ກະຊວງປ້ອງກັນປະເທດລາວ ແລະຫວຽດນາມລົງສໍາຫຼວດເສັ້ນທາງໂຮ່ຈີ່ມິງຢູ່ເຊກອງ

ແຫຼ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໃນລະຫວ່າງວັນທີ 31 ມີນາ-2 ເມສາ 2023 ນີ້, ຄະນະວິຊາການກະຊວງປ້ອງກັນປະເທດລາວ ແລະ ຫວຽດນາມ ລົງສໍາຫລວດເສັ້ນທາງໂຮ່ຈີ່ມິງ ໃນຂອບເຂດແຂວງເຊກອງໂດຍມີທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ປະທານປ້ອງກັນຊາດ-ປ້ອງກັນຄວາມສະຫງົບຂັ້ນແຂວງ. ທ່ານ ພົນຈັດຕະວາ ເລຊວນຊາງ ຮອງຫົວໜ້າກົມໂຄສະນາອົບຮົມກົມໃຫຍ່ການເມືອງກອງທັບປະຊາຊົນຫວຽດນາມ, ທ່ານ ພັນເອກ ແກ້ວສຸວັນ ຜາງພິລາວົງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບປະຊາຊົນລາວ ແລະວິຊາການກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ພັນເອກ ແກ້ວສຸວັນ ຜາງພິລາວົງ ໄດ້ໃຫ້ຮູ້ວ່າ: ການລົງເຄື່ອນໄຫວສໍາຫລວດເສັ້ນທາງໂຮ່ຈີ່ມິງຢູ່ແຂວງເຊກອງ ໃນຄັ້ງນີ້ ລວມມີ 4 ຈຸດຄື: ຈຸດບ້ານໂພນເມືອງລະມາມ, ຈຸດບ້ານບາກເມືອງກະລຶມ, ຈຸດບ້ານທ່າແຕງ ເໜືອເມືອງທ່າແຕງ ແລະຈຸດບ້ານດາກລານ-ບ້ານຕຣອງເມືອງ(ບ້ານດາກຢອຍ) ເມືອງດາກຈຶງ ຊຶ່ງເປັນຮ່ອງຮອຍປະຫວັດສາດທີ່ມີຄວາມໝາຍສໍາຄັນຂອງສອງຊາດ ລາວ-ຫວຽດນາມ ເພື່ອສ້າງເປັນອະນຸສອນສະຖານໃຫ້ເຍົາວະຊົນ-ຄົນຮຸ່ນໃໝ່ ໄດ້ຮຽນຮູ້ເຖິງປະຫວັດສາດ ແລະການຮ່ວມແຮງຮ່ວມໃຈກັນຕີສັດຕູໂຕດຽວກັນຢ່າງພິລະອາດຫານ.

ທ່ານ ພັນເອກ ແກ້ວສຸວັນ ຜາງພິລາວົງ ຍັງໃຫ້ຮູ້ວ່າ: ສປປ ລາວ ແລະ ສສ ຫວຽດນາມ ກໍຄື ກອງທັບປະຊາຊົນລາວ ແລະກອງທັບປະຊາຊົນຫວຽດນາມເວລາໃດກໍໄດ້ໃຫ້ການຊ່ວຍເຫລືອເຊິ່ງກັນ ແລະກັນດ້ວຍດີຕະຫລອດມາ ໂດຍສະເພາະໃນໄລຍະການຕໍ່ສູ້ກູ້ຊາດ, ຕ້ານພວກຈັກກະພັດທັງແບບເກົ່າ ແລະແບບໃໝ່ທີ່ເຂົ້າມາຮຸກຮານສອງຊາດ ລາວ-ຫວຽດນາມ ໃນເມື່ອກ່ອນເຊິ່ງສອງກອງທັບກໍໄດ້ຮ່ວມແຮງຮ່ວມໃຈກັນຕໍ່ສູ້ຢ່າງພິລະອາດຫານຈົນເຮັດໃຫ້ສັດຕູປະລາໄຊລົງເຮັດໃຫ້ພວກເຮົາຍາດເອົາໄຊຊະນະອັນຍິ່ງໃຫຍ່ ແລະຄວາມອຸດົມສົມບູນພູນສຸກມາສູ່ປະຊາຊົນທັງສອງປະເທດຈົນເຖິງປັດຈຸບັນ.

แชร์