ກອງປະຊຸມສຳມະນາທິດສະດີ ລະຫວ່າງ ພັກປະຊາຊົນ ປະຕິວັດລາວ ແລະພັກກອມມນິດຈີນ ຄັ້ງທີ X

ໃນຕອນເຊົ້າວັນທີ 4 ເມສານີ້, ສະພາທິດສະດີສູນກາງພັກປະຊາຊົນ ປະຕິວັດລາວ ໄດ້ຈັດກອງປະຊຸມສຳມະນາທິດສະດີ ສອງພັກ ລາວ-ຈີນ ຄັ້ງທີ X ໂດຍຜ່ານວິດີໂອທາງໄກ, ພາຍໃຕ້ຫົວຂໍ້ “ບົດຮຽນໃນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນຂ່າວສານ” ທີ່ຫ້ອງປະຊຸມໂຮງແຮມດອນຈັນພາເລດນະຄອນຫຼວງວຽງຈັນ,ໂດຍການເປັນປະທານຮ່ວມເປີດກອງປະຊຸມຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ແລະສະຫາຍ ສົມພອນ ສີຈະເລີນ ຮອງຫົວໜ້າຄະນະພົວພັນຕ່າງປະເທດສູນກາງພັກ, ເຂົ້າຮ່ວມກອງປະຊຸມໃນຄັ້ງນີ້ຍັງມີບັນດາສະຫາຍພະນັກງານການນໍາຂັ້ນສູງ,ທີ່ປຶກສາສະພາທິດສະດີສູນກາງພັກ,ບັນດາສະຫາຍຄະນະປະຈໍາສະພາທິດສະດີສູນກາງພັກ,ສະມາຊິກສະພາທິດສະດີສູນກາງພັກ, ບັນດານັກວິທະຍາສາດ, ນັກທິດສະດີ, ບັນດາຜູ້ຕາງໜ້າຈາກຄະນະພັກກະຊວງ-ອົງການ ແລະພະນັກງານຫຼັກແຫຼ່ງອ້ອມຂ້າງສູນກາງເຂົ້າຮ່ວມ.

ໃນກອງປະຊຸມສະຫາຍ ໂກ່ວ ເຢ້ໂຈ່ວ ຮອງຫົວໜ້າ ຄະນະພົວພັນຕ່າງປະເທດສູນກາງພັກກອມມູນິດຈີນໄດ້ກ່າວເປີດກອງປະຊຸມ ໂດຍຜ່ານວິດີໂອທາງໄກຈາກ ສປ ຈີນ, ສະຫາຍ ຫຼີ ຊູເຫຼີຍ ກໍາມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາສູນກາງພັກກອມມູນິດຈີນ ໄດ້ຂຶ້ນກ່າວມີຄໍາເຫັນ. ຈາກນັ້ນ, ສະຫາຍ ນາງ ສີໃສ ລືເດດມູນສອນ ກໍໄດ້ກ່າວມີຄໍາເຫັນ ໃນຫົວຂໍ້ “ພັກປະຊາຊົນ ປະຕິວັດລາວ ນໍາພາການຄຸຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝຂໍ້ມູນຂ່າວສານ” ຊຶ່ງໄດ້ຍົກໃຫ້ເຫັນຄວາມໝາຍສໍາຄັນໂດຍສະເພາະເນື່ອງໃນໂອກາດຄົບຮອບ 10 ປີແຫ່ງການພົວພັນຮ່ວມມືໃນການຄົ້ນຄວ້າທິດສະດີ ແລະ ພຶດຕິກໍາລະຫວ່າງພັກປະຊາຊົນ ປະຕິວັດລາວ ແລະພັກກອມມູນິດຈີນ,ການສໍາມະນາທິດສະດີຮ່ວມກັນຜ່ານມາແມ່ນມີຫຼາຍເນື້ອໃນທີ່ອຸດົມສົມບູນ, ປະກອບ ສ່ວນໃຫ້ຄໍາປຶກສາແກ່ສູນກາງພັກໃນການວາງແນວທາງ, ແຜນນະໂຍບາຍ ຂອງພັກ-ລັດ. ສະນັ້ນກອງປະຊຸມສໍາມະນາທິດສະດີສອງພັກລາວ-ຈີນ ໃນຄັ້ງນີ້ ໄດ້ດໍາເນີນພາຍໃຕ້ຫົວຂໍ້: “ບົດຮຽນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນຂ່າວສານ” ຊຶ່ງເປັນໄລຍະທີ່ທົ່ວພັກ, ທົ່ວກອງທັບ, ທົ່ວປວງຊົນລາວທັງຊາດພວມພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດລາວ ໃນໄລຍະເຄິ່ງສະໄໝຢ່າງມີຜົນສໍາເລັດ, ໃນໄລຍະນີ້ພໍດີກັບໄລຍະເວລາທີ່ພັກກອມມູນິດຈີນກໍຄືປະຊາຊົນຈີນກໍາລັງຊົມເຊີຍຜົນສໍາເລັດກອງປະຊຸມຄັ້ງທີ XX ຂອງພັກ ແລະ ໄດ້ສໍາເລັດກອງປະຊຸມສະພາຜູ້ແທນປະຊາຊົນແຫ່ງຊາດຈີນ ຄັ້ງທີ XIV ທີ່ໄດ້ຮັບຮອງເອົາຄະນະນໍາ ແລະຄະນະລັດຖະບານ ສປ ຈີນ ຊຸດໃໝ່ ຢ່າງມີຜົນສໍາເລັດ ແລະມີຄວາມໝາຍທາງປະຫວັດສາດໃນການສືບຕໍ່ຊູຄັນທຸງອັນຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນເພື່ອສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ.

ກອງປະຊຸມຄັ້ງນີ້ ບັນດານັກວິທະຍາສາດ, ນັກທິດສະດີຂອງທັງສອງຝ່າຍໄດ້ຜັດປ່ຽນກັນຂຶ້ນສະເໜີບົດຄໍາເຫັນໃນຫົວຂໍ້ຍ່ອຍທີ່ປິ່ນອ້ອມບັນດາບົດຮຽນໃນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນຂ່າວສານຂອງ ສປປ ລາວ ແລະ ສປ ຈີນ ຊຶ່ງຝ່າຍລາວປະກອບມີ 3 ບົດຄື: 1). ການປະຕິບັດບົດບາດຂອງລັດໃນການຄຸ້ມຄອງສັງຄົມ ຢູ່ ສປປ ລາວ, 2). ການຄຸ້ມຄອງສັງຄົມໃນເງື່ອນໄຂການປະຕິວັດອຸດສາຫະກໍາ ຄັ້ງທີ 4 ຢູ່ ສປປ ລາວ, 3). ການຫັນເປັນທັນສະໄໝໃນການຄຸ້ມຄອງພົນລະເມືອງ ຢູ່ ສປປ ລາວ, ຝ່າຍ ສປ ຈີນ ປະກອບມີ 5 ບົດຄື: 1). ແນວຄວາມຄິດພື້ນຖານ ແລະການປະຕິບັດຕົ້ນຕໍ ໃນການປັບປຸງລະບົບການຄຸ້ມຄອງສັງຄົມໃນຍຸກສະໄໝແຫ່ງຂໍ້ມູນ - ຂ່າວ ສານ, 2). ໜ້າທີ່ສໍາຄັນ ແລະທິດທາງລວມອັນປະດິດສ້າງໃໝ່ຂອງໃນການຄຸ້ມຄອງສັງຄົມໃນຍຸກສະໄໝຂໍ້ມູນ-ຂ່າວສານ, 3). ຍົກສູງລະດັບການຄຸ້ມຄອງດ້ວຍກົດໝາຍໃນການຄຸ້ມຄອງສັງຄົມໃນຍຸກສະໄໝຂໍ້ມູນ-ຂ່າວສານ, 4). ການຄຸ້ມຄອງສັງຄົມໃນຍຸກແຫ່ງຂໍ້ມູນ-ຂ່າວສານ ແລະການປະດິດສ້າງໃໝ່ຂອງລະບົບສັງຄົມ, 5). ການລິເລີ່ມ ແລະພຶດຕິກໍາຂອງວຽກງານມະຫາຊົນໃນຍຸກສະໄໝໃໝ່. ພ້ອມດຽວກັນນັ້ນ, ຄະນະຜູ້ແທນຂອງທັງສອງຝ່າຍຍັງໄດ້ຜັດປ່ຽນກັນໃນການແລກປ່ຽນ ແລະຖອດຖອນບົດຮຽນບັນຫາຕ່າງໆທີ່ທັງສອງຝ່າຍໃຫ້ຄວາມສົນໃຈ.

ກອງປະຊຸມໄດ້ມີຄວາມເປັນເອກະພາບສູງຊີ້ໃຫ້ເຫັນວ່າ: ໃນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານ ໂດຍພາຍໃຕ້ການນໍາພາອັນເຂັ້ມແຂງຂອງພັກ, ພັກຍັງມີບົດບາດຕັດສິນຊີ້ຂາດໃຫ້ແກ່ໄຊຊະນະຂອງການປະຕິວັດສັງຄົມນິຍົມ, ພັກກອມມູນິດກັບສັງຄົມນິຍົມແມ່ນອົງປະກອບເອກະພາບທີ່ບໍ່ສາມາດຕັດແຍກອອກຈາກນັ້ນໄດ້, ພັກນໍາພາເຕົ້າໂຮມກໍາລັງເພື່ອພາລະກິດອັນຍິ່ງໃຫຍ່, ນໍາພາປະຊາຊົນເດີນຕາມເສັ້ນທາງແຫ່ງຄວາມຜາສຸກ. ພັກເປັນປັດໄຈສໍາຄັນຕັດສິນໄຊຊະນະຂອງການສ້າງ ແລະບູລະນະລະບອບປະຊາທິປະໄຕປະຊາຊົນກ້າວຂຶ້ນສູ່ສັງຄົມນິຍົມເທື່ອລະກ້າວຢູ່ລາວ ແລະການສ້າງສັງຄົມນິຍົມທີ່ທັນສະໄໝຢູ່ຈີນ. ໃນນີ້ໄດ້ເອກະພາບສູງຕໍ່ຂັ້ນຕອນ, ບາດກ້າວເດີນ, ວິທີການໃນການສ້າງສັງຄົມນິຍົມ ຂອງແຕ່ລະປະເທດໂດຍເລີ່ມຈາກຈຸດພິເສດ ແລະເງື່ອນໄຂ ຂອງແຕ່ລະປະເທດ ແຕ່ຕ້ອງຢຶດໝັ້ນໃນລັກສະນະພັກ, ລັກສະນະປະດິດສ້າງ ແລະລັກສະນະສາກົນ. ບົນພື້ນຖານດ້ານທິດສະດີວິທະຍາສາດອັນນີ້ພັກກອມມູນິດຈີນ ຈຶ່ງຢັ້ງຢືນວ່າການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນຂ່າວສານແມ່ນການບູລະນະ ແລະພັດທະນາລະບອບສັງຄົມນິຍົມໃຫ້ດີຍິ່ງໆຂຶ້ນ. ໃນການດໍາເນີນພາລະກິດປ່ຽນແປງໃໝ່ຮອບດ້ານ ແລະມີຫຼັກການຂອງພັກປະຊາຊົນ ປະຕິວັດລາວ ກໍແມ່ນເສັ້ນທາງກ້າວຂຶ້ນສັງຄົມນິຍົມບົນພື້ນຖານຢຶດໝັ້ນ 6 ຫຼັກການປ່ຽນແປງໃໝ່, 9 ປະຖົມປັດໄຈ ແລະການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານແມ່ນສອດຄ່ອງກັບຈຸດພິເສດ ແລະເງື່ອນໄຂຂອງປະເທດ.
ທີ່ມາ: ສະພາທິດສະດີສູນກາງພັກ, ພາບພູວຽງຄຳ

แชร์