ໂຮງຮຽນວິຣະຖາວອນ ແຂ່ງຂັນຄະນິດຄິດໄວ ສົ່ງເສີມນັກຮຽນພັດທະນາທາງດ້ານມັນສະໝອງ

ໂຮງຮຽນອະນຸບານ-ປະຖົມ-ມັດທະຍົມສົມບູນ ວິຣະຖາວອນ ເມືອງສີສັດຕະນາກ ນະຄອນຫຼວງວຽງຈັນ ຈັດການແຂ່ງຂັນຄະນິດຄິດໄວ ຄັ້ງທຳອິດ ເພື່ອເນັ້ນການພັດທະນາທາງດ້ານມັນສະໝອງ, ເຮັດໃຫ້ການຈື່ຈຳ, ສ້າງສະມາທິທີ່ດີ ແລະ ເຮັດໃຫ້ນັກຮຽນມີການວິເຄາະຄົ້ນຄິດຕາມຂັ້ນຕອນ ແລະກ້າສະແດງອອກ.

ພິທີດັ່ງກ່າວ, ໄດ້ຈັດຂຶ້ນເມື່ອວັນທີ 26 ມີນາ 2023 ທີ່ໂຮງຮຽນດັ່ງກ່າວ, ໂດຍໃຫ້ກຽດເຂົ້າຮ່ວມຂອງທ່ານ ນາງ ນິລາວັນ ວິຣະຖາວອນ ຜູ້ອຳນວຍການໂຮງຮຽນວິຣະຖາວອນ, ທ່ານ ວິຊຽນ ລາຕິດ ຜູ້ອຳນວຍການສະຖາບັນດາຣາທີບ ແລະສະຖາບັນ SOROBAN KIDS ຈາກປະເທດໄທ ພ້ອມດ້ວຍພະນັກງານ, ຄູ-ອາຈານ, ນ້ອງນັກຮຽນທີ່ເຂົ້າແຂ່ງຂັນ ຕະຫຼອດຮອດພໍ່ແມ່ຜູ້ປົກຄອງນັກຮຽນ.

ທ່ານ ນາງ ນິລາວັນ ວິຣະຖາວອນ ໄດ້ໃຫ້ສຳພາດວ່າ: ການຈັດການແຂ່ງຂັນ ຄະນິດຄິດໄວ ເປັນຫຼັກສູດ SOROBAN ເປັນຫຼັກສູດໜຶ່ງ ທີ່ເນັ້ນການພັດທະນາທາງດ້ານມັນສະໝອງຂອງນ້ອງນັກຮຽນ, ເຮັດໃຫ້ການຈື່ຈຳສ້າງສະມາທິດີຂຶ້ນ, ເຮັດໃຫ້ນັກຮຽນມີການວິເຄາະຄົ້ນຄິດຕາມຂັ້ນຕອນ, ກ້າສະແດງອອກ, ມີຄວາມເຊື່ອໝັ້ນໃນຕົວເອງ ລວມທັງມີການຄິດເລກໄວຂຶ້ນ. ສະນັ້ນ, ທາງໂຮງຮຽນຈຶ່ງໄດ້ນຳເອົາຫຼັກສູດນີ້ເຂົ້າມາ ເພື່ອໃຫ້ເດັກນ້ອຍໄດ້ມີທັກສະທີ່ດີ, ມີໄຫວພິບ ແລະມີການພັດທະນາຕາມໄວ. ສຳລັບກິດຈະກຳໃນຄັ້ງນີ້,ມີນັກຮຽນເຂົ້າຮ່ວມເກືອບ 200 ຄົນເຂົ້າຮ່ວມແຂ່ງຂັນໃນນັ້ນ,ມີນັກຮຽນຈາກໂຮງຮຽນ ວິຣະຖາວອນ ເຂົ້າຮ່ວມນັບແຕ່ຊັ້ນອະນຸບານ 3 ຫາ ປ.5 ມີຈຳນວນ 127 ຄົນ ໃນນີ້ຊັ້ນອະນຸບານ 46 ຄົນ. ນອກນັ້ນ,ແມ່ນນັກຮຽນມາຈາກແຂວງພະເຍົາ,ກາລະສິນ,ໜອງຄາຍ,ຊຽງໃໝ່ ແລະ ນະຄອນຫຼວງບາງກອກ ປະເທດໄທ ຈານວນໜຶ່ງ, ໂດຍການສອບເສັງຄັ້ງນີ້ເປັນຄັ້ງທຳອິດສຳລັບໂຮງຮຽນວິຣະຖາວອນ, ຊຶ່ງຫວັງວ່າຈະຊ່ວຍເຮັດໃຫ້ນັກຮຽນມີຄວາມມັກຮັກໃນວິຊາຄະນິດສາດ ຫຼາຍຂຶ້ນກວ່າເກົ່າ.

ຂະນະດຽວກັນ, ທ່ານ ວິຊຽນ ລາຕິດ ກໍໄດ້ກ່າວວ່າ: ສຳລັບຫຼັກສູດການສອບເສັງດັ່ງກ່າວນີ້ແມ່ນໄດ້ດຳເນີນການຢູ່ໃນປະເທດໄທມາແລ້ວ 15 ປີ, ມີຫຼາຍກວ່າ 100 ໂຮງຮຽນເຂົ້າຮ່ວມ, ມີນັກຮຽນເຂົ້າຮ່ວມໂຄງການປະມານແສນກວ່າຄົນ, ຊຶ່ງນັກຮຽນຈຳນວນໜຶ່ງໄດ້ສຳເລັດການສຶກສາໃນລະດັບມະຫາວິທະຍາໄລ ກາຍເປັນ ດຣ ແພດໝໍ ວິສະວະກອນຕ່າງໆ, ບາງຄົນກໍເປັນຄູອາຈານ, ໂດຍທຸກຄັ້ງມີການຈັດກິດຈະກຳເວທີໃຫຍ່ໆ, ບັນດາອະດີດນັກຮຽນນັກສຶກສາເຫຼົ່ານັ້ນກໍຈະເຂົ້າມາຮ່ວມ ບັນຍາຍ ແບ່ງປັນປະສົບການຕ່າງໆໃຫ້ກັບລຸ້ນນ້ອງຕະຫຼອດມາ. ຜ່ານການຈັດຕັ້ງປະຕິບັດເຫັນວ່າໄດ້ຮັບຜົນດີ ເຮັດໃຫ້ນັກຮຽນມີສະມາທິລຽນລຳດັບໃນການຄົ້ນຄິດ ບໍ່ສະເພາະແຕ່ສາມາດຄິດໄລໄດ້ໄວເທົ່ານັ້ນແຕ່ຍັງເປັນການສົ່ງເສີມກ້າສະແດງອອກ ແລະ ຊຸກຍູ້ພອນສະຫວັນພິເສດ ດ້ວຍເຫດນັ້ນຈຶ່ງຂະຫຍາຍໂອກາດດັ່ງກ່າວໃນການແບ່ງປັນຄວາມຮູ້ມາຍັງປະເທດລາວໂດຍສະເພາະໂຮງຮຽນວິຣະຖາວອນແມ່ນເປັນໂຮງຮຽນແຫ່ງທຳອິດ ໃນ ສປປ ລາວ ທີ່ໄດ້ນຳໃຊ້ຫຼັກສູດດັ່ງກ່າວ ແລະພ້ອມເດີນໜ້າສືບຕໍ່ພັດທະນາຢ່າງຕໍ່ເນື່ອງເພື່ອສືບຕໍ່ພັດທະນາການຮຽນຮູ້ຂອງນັກຮຽນໃຫ້ນັບມື້ກ້າວໜ້າທຽບເທົ່າກັບພາກພື້ນ ແລະສາກົນ.

ໃນຕອນທ້າຍພິທີກໍໄດ້ມີການມອບລາງວັນໃຫ້ແກ່ນ້ອງນັກຮຽນທີ່ຜ່ານການແຂ່ງຂັນ ແລະສາມາດຍາດໄດ້ຄະແນນດີໃນແຕ່ລະອັນດັບອີກດ້ວຍ.

ຂ່າວໂດຍ: ບົວລະພາ ອິນສີມະນີ

แชร์