ກະຊວງການເງິນ ປາຖະກະຖາຫວນຄືນມູນເຊື້ອສອງວັນປະຫວັດສາດ

ກະຊວງການເງິນ ຈັດປາຖະກະຖາວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22 ມີນາ 1955-22 ມີນາ 2023) ແລະວັນນັກຮົບເສຍອົງຄະ ແລະເສຍສະຫລະຊີວິດເພື່ອປະເທດຊາດ ຄົບຮອບ 77 ປີ (21 ມີນາ 1946-21ມີນາ 2023)ໂດຍການປາຖະກະຖາຂອງສະຫາຍ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ມີສະຫາຍ ບຸນປອນ ວັນນະຈິດ ຮອງເລຂາຄະນະບໍລິຫານງານພັກ,ຮອງລັດຖະມົນຕີກະ ຊວງການເງິນ, ມີຄະນະບໍລິຫານງານພັກກະຊວງ,ເລຂາ-ຮອງເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກຮາກຖານ ແລະສະມາຊິກພັກຂັ້ນຮອງຫົວໜ້າພະແນກເຂົ້າຮ່ວມ.

ການຈັດປາຖະກະຖາຄັ້ງນີ້, ເພື່ອເຮັດໃຫ້ສະມາຊິກພັກ-ພະນັກງານກະຊວງການເງິນມີຄວາມຮັບຮູ້, ເຂົ້າໃຈຢ່າງຖືກຕ້ອງກ່ຽວກັບມູນເຊື້ອ ແລະໄຊຊະນະອັນຍິ່ງໃຫຍ່ຂອງການປະຕິວັດ ພາຍໃຕ້ ການນຳພາ-ຊີ້ນຳຂອງພັກປະຊາຊົນ ປະຕິວັດລາວ ຕະຫລອດໄລຍະ 68 ປີຜ່ານມາ ແລະ ລະນຶກວັນນັກຮົບເສຍອົງຄະ ແລະເສຍສະຫລະຊີວິດ ເພື່ອປະເທດຊາດຄົບຮອບ 77 ປີ, ເພື່ອສືບຕໍ່ເສີມຂະ ຫຍາຍມູນເຊື້ອ ແລະ ທາດແທ້ຂອງພັກເຮົາ ເຂົ້າໃນການນຳພາ-ຊີ້ນຳຈັດຕັ້ງປະຕິບັດພາລະກິດປ່ຽນ ແປງໃໝ່ ໂດຍສະເພາະການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກໃຫ້ສໍາເລັດຜົນ; ເພື່ອສືບຕໍ່ບຸກທະລຸທາງດ້ານແນວຄິດຈິນຕະນາການ, ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ,ຮອບດ້ານ, ສົ່ງເສີມດ້ານດີ, ແກ້ໄຂບັນດາຂໍ້ຄົງຄ້າງ ແລະສິ່ງທ້າທາຍຕ່າງໆ, ສ້າງຄວາມເຊື່ອໝັ້ນຂອງພະນັກງານຕໍ່ການນຳພາຂອງພັກ ແລະ ການຄຸ້ມຄອງຂອງລັດ; ເພື່ອສ້າງຄວາມຮັບຮູ້ຢ່າງເລິກເຊິ່ງເຖິງຄວາມປີຊາສາມາດ ແລະ ຄວາມສະຫລາດຫລັກແຫລມຂອງພັກເຮົາໃນການນຳພາຂະບວນການຕໍ່ສູ້ປົດປ່ອຍຊາດກໍຄືການນໍາພາປະຕິບັດ 2 ໜ້າທີ່ຍຸດທະສາດຄື ປົກປັກຮັກສາ ແລະສ້າງສາພັດທະນາປະເທດຊາດຕາມທິດສັງຄົມນິຍົມ.

ໂອກາດນີ້, ສະຫາຍ ສົມສະຫວາດ ເລັ່ງສະຫວັດ ກໍໄດ້ປາຖະກະຖາກ່ຽວກັບມູນເຊື້ອວັນສ້າງ ຕັ້ງພັກປະຊາຊົນ ປະຕິວັດລາວ ໂດຍໄດ້ຍົກໃຫ້ເຫັນປະຫວັດການກໍາເນີດ, ທີ່ຕັ້ງ ແລະ ພາລະບົດບາດ; ທາດແທ້ຂອງພັກປະຊາຊົນປະຕິວັດລາວ,ຊຶ່ງເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດຂອງຊົນຊັ້ນກໍາມະກອນ,ຊາວຜູ້ອອກແຮງງານລາວທີ່ຮັກຊາດ ແລະຂອງຊາດລາວທັງໝົດ;ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ ແລະມູນເຊື້ອອັນດີງາມຂອງພັກເປັນພື້ນຖານແນວຄິດ,ທິດສະດີ ຂອງພັກ, ອຸດົມການ, ພາລະກິດ ກໍຄື ຜົນງານການນໍາພາຂອງພັກຕະຫລອດໄລຍະ 68 ປີ ຜ່ານມາ, ຊຶ່ງເລີ່ມຈາກພັກນໍາພາການຕໍ່ສູ້ປົດປ່ອຍຊາດ, ພັກນໍາພາປົກປັກຮັກສາ ແລະ ສ້າງສາປະເທດຊາດ, ພັກນໍາພາຈັດຕັ້ງປະຕິບັດແນວທາງປ່ຽນແປງໃໝ່ຈົນຮອດປັດຈຸບັນ. ນອກຈາກນັ້ນ, ຍັງໄດ້ຍົກໃຫ້ເຫັນເຖິງມູນເຊື້ອແຫ່ງການນຳພາ-ຊີ້ນໍາ ຂອງຄະນະພັກແຄວ້ນລາວໃນເມື່ອກ່ອນ, ການປຸກລະດົມຂົນຂວາຍປະຊາຊົນຢູ່ບັນດາແຂວງ ລຸກຮືຂຶ້ນຢຶດອໍານາດການປົກຄອງຂອງຈັກກະພັດຜູ້ຮຸກຮານ; ມູນ ເຊື້ອຄວາມສາມັກຄີເປັນຈິດໜຶ່ງໃຈດຽວ ເດັດດ່ຽວຕໍ່ສູ້ຢ່າງອົງອາດກ້າຫານ ເພື່ອຍາດເອົາເອກະລາດ ແລະ ອິດສະຫລະພາບມາໃຫ້ປະເທດຊາດ, ຊຶ່ງເຫດການຕໍ່ສູ້ໃນວັນທີ 21 ມີນາ 1946 ຢູ່ເມືອງທ່າແຂກໄດ້ກາຍເປັນເຫດການປະຫວັດສາດ ແຫ່ງການຕໍ່ສູ້ພິລະອາດຫານຂອງປະຊາຊົນລາວ ແລະ ກາຍເປັນກະແສຟອງໃຫ້ແກ່ການປະຕິວັດຊາດ ປະຊາທິປະໄຕຂອງພວກເຮົານັບມື້ເປັນຂະບວນການກວ້າງຂວາງ ແລະ ກ້າວໄປສູ່ການປົດປ່ອຍຊາດຢ່າງສົມບູນ.

ໃນໂອກາດນີ້, ສະຫາຍ ສົມສະຫວາດ ເລັ່ງສະຫວັດ ໄດ້ຮຽກຮ້ອງໃຫ້ບັນດາສະຫາຍຄະນະບໍລິຫານງານພັກ, ຄະນະພັກຮາກຖານ, ຄະນະໜ່ວຍພັກຮາກຖານ ແລະ ສະມາຊິກພັກເອົາໃຈໃສ່ເສີມຂະຫຍາຍມູນເຊື້ອດັ່ງກ່າວເຂົ້າໃນການເຄື່ອນໄຫວຊີ້ນໍາ-ນຳພາວຽກງານຕົວຈິງ ໂດຍໃຫ້ເພີ່ມທະວີການສຶກສາອົບຮົມການເມືອງ-ແນວຄິດໃຫ້ມີຄວາມໜັກແໜ້ນເຂັ້ມແຂງ,ເອົາໃຈໃສ່ຍູ້ແຮງການຜະລິດສ້າງເສດຖະກິດກຸ້ມຕົນເອງໃຫ້ກາຍເປັນແບບຢ່າງພ້ອມທັງສຸມໃສ່ພັດທະນາສີມືແຮງງານໃຫ້ມີຄຸນນະພາບ, ເອົາໃຈໃສ່ປັບປຸງປົວແປງຮັກສາລະບົບການເມືອງ, ສ້າງໜ່ວຍພັກປອດໃສເຂັ້ມແຂງໜັກແໜ້ນເພື່ອຍົກສູງມູນເຊື້ອອັນສະຫງ່າງາມຂອງພັກປະຊາຊົນປະຕິວັດລາວ, ເສີມຂະຫຍາຍມູເຊື້ອອັນສະຫງ່າງາມຂອງພັກເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງພາກທີ່ສ່ວນຕົນຮັບຜິດຊອບໃຫ້ສໍາເລັດຕາມແຜນການໂດຍສະເພາະການຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກຂັ້ນຂອງຕົນໃຫ້ບັນລຸຕາມຄາດໝາຍທີ່ວາງໄວ້.
ຂ່າວ-ພາບ: ກະຊວງການເງິນ

แชร์