ລາວ-ໄທ ຈັບມືພັດທະນາສົ່ງເສີມຜູ້ປະກອບການເຄືອຂ່າຍທຸລະກິດ ບິສຄັບ (Bizclub)

ໃນວັນທີ 28 ມີນາ 2023 ທີ່ໂຮງແຮມອາມາຣີ ດອນເມືອງ ປະເທດໄທ ໄດ້ມີພິທີເຊັນບົດບັນທຶກຄວາມເຂົ້າໃຈລະຫວ່າງເຄືອຂ່າຍທຸລະກິດ ບິສຄັບ (Bizclub) ປະເທດໄທ ແລະສະມາຄົມນັກທຸລະກິດໜຸ່ມແຫ່ງຊາດລາວ ໂດຍຕາງເຂົ້ານັກທຸລະກິດລາວແມ່ນ ທ່ານ ຄໍາແສນ ສີສະວົງ ປະທານສະມາຄົມນັກທຸລະກິດໜຸ່ມແຫ່ງຊາດ, ສປປ ລາວ ແລະທ່ານ ຄູນທະນົນ ບຸນະວັດຕະກຸນ ປະທານເຄືອຂ່າຍທຸລະກິດຍິງ ແຫ່ງປະເທດໄທ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ.

ສອງຝ່າຍໄດ້ເຫັນດີເປັນເອກະພາບຈະມີການຮ່ວມມືໃນການພັດທະນາແລກປ່ຽນ, ສົ່ງເສີມ, ການເຊື່ອມໂຍງດ້ານການຄ້າ ແລະ ການລົງທຶນ, ການສົ່ງເສີມຜູ້ປະກອບການ ເຊັ່ນດຽວກັນກັບການເຊື່ອມໂຍງທາງການຕະຫຼາດຜະລິດຕະພັນທັງພາຍໃນ ແລະຕ່າງປະເທດ. ສະນັ້ນ, ຈຶ່ງໄດ້ເຊັນບົດບັນທຶກຄວາມເຂົ້າໃຈຄັ້ງນີ້; ທັງສອງຝ່າຍຈະຮ່ວມກັນສ້າງໂອກາດທາງການຕະຫຼາດຜະລິດຕະພັນໂດຍໄດ້ສ້າງຕັ້ງຄະນະເຮັດວຽກລະຫວ່າງສອງຝ່າຍເພື່ອສ້າງກາລະໂອກາດການຕະຫຼາດ, ຜະລິດຕະພັນຂອງເຄືອຂ່າຍທຸລະກິດນິສຄັບປະເທດໄທ ແລະສະມາຄົມນັກທຸລະກິດໜຸ່ມແຫ່ງຊາດລາວທີ່ຈະສາມາດເຊື່ອມຕໍ່ຕະຫຼາດຮ່ວມກັນຊຶ່ງຈະຊຸກຍູ້ການແລກປ່ຽນສິນຄ້າ, ການບໍລິການ ແລະສ້າງໂອກາດໃຫ້ບັນດາສະມາຊິກຂອງສອງຝ່າຍ.

ກ່ຽວກັບກຳນົດກິດຈະກຳຮ່ວມທຶນ ຄື: ການຝຶກອົບຮົມສໍາມະນາຮ່ວມ; ການເຂົ້າຮ່ວມໃນງານວາງສະແດງ, ການຈັບຄູ່ທຸລະກິດທັງສະໜັບສະໜູນການຄ້າພາຍໃນ ແລະຕ່າງປະເທດຂອງສອງຝ່າຍ, ການດໍາເນີນງານພາຍໃຕ້ບົດບັນທຶກຄວາມເຂົ້າໃຈນີ້ຈະໄດ້ຮັບການປະຕິບັດໃນຮູບແບບຂອງໂຄງການຮ່ວມມືຕາມລາຍລະອຽດຂອງແຕ່ລະກິດຈະກຳ.

• 29/03/2023