ລະວັງພວກມິດສາຊີບ ອອກລ່າທາງໂຊຊຽວ

          ຄືດັ່ງທີ່ຮູ້ແລ້ວວ່າ: ຂໍ້ມູນຂ່າວສານທາງອອນລາຍ ຫຼື ສື່ໂຊຊຽວ ມີທັງດ້ານບວກ ແລະ ລົບ ຊຶ່ງຜ່ານມາມີພວກມິດສາຊີບຈໍານວນບໍ່ໜ້ອຍ ທີ່ໄດ້ຕົວະຕົ້ມ, ຕົ້ມຕຸນດ້ວຍສາລະພັດຢ່າງ ແລະ ຫວ່າງບໍ່ດົນມານີ້ ພວກເຂົາກໍ່ໄດ້ແອບອ້າງເອົາຊື່ສະຖາບັນການເງິນ ແລະ ທະນາຄານຊື່ດັງ 3-4 ແຫ່ງ ທີ່ສົ່ງຜ່ານເຟສະບຸກ ເພື່ອໃຫ້ສັງຄົມ ຫຼື ປະຊາຊົນຫຼົງເຊື່ອໃນການສະໜອງແຫຼ່ງທຶນດອກເບ້ຍຕໍ່າໆ ແລະ ໃຫ້ບຸກຄົນ ທີ່ບໍ່ຄິດຮອບຄອບຫຼົງເຊື່ອ ແລະ ກາຍເປັນເຫຍື້ອຢ່າງບໍ່ຮູ້ສຶກຕົວ, ສຸດທ້າຍກໍ່ເສຍຊັບສິນ, ເງິນຄໍາ ແລະ ຂັວນກໍາລັງໃຈໄປຕາມໆກັນ.

          ພວກມິດສາຊີບ ມີພຶດຕິການຫຼາຍຮູບແບບ; ມີຈໍານວນໜຶ່ງກໍ່ປອມແປງເອກະສານ, ປອມແປງລາຍເຊັນ ແລະ ກາປະທັບ ເພື່ອຫຼອກລວງປະຊາຊົນ, ຫຼອກລວງນິຕິບຸກຄົນ, ບຸກຄົນ, ອົງກອນ... ແລະຫຼ້າສຸດໃນວັນທີ 30 ມີນາ 2023 ເພຈ໌ຂອງທະນາຄານແຫ່ງ ສປປ ລາວ ໄດ້ອອກແຈ້ງຂ່າວ ໂດຍທາງຫ້ອງການ ທະນາຄານແຫ່ງ ສປປ ລາວ (ທຫລ) ຂໍແຈ້ງມາຍັງທ່ານຊາບວ່າ: ໃນປະຈຸ ບັນມີບຸກຄົນບໍ່ຫວັງດີ ໄດ້ເຮັດການປອມແປງເອກະສານ ໃນຮູບແບບແຈ້ງການຂອງ ຫ້ອງການ ທຫລ ວ່າ ໄດ້ຢັ້ງຢືນກ່ຽວກັບການສະເຫນີແຫຼ່ງທຶນນໍາເງິນຈາກຕ່າງປະເທດ ເພື່ອນໍາເຂົ້າໂຄງການປູກຝັງລ້ຽງສັດໃນ ສປປ ລາວ ໂດຍເປັນຈໍານວນເງິນ 700 ລ້ານໂດລາສະຫະລັດ ເຂົ້າບັນຊີໃນກົງໂຕນຂອງທະນາຄານກາງ ພ້ອມທັງແຈ້ງວ່າໃຫ້ເສຍຄ່າພັນທະອາກອນ ແລະ ເສຍພັນທະໃຫ້ພາກລັດ ແລະ ອື່ນໆ.

ໃນຄວາມເປັນຈິງແລ້ວ ຫນັງສືແຈ້ງການສະບັບດັ່ງກ່າວ ເປັນການສ້າງຂຶ້ນປອມແປງ, ຕັດຕໍ່ ແລະ ບໍ່ມີມູນຄວາມຈິງແຕ່ປະການໃດ. ຜ່ານມາຫ້ອງການ ທຫລ ຂໍຢັ້ງຢືນວ່າບໍ່ເຄີຍແຈ້ງການໃນລັກສະນະນີ້ມາກ່ອນ, ພວກເຮົາມີແຕ່ແຈ້ງເຕືອນໃຫ້ສັງຄົມມີສະຕິລະວັງຕົວ ຕໍ່ກົນອຸບາຍກຸ່ມຄົນທີ່ແອບອ້າງວ່າມີແຫຼ່ງທຶນຈໍານວນມະຫາສານ ຈະນໍາເຂົ້າໃນ ສປປ ລາວ, ແຕ່ຕົວຈິງແມ່ນເປັນການຕົວະປັ່ນປ່ວນສັງຄົມ. ພ້ອມນີ້, ຂໍແຈ້ງມາຍັງທຸກພາກສ່ວນ ຈົ່ງມີສະຕິລະວັງຕົວບໍ່ໃຫ້ຫຼົງເຊື່ອການແອບອ້າງ ກ່ຽວກັບການນໍາເຂົ້າແຫຼ່ງທຶນດັ່ງກ່າວເດັດຂາດ. ຖ້າຫາກວ່າ ບຸກຄົນໃດມີພຶດຕິກໍາໃນການປອມແປງເອກະສານແມ່ນມີຄວາມຜິດຕາມກົດຫມາຍ ແລະ ຈະໄດ້ສົ່ງໃຫ້ເຈົ້າຫນ້າທີ່ດໍາເນີນຕາມຂັ້ນຕອນຂອງລະບຽບກົດຫມາຍ ຂອງ ສປປ ລາວ.

ຕໍ່ບັນຫາດັ່ງກ່າວຂ້າງເທິງນັ້ນ, ມັນໄດ້ເລັ່ງທວງໃຫ້ສັງຄົມ ຕະຫຼອດເຖິງພະນັກງາານ, ທະຫານ, ຕໍາຫຼວດ, ພະນັກງານບໍານານ, ນັກລົງທຶນ, ພໍ່ຄ້າ-ຊາວຂາຍ ແລະ ປະຊາຊົນບັນດາເຜົ່າ ຈົ່ງມີສະຕິລະວັງຕົວສູງ ເພື່ອຕອບໂຕ້-ຕອບຕ້ານ ແລະ ຢ່າຫຼົງເຊື່ອເປັນອັນຂາດ ເພາະໃນຜ່ານມາຂ້າພະເຈົ້າກໍ່ໄດ້ຂຽນເປັນຂ່າວ-ເປັນບົດນໍາມາແລ້ວໃນຊຸມປີຫຼັງໆ; ແຕ່ເຖິງຢ່າງໃດກໍ່ຕາມ, ພວກເຮົາຈົ່ງເຊື່ອໝັ້ນ ຕໍ່ການແຈ້ງການ ທີ່ອອກຈາກພາກລັດ ທີ່ເປັນທາງການທໍ່ນັ້ນ.

 

แชร์