ລາວ-ຈີນ ລົງນາມສັນຍາຮ່ວມທຸລະກິດ 4 ໂຄງການໃຫຍ່ ຕິດພັນກັບບໍ່ແຮ່, ກະສິກຳ ແລະຂົນສົ່ງ

ພິທີເຊັນສັນຍາຮ່ວມທຸລະກິດ ລະຫວ່າງບໍລິສັດຂອງລາວ - ສປຈີນ ຈັດຂື້ນວັນທີ 31 ມີນາຜ່ານມາ, ທີ່ນະຄອນຫຼວງວຽງຈັນ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ຜູ້ຕາງໜ້າກະຊວງປ້ອງກັນປະເທດ ເເລະພາກສ່ວນທີ່ກ່ຽວຂ້ອງສອງຝ່າຍລາວ-ຈີນເຂົ້າຮ່ວມ.

ການເຊັນສັນຍາຄັ້ງນີ້ກວມເອົາ 4 ໂຄງການຄື: ໂຄງການລົງທຶນພັດທະນາແຮ່ທອງ ແລະແຮ່ຕິດພັນ, ໂຄງການຮ່ວມທຸລະກິດດ້ານການຄ້າກະສິກຳ ແລະແຮ່ທາດ, ໂຄງການຮ່ວມລົງທຶນການຜະລິດ, ສະໜອງ -ຈຳໜ່າຍມັນຕົ້ນ ແລະ ຜະລິດຕະພັນກະສິກຳທີ່ຕິດພັນ ຢູ່ ສປປ ລາວ ແລະ ໂຄງການຮ່ວມມືຍຸດທະສາດການຂົນສົ່ງປະເທດລາວ. ສໍາລັບໂຄງການທີ 1 ລົງນາມ ໂດຍ ທ່ານ ວັນທອງ ສິດທິກຸນ ຜູ້ອໍານວຍການ ລັດວິສາຫະກິດ DAI ແລະ ທ່ານ ຄໍານ້ອຍ ສຸກຂະວົງ ຜູ້ອໍານວຍການ ບໍລິສັດ KPS ພັດທະນາແຮ່ທາດ ຈຳກັດ ແລະ ທ່ານ QIU GE ປະທານກຸ່ມບໍລິສັດ Panasia Investment and Development Group Co., Ltd (SPSI) ແລະໂຄງການອື່ນໆ.

ໂອກາດນີ້,ທ່ານ ວັນທອງ ສິດທິກຸນ ກ່າວວ່າ: ນັບແຕ່ລັດວິສາຫະກິດ DAI ກັບ ບໍລິສັດ KPS ພັດທະນາແຮ່ທາດ ຈໍາກັດ ແລະກຸ່ມບໍລິສັດ SPSI ສປ ຈີນ ໄດ້ລົງນາມບົດບັນທຶກຄວາມເຂົ້າໃຈນໍາກັນ ໃນເດືອນກໍລະກົດ 2022 ເປັນຕົ້ນມາ ຢູ່ນະຄອນຫຼວງວຽງຈັນ, ທັງ 3 ບໍລິສັດ ກໍໄດ້ຮີບຮ້ອນເຄື່ອນໄຫວດໍາເນີນເອກະສານ ແລະເກັບກໍາຂໍ້ມູນກ່ຽວກັບໂຄງການຕ່າງໆທີ່ 3 ຝ່າຍມີຄວາມພ້ອມ ເຊັ່ນ: ໂຄງການກະສິກໍາ ແລະ ປຸງແຕ່ງກະສິກໍາ, ໂຄງການຂົນສົ່ງ-ໂລຈິສຕິກ ແລະ ໂຄງການພັດທະນາແຮ່ທາດຄົບວົງຈອນ, ໃນນີ້ພິເສດກວ່າໝູ່ທີ່ມີຄວາມຄືບໜ້າແມ່ນໂຄງການເກັບກໍາຂໍ້ມູນຮອບດ້ານກ່ຽວກັບແຮ່ທອງຢູ່ເຂດເມືອງໝື່ນ ແຂວງວຽງຈັນ ເພື່ອຂໍອະນຸຍາດສໍາປະທານຊອກຄົ້ນ-ສໍາຫຼວດ ກ່ຽວກັບແຮ່ທອງ ແລະແຮ່ຕິດພັນ ເຂດທີ 1 ເນື້ອທີ່ 8,6 ກິໂລຕາແມັດ ຢູ່ບ້ານໂພນຕ້ອງ, ບ້ານກ້ອນຄໍາ ແລະເຂດທີ 2 ເນື້ອທີ່ 175,84 ກິໂລຕາແມັດ ຢູ່ບ້ານນາຍາວ, ບ້ານນໍ້າເພີນ ແລະບ້ານບົວນາ, ເມືອງໝື່ນ ແຂວງວຽງຈັນ ຕາມລະບຽບ ແລະຫຼັກການທີ່ລັດຖະບານລາວກໍານົດໄວ້.

ໃນຂະນະດຽວກັນ, ທ່ານ ຄໍາພັນ ສິດທິດຳພາ ກ່າວວ່າ: ແຂວງວຽງຈັນ ຍັງມີຫຼາຍຂົງເຂດທີ່ມີທ່າແຮງໃນການພັດທະນາຊຶ່ງມີຄວາມຕ້ອງການຄູ່ຮ່ວມພັດທະນາຈາກພາຍໃນ ແລະຕ່າງປະເທດ ໂດຍສະເພາະນັກລົງທຶນຈາກ ສປ ຈີນ ກໍ່ຄືຈາກແຂວງເສສວນ, ແຂວງວຽງຈັນ ຍິນດີໃຫ້ນັກລົງທຶນຈາກແຂວງເສສວນເຂົ້າມາສຶກສາເກັບກໍາຂໍ້ມູນ ແລະສໍາຫຼວດສະພາບການເງື່ອນໄຂຕ່າງໆ ເຊິ່ງຈະເປັນການປະກອບສ່ວນໃນການເພີ່ມທະວີຄວາມສາມາດດ້ານການຄ້າການຜະລິດສິນຄ້າສົ່ງອອກ ແລະອື່ນໆ ປະກອບສ່ວນໃນການຄ້າຕາມແລວທາງດ່ວນ ລາວ-ຈີນ ກໍ່ຄືທາງລົດໄຟ ລາວ-ຈີນ ເຊິ່ງຈະເປັນການປະກອບສ່ວນອັນໃຫຍ່ຫຼວງໃຫ້ການສ້າງລາຍຮັບທັງເປັນການສ້າງວຽກເຮັດງານທໍາໃຫ້ປະຊາຊົນຊາວແຂວງວຽງຈັນເຮັດໃຫ້ເຂົາເຈົ້າມີຊີວິດການເປັນຢູ່ນັບມື້ນັບດີຂຶ້ນເທື່ອລະກ້າວ.
ທີ່ມາ: CRI-FM93

แชร์