ບໍລິສັດ ຄຳມະນີ  ຮັບ2ລາງວັນທຸລະກິດອາຊຽນດີເດັ່ນ

        ໃນພິທີມອບ-ຮັບລາງວັນທຸລະກິດອາຊຽນດີເດັ່ນ ແຫ່ງ ສປປ ລາວ ແລະລາງວັນການພັດທະນາສີມືແຮງງານ ປະຈຳປີ 2022 ( ASEAN Business Awards Lao and Skill Development 2022 ) ເມື່ອວັນທີ 29 ມີນາ 2023 ຜ່ານມາທີ່ນະຄອນຫຼວງວຽງຈັນ  ຫນື່ງໃນນັ້ນກໍແມ່ນບໍລິສັດ ຄຳມະນີ ບໍລິການທົ່ວໄປສ່ວນບຸກຄົນ ໄດ້ຮັບ2 ລາງວັນໃນງານຄັ້ງນີ້ ໂດຍໃຫ້ກຽດມອບຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຊຶ່ງເປັນກຽດຂຶ້ນຮັບຂອງທ່ານ ຄຳມະນີ ຣາຊະພົນ ປະທານບໍລິສັດ ຄຳມະນີ ບໍລິການທົ່ວໄປສ່ວນບຸກຄົນ.

          ທ່ານ ຄຳມະນີ ຣາຊະພົນ ກ່າວວ່າ: ການທີ່ໄດ້ຮັບ2ລາງວັນທຸລະກິດອາຊຽນດີເດັ່ນໃນຄັ້ງນີ້ ປະກອບມີປະເພດລາງວັນຄື: 1.ລາງວັນທຸລະກິດຂະຫນາດນ້ອຍ ແລະກາງດີເດັ່ນ (SME ) ຂະແຫນງນະວັດຕະກຳດີເດັ່ນ ແລະ2. ລາງວັນສະຖານປະກອບການດີເດັ່ນ ຊຶ່ງນັບເປັນຄວາມພາກພູມໃຈຂອງທີມງານພວກເຮົາ ທີ່ສະແດງເຫັນເຖິງຄວາມມານະອົດທົນໃນການດຳເນີນງານຂອງພະນັກງານຂອງບໍລິສັດ ທີ່ໄດ້ພ້ອມກັນຜ່ານຜ່າຄວາມຫຍຸ້ງຍາກຈາກຫຼາຍບັນຫາຜ່ານມາ.

           ບໍລິສັດ ຄຳມະນີ ບໍລິການທົ່ວໄປ ກໍ່ຕັ້ງຂຶ້ນໃນປີ 2014, ພວກເຮົາໃຫ້ການບໍລິການທໍາຄວາມສະອາດທົ່ວໄປ ແລະ ອຸດສາຫະກຳ, ການບຳລຸງຮັກສາສວນ, ການບໍລິຫານຈັດການແມງໄມ້ ແລະ ບຳລຸງຕິດຕັ້ງ-ສ້ອມແປງແອໃນອາຄານ ແລະ ໃນປີ 2020, ສາຍທຸລະກິດຂອງພວກເຮົາໄດ້ຂະຫຍາຍໄປສູ່ ບໍລິການອາຫານ-ເຄື່ອງດື່ມ.

            ວິທີທີ່ພວກເຮົານຳພາ, ເຮັດວຽກ ແລະ ພຶດຕິກຳແມ່ນຖືກຂັບເຄື່ອນໂດຍຄຸນຄ່າຫລັກຂອງພວກເຮົາ ຄຸນຄ່າເຫຼົ່ານັ້ນມີອິດທິພົນຕໍ່ວິທີການທີ່ພວກເຮົາຕອບສະໜອງຄວາມຕ້ອງການຂອງລູກຄ້າ ໃນຂະນະທີ່ເຄົາລົບຂໍ້ກໍານົດດ້ານກົດລະບຽບ ແລະ ວິທີທີ່ພວກເຮົາສົ່ງເສີມການປະຕິບັດທີ່ມີຈັນຍະບັນພາຍໃນອົງກອນ ທີ່ໄດ້ນຳໃຊ້ລະບົບມາດຕະຖານຄຸນນະພາບກັບມາດຕະຖານດ້ານສິ່ງແວດລ້ວມ; ISO 9001:2015 ISO 14001:2015 ແລະ ຍັງມຸ່ງໝັ້ນທີ່ຈະນໍາໃຊ້ລະບົບມາດຕະຖານຄວາມປອດໄພ ແລະ ລະບົບຄວາມປອດໄພດ້ານທາງອາຫານ; OHSAS 18001 & GHP's System.

          ສຳລັບບໍລິສັດຄຳມະນີ ບໍລິການທົ່ວໄປສ່ວນບຸກຄົນ ແມ່ນໄດ້ຮັບລາງວັນຫລາຍລາງວັນນີ້ຕິດຕໍ່ກັນມາຫລາຍປີ ນັບແຕ່ປີ 2019 ເປັນຕົ້ນມາ ໂດຍບໍລິສັດຄຳມະນີ ບໍລິການທົ່ວໄປສ່ວນບຸກຄົນ ມີສຳນັກງານຕັ້ງຢູ່ບ້ານສົມຫວັງໃຕ້ ເມືອງຫາດຊາຍຟອງ ນະຄອງຫວງວຽງຈັນ.

แชร์