ສທຍ ຢ້ງມຢາມສາມແຂວງພາກເຫນືອຕາມຮອຍເສດຖະກິດເສັ້ນທາງລົດໄຟລາວຈີນ

ໃນລະຫວ່າງວັນທີ 28-31 ມີນາ 2023 ທີ່ຜ່ານມາສະມາຄົມນັກທຸລະກິດແມ່ຍິງ (ສທຍ) ໄດ້ຈັດຕັ້ງການທົວເຄື່ອນໄຫວວຽກງານຢູ່ 3 ແຂວງພາກເໜືອ (ຫລວງນໍ້າທາ, ອຸດົມໄຊ ແລະຫລວງພະບາງ) ພາຍໃຕ້ການນໍາພາຂອງທ່ານ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ທັງເປັນຮອງປະທານສະພາການຄ້າ ແລະ ອຸດສະຫະກໍາແຫ່ງຊາດ. ພ້ອມນັ້ນຍັງມີຮອງປະທານ ສທຍ,ປະທານພ້ອມດ້ວຍຄະນະທີ່ປຶກສາ ສທຍ ຂັ້ນສູນກາງ, ປະທານ ແລະ ຄະນະບໍລິຫານ ສທຍ ນະຄອນຫລວງວຽງຈັນ, ຂັ້ນແຂວງ 4 ແຂວງ. ພ້ອມດ້ວຍສະມາຊິກຈາກຂັ້ນສູນກາງ, ນະຄອນຫລວງວຽງຈັນ, ແຂວງຄໍາມ່ວນ, ສະຫວັນນະເຂດ, ສາລະວັນ ແລະຈໍາປາສັກ ລວມທັງໝົດ 57 ຄົນ

- ຈຸດປະສົງຂອງການເຄື່ອນໄຫວມີດັ່ງນີ້:

1) ເພື່ອໃຫ້ສະມາຊິກນັກທຸລະກິດຍິງໄດ້ມີໂອກາດພົບປະຢ້ຽມຢາມ, ແລກປ່ຽນການດໍາເນີນທຸລະກິດເຊິ່ງກັນ ແລະກັນໃນຍຸກເຊື່ອມໂຍງທາງເສດຖະກິດພາຍໃຕ້ຄໍາຂວັນ “ຕາມຮອຍ ເສດຖະກິດ ໜຶ່ງແລວທາງ ໜຶ່ງເສັ້ນທາງ ລົດໄຟລາວ-ຈີນ”.
2) ເພື່ອໃຫ້ຜູ້ເຂົ້າຮ່ວມໄດ້ບົດຮຽນທີ່ຫລາກຫລາຍຈາກອໍານາດການປົກຄອງ, ສະຫະພັນແມ່ຍິງ, ສະພາການຄ້າ ແລະອຸດສະຫະກໍາ ຈາກ 3 ແຂວງພາກເໜືອດັ່ງກ່າວໃນສະພາບການປ່ຽນແປງໃໝ່ທາງດ້ານເສດຖະກິດ.
3) ເພື່ອໃຫ້ຜູ້ເຂົ້າຮ່ວມມີໂອກາດປຶກສາຫາລື, ຖອດຖອນບົດຮຽນ ແລະວາງແຜນທຸລະກິດຂອງຕົນໃນຕໍ່ໜ້າ, ເພື່ອຮອງຮັບສະພາບໃນຍຸກເຊື່ອມໂຍງສາຍທາງລົດໄຟຄວາມໄວສູງໃນຊຸມປີຕໍ່ໜ້າ.
4) ເພື່ອສືບຕໍ່ເຕົ້າໂຮມຄວາມສາມັກຄີ, ສ້າງຄວາມເຂັ້ມແຂງໃຫ້ສະມາຊິກຂອງສະມາຄົມທຸລະກິດແມ່ຍິງບັນດາແຂວງໃນຂອບເຂດທົ່ວປະເທດ.
ສະຖານທີ່ທີ່ໄປເຄື່ອນໄຫວຄັ້ງນີ້ຄື: ເຄື່ອນໄຫວຢ້ຽມຢາມແລກປ່ຽນບົດຮຽນນໍານັກທຸລະກິດແມ່ຍິງແຂວງຫລວງນໍ້າທາ(ທີ່ເຂັ້ມແຂງແລ້ວ) ຈາກນັ້ນໄດ້ໄປເຂດເສດຖະກິດພິເສດບໍ່ເຕ່ນແດນງາມ, ອ່າງເກັບນໍ້າ ໜຶ່ງໃນໂຄງການພັດທະນາບໍ່ເຕ່ນແດນງາມ. ສ່ວນ 2 ແຂວງ ອຸດົມໄຊ ແລະຫລວງພະບາງ ແມ່ນຄະນະນໍາຂອງສະມາຄົມ ໄດ້ເຂົ້າພົບການນໍາຂັ້ນແຂວງການນໍາສະຫະພັນແມ່ຍິງ, ພະແນກການຄ້າ ແລະສະພາການຄ້າແຂວງ, ສະເໜີເຖິງພາກສ່ວນດັ່ງກ່າວໃຫ້ສະໜັບສະໜູນ ແລະເອື້ອອໍານວຍຄວາມສະດວກໃຫ້ນັກທຸລະກິດແມ່ຍິງຂອງສອງແຂວງດັ່ງກ່າວໃຫ້ໄດ້ຮັບການສ້າງຕັ້ງສະມາຄົມຢ່າງເປັນທາງການ.
ຜ່ານການທັດສະນະສຶກສາຕົວຈິງໃຫ້ເຮົາເຫັນວ່າກ່ອນອື່ນຈະຕ້ອງສ້າງແນວຄວາມຄິດໃຫ້ນັກທຸລະກິດແມ່ຍິງພວກເຮົາ, ຫັນປ່ຽນມູມມອງໃໝ່, ຕ້ອງປະຕິຮູບແນວແນວຄິດເກົ່າ, ນໍາເອົາເຕັກນິກວິທະຍາສາດໃໝ່ເຂົ້າໃນການຜະລິດເປັນສິນຄ້າສົ່ງອອກໃຫ້ນັບມື້ນັບຂະຫຍາຍຢ່າງກວ້າງຂວາງ, ຮັບປະກັນໃຫ້ປະຊາຊົນໄດ້ມີວຽກເຮັດງານທໍາ, ຫລຸດພົ້ນອອກຈາກຄວາມທຸກຍາກ.

ຕ້ອງຊອກຄູ່ຄ້າທີ່ໃຫຍ່ ແລະທັນສະໄໝກວ່າໂດຍສະເພາະແມ່ນກຽມຄວາມພ້ອມໃນການຜະລິດສະບຽງອາຫານ ແລະນໍ້າປັບປຸງການບໍລິການທີ່ປິ່ນອ້ອມການທ່ອງທ່ຽວທຸກຂະແໜງການ, ພັດທະນາໂຄງລ່າງພື້ນຖານໃຫ້ເປັນຮູບປະທໍາ, ສ້າງຄວາມສະດວກໃຫ້ແກ່ການລົງທຶນທີ່ນັບມື້ນັບຂະຫຍາຍຕົວ. ເພື່ອຮອງຮັບນັກທ່ອງທ່ຽວຕ່າງປະເທດທີ່ພວມຫລັ່ງໄຫລເຂົ້າມາ ສປປ ລາວ ນັບມື້ຫລາຍຂຶ້ນ.

ພ້ອມກັນນັ້ນການໄປທັດສະນະສຶກສາຄັ້ງໃຫຍ່ນີ້ແມ່ນໄດ້ຄວາມສາມັກຄີເປັນກ້ອນກໍາລັງລະຫວ່າງຄະນະ ແລະສະມາຊິກ ສທຍ ແຂວງຕ່າງໆດ້ວຍກັນ. ໄດ້ໃຫ້ໂອກາດສະມາຊິກໄດ້ເກັບກ່ຽວບົດຮຽນ ແລະປະສົບການທັງໄດ້ແລກປ່ຽນຂໍ້ມູນດ້ານທຸລະກິດເຊິ່ງກັນແລະກັນ,ສ້າງໃຫ້ສະມາຊິກນັກທຸລະກິດທີ່ເຂົ້າຮ່ວມມີຄວາມເຂັ້ມແຂງ ແລະມີປະສົບການຫລາຍຍິ່ງຂຶ້ນ.

แชร์