ລາວໄດ້ລາງວັນທີ 1 ໝວດເຄື່ອງວັດແທກຄວາມຊຸ່ມຂອງດິນ

ຄະນະນັກສຶກສາ ພາກວິຊາວິສະວະກຳຄອມພີວເຕີ ແລະເຕັກໂນໂລຊີຂໍ້ມູນຂ່າວສານ ຄະນະວິສະວະກຳສາດ ມະຫາວິທະຍາໄລແຫ່ງຊາດ ໄດ້ຮັບລາງວັນທີ 1 ໝວດເຄື່ອງມືວັດແທກຄວາມຊຸ່ມຂອງດິນໃນການແຂ່ງຂັນພາຍໃຕ້ໂຄງການແຂ່ງຂັນເຕັກໂນໂລຊີການຕິດຕາມແມ່ນໍ້າຂອງ (MRC River Monitoring Technology Competition).

ໂຄງການແຂ່ງຂັນເຕັກໂນໂລຊີການຕິດຕາມແມ່ນໍ້າຂອງມີການແຂ່ງຂັນ 4 ໝວດຄື: ເຄື່ອງວັດແທກຄວາມຊຸ່ມຂອງດິນ (Soil Moisture), ເຄື່ອງກວດກາລະດັບນໍ້າ, (Water Level), ເຄື່ອງວັດລະດັບຝົນຕົກ ( Rainfall) ແລະເຄື່ອງວັດແທກຄຸນນະພາບນໍ້າ (Water Quality), ໂດຍມີທັງໝົດ 14 ທີມ ຈາກ 11 ມະຫາວິທະຍາໄລ/ວິທະຍາໄລ ຈາກ 4 ປະເທດ ຄື: ລາວ, ໄທ, ຫວຽດນາມ ແລະກຳປູເຈຍ ເຂົ້າຮ່ວມຊຶ່ງໄດ້ເລີ່ມແຂ່ງຂັນມາແຕ່ ເດືອນຕຸລາ ປີ 2022 ແລະ ກໍໄດ້ມີງານ MRC Pitching Workshop ທີ່ບາງກອກປະເທດໄທ ໃນເດືອນມັງກອນ ປີ 2023. ຈາກນັ້ນ, ກໍໄດ້ມີການໃຫ້ຂຶ້ນນໍາສະເໜີໃນວັນທີ 30-31 ມີນາ 2023 ທີ່ກອງເລຂາກໍາມາທິການແມ່ນໍ້າ Mekong River Commission Secretariat.

ຜົນການແຂ່ງຂັນ, ທີມ (ຄະນະ) ນັກສຶກສາຂອງສະຖາບັນການສຶກສາລາວ ໄດ້ສ້າງຜົນງານຢ່າງໂດດເດັ່ນໃນນີ້ຄະນະນັກສຶກສາພາກວິຊາວິສະວະກຳຄອມພີວເຕີ ແລະ ເຕັກໂນໂລຊີຂໍ້ມູນຂ່າວສານຄະນະວິສະວະກຳສາດ ມະຫາວິທະຍາໄລແຫ່ງຊາດ ໄດ້ຮັບລາງວັນທີ 1 ໝວດເຄື່ອງມືວັດແທກຄວາມຊຸ່ມຂອງດິນ ໄດ້ຮັບຫຼຽນ, ໂລ້ກຽດຕິຄຸນ ແລະເງິນລາງວັນ 5.000 ໂດລາ; ຄະນະນັກສຶກສາຈາກ ຄະນະວິທະຍາສາດສິ່ງແວດລ້ອມ ມ.ຊ ໄດ້ຮັບລາງວັນທີ 2 ໝວດເຄື່ອງມືວັດແທກຄຸນນະພາບນໍ້າ ໄດ້ຮັບຫຼຽນລາງວັນ ແລະເງິນ 1.000 ໂດລາ ແລະນັກສຶກສາຈາກວິທະຍາໄລສຸດສະກະໄດ້ຮັບລາງວັນທີ 2 ໝວດເຄື່ອງມືວັດລະດັບນໍ້າຝົນໄດ້ຮັບຫຼຽນລາງວັນ ແລະ ເງິນ 1.000 ໂດລາ.

ພິທີມອບລາງວັນໂຄງການແຂ່ງຂັນເຕັກໂນໂລຊີການຕິດຕາມແມ່ນໍ້າຂອງໄດ້ຈັດຂຶ້ນໃນວັນທີ 3 ເມສານີ້ ທີ່ຫໍປະຊຸມແຫ່ງຊາດນະຄອນຫຼວງວຽງຈັນ ໂດຍມີທ່ານ ອານຸລັກ ກິດຕິຄຸນ (Anoulak Kittikhoun) ຫົວໜ້າກອງເລຂາຄະນະກຳມາທິການແມ່ນໍ້າຂອງສາກົນພ້ອມດ້ວຍທຸກພາກສ່ວນກ່ຽວຂ້ອງເຂົ້າຮ່ວມມອບລ່າງວັນ.
ພາບ-ຂ່າວ: ສຸກສະຫວັນ - ສໍານານ

แชร์