະສາດ ສົກປີ 2021-2025 ໄດ້ສະແດງໃຫ້ເຫັນເຖິງຄວາມພະຍາຍາມອັນສູງສົ່ງຂອງຄະນະກຳມາທິການແມ່ນໍ້າຂອງສາກົນເພື່ອບັນລຸການຟື້ນຟູສິ່ງແວດລ້ອມ, ສັງຄົມ ແລະເສດຖະກິດຂອງອ່າງແມ່ນໍ້າຂອງຢ່າງຮີບດ່ວນ.
ທີ່ມາ: ພາບ-ຂ່າວ: ທະນູທອງ, ເກດສະໜາ

แชร์