ເປີດແຫຼ່ງທ່ອງທ່ຽວວັດທະນະທຳລາວບ້ານນາຊາຍທອງ

  ສະຖານທີ່ທ່ອງທ່ຽວວັດທະນະທໍາລາວ ບ້ານນາຊາຍທອງ ເປັນສະຖານທີ່ທ່ອງທ່ຽວທີ່ຮວບຮວມເອົາຄວາມເປັນວັດທະນະທໍາອັນດີງາມ ແລະ ມີເອກະລັກທາງດ້ານຮີດຄອງປະເພນີຂອງລາວໃນສະໄໝກ່ອນໂດຍສະເພາະແມ່ນການແຕ່ງກາຍ, ວິຖີການດໍາລົງຊີວິດແບບຄົນບູຮານ ແລະ ອື່ນໆ ທັງນີ້ກໍເພື່ອຮັກສາໄວ້ວັດທະນະທໍາລາວໃຫ້ຄົນຮຸ່ງຫຼັງໄດ້ຮັບຮູ້ ແລະເປັນການດຶງດູດນັກທ່ອງທ່ຽວທີ່ໄດ້ມາທ່ຽວຊົມມີຄວາມປະທັບໃຈຫຼົງໄຫຼກັບວັດທະນະທໍາທີ່ເປັນເອກະລັກຂອງຊາວລາວ.

ພິທີເປີດແຫຼ່ງທ່ອງທ່ຽວດັ່ງກ່າວໄດ້ຈັດຂຶ້ນໃນວັນທີ 5 ເມສາ ທີ່ບ້ານນາຊາຍທອງເໜືອ ເມືອງນາຊາຍທອງ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ວິລະສັກ ນາມມຸນຕີ ເຈົ້າເມືອງນາຊາຍທອງ, ທ່ານ ທອງສະໝຸດ ຫຼວງລາດ ປະທານບໍລິສັດທ່ອງທ່ຽວວັດທະນະທໍາລາວ ບ້ານນາຊາຍທອງ ຈໍາກັດຜູ້ດຽວ, ມີຮອງເລຂາພັກເມືອງຄະນະປະຈໍາພັກເມືອງຫົວໜ້າຫ້ອງການອ້ອມຂ້າງເມືອງເລຂາພັກບ້ານ ແລະປະຊາຊົນເມືອງນາຊາຍທອງເຂົ້າຮ່ວມ.

  ທ່ານນາງ ການຈະນາ ຫຼວງລາດ ຮອງປະທານບໍລິສັດທ່ອງທ່ຽວວັດທະນະທໍາລາວ ບ້ານນາຊາຍທອງ ຈໍາກັດຜູ້ດຽວ ໃຫ້ຮູ້ວ່າ: ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນນະຄອນຫຼວງວຽງຈັນໄດ້ອອກໃບອະນຸຍາດລົງທຶນໃຫ້ບໍລິສັດທ່ອງທ່ຽວວັດທະນະທໍາລາວ ບ້ານນາຊາຍທອງ ຈໍາກັດຜູ້ດຽວໃນວັນທີ 27 ທັນວາ 2018 ເພື່ອເປີດເປັນແຫຼ່ງທ່ອງທ່ຽວວັດທະນະທໍາລາວ ບ້ານນາຊາຍທອງ ໃນທຶນຈົດທະບຽນ 2,55 ຕື້ກີບ, ຊຶ່ງແຫຼ່ງທ່ອງທ່ຽວດັ່ງກ່າວແມ່ນເນັ້ນໃສ່ວິຖີການດໍາລົງຊີວິດຂອງຄົນລາວໃນສະໄໝບູຮານ,ຫົວຄິດປະດິດສ້າງທາງດ້ານສິລະປະ-ຫັດຖະກໍາທີ່ເກີດມາຈາກພູມປັນຍາຂອງຊາວບ້ານ,ບັນດາງານປະເພນີທີ່ເອີ້ນວ່າຮີດ 12 ຄອງ 14, ລວມເຖິງດົນຕີທີ່ເປັນເອກກະລັກເອີ້ນວ່າສຽງແຄນລາວ, ອາຫານ, ການນຸ່ງຖື  ແລະການນໍາໃຊ້ເງິນກີບລາວທີ່ຜະລິດໃນປີ ຄສ 1979. ທັງນີ້ກໍເພື່ອເປັນການຮັກສາໄວ້ຊຶ່ງວັດທະນະທໍາຂອງລາວ, ເຮັດໃຫ້ນັກທ່ອງທ່ຽວຕ່າງດ້າວທ້າວຕ່າງແດນທີ່ມາທ່ຽວຊົມມີຄວາມປະທັບໃຈໃນຄວາມເປັນລາວເຫັນເຖິງວິຖີວັດທະນະທໍາອັນແທ້ຈິງຂອງຄົນລາວ, ເປັນການສົ່ງເສີມໃຫ້ແກ່ຊາວບ້ານໃນຂົງເຂດ ເມືອງນາຊາຍທອງ ໄດ້ມີວຽກເຮັດງານທໍາສ້າງລາຍໄດໃຫ້ແກ່ຄອບຄົວເພື່ອເຮັດໃຫ້ການດໍາລົງຊີວິດຂອງປະຊາຊົນໃນຂົງເຂດເມືອງນາຊາຍທອງໄດ້ຮັບການພັດທະນາດີຂຶ້ນ.

  ແຫຼ່ງທ່ອງທ່ຽວດັ່ງກ່າວແມ່ນຈະເປີດໃຫ້ບໍລິການທຸກໆວັນ, ຊຶ່ງປະກອບດ້ວຍກິດຈະກໍາທ່ຽວຊົມເຮືອນຊົງລາວ, ເຄື່ອງມືຫັດຖະກໍາ,ການສະແດງສີລະປະ-ວັນ ນະຄະດີຂອງຊາວໜຸ່ມເຍົາວະຊົນ ແລະ ອື່ນໆ ທັງນີ້ກໍເພື່ອເປັນການສ້າງຂະບວນການຕ້ອນຮັບປີທ່ອງທ່ຽວລາວ-ຈີນ ປີ 2019 ໃຫ້ມີບັນຍາກາດເບີກບານມ່ວນຊື່ນພ້ອມກັນເປັນເຈົ້າພາບທີ່ດີຕ້ອນຮັບແຂກບ້ານແຂກເມືອງທີ່ຈະເຂົ້າມາຢ້ຽມຢາມທ່ຽວຊົມໃຫ້ມີຄວາມອົບອຸ່ນພູນສຸກ.

  ສໍາລັບທິດທາງແຜນການໃນອະນາຄົດທາງບໍລິສັດຈະພັດທະນາແຫຼ່ງທ່ອງທ່ຽວເພື່ອຮັບຮອງການທ່ອງທ່ຽວລະດັບຊາດ,ສ້າງເຍົາວະຊົນຜູ້ໜຸ່ມນ້ອຍໃຫ້ກາຍ ເປັນຜູ້ນໍາທ່ຽວ ແລະນັກສິລະປະຜູ້ມີຄວາມສາມາດ, ໃຫ້ການຝຶກອົບຮົມທາງດ້ານສີມືແຮງງານແກ່ຊາວບ້ານໃຫ້ກາຍເປັນຜູ້ຜະລິດ ແລະນາຍຊ່າງຫັດຖະກໍາຜູ້ທີ່ມີຝີມືດີ, ຊຶ່ງນັກທ່ອງທ່ຽວທີ່ເຂົ້າມາຈະຕ້ອງໄດ້ນຸ່ງຖືແບບລາວ ແລະ ໃຊ້ເງິນກີບເທົ່ານັ້ນ.

ຂ່າວ: ກິ່ງລັດຕະນາ

แชร์