ສະແດງສິລະປະ ສະຫຼອງວັນສ້າງຕັ້ງກຳລັງ ປກສ ຄົບຮອບ 62

ກອງສິລະປະກອນ ປ້ອງກັນຄວາມສະຫງົບຈັດການສະແດງສິລະປະສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 62 ປີ (5 ເມສາ 1961-5 ເມສາ 2023) ຢູ່ກອງບັນຊາການ ປກສ ນະຄອນຫລວງວຽງຈັນ ໃນຕອນຄໍ່າວັນທີ 27 ມີນາຜ່ານມາ ໂດຍມີ ທ່ານ ພົຈວ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງ, ທ່ານ ພົຈວ ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫລວງວຽງຈັນ, ມີນາຍ ແລະພົນຕຳຫລວດ ເຂົ້າຮ່ວມຮັບຊົມ.

ໂອກາດນີ, ທ່ານ ພັອ ວັນນະສັກ ທອງອຸໄລ ຮອງກົມໂຄສະນາ-ອົບຮົມ ໄດ້ກ່າວວ່າ: ການສະແດງສິລະປະ ວັດທະນະທຳ ສະເຫຼີມສະຫຼອງ ວັນສ້າງຕັ້ງກຳລັງປ້ອງກັນຄວາມສະຫງົບ ຄັ້ງນີ້ ເພື່ອເປັນການໂຄ ສະນາເຜີຍແຜ່ທາດແທ້ມູນເຊື້ອ ອັນສະຫງ່າອົງອາດ, ນໍ້າໃຈເສຍສະຫລະອັນສູງສົ່ງ ແລະ ຜົນງານໄຊຊະນະ ອັນໃຫຍ່ຫຼວງ ທີ່ກໍາລັງປ້ອງກັນຄວາມສະຫງົບ ຍາດມາໄດ້ໃນຕະຫຼອດໄລຍະ 62 ປີ ທີ່ຜ່ານມາໂດຍຜ່ານ ບົດເພັງ, ບົດຟ້ອນ ແລະ ການສະແດງອື່ນໆ ແນໃສ່ເຮັດໃຫ້ນາຍ ແລະພົນຕຳຫລວດ ເຂົ້າໃຈແຈ້ງ ແລະ ເຊື່ອມຊຶມຢ່າງເລິກຊຶ່ງ. ພ້ອມກັນນັ້ນ, ກໍເພື່ອເປັນການຊົມເຊີຍຜົນງານອັນຍິ່ງໃຫຍ່ຂອງກຳລັງປ້ອງກັນຄວາມສະຫງົບໂດຍພາຍໃຕ້ການນຳພາທີ່ປີຊາສາມາດ, ສະຫລາດສ່ອງໃສ ແລະເດັດຂາດ, ໂດຍກົງ, ຮອບດ້ານຂອງພັກປະຊາຊົນປະຕິວັດລາວ ຕໍ່ກຳລັງປ້ອງກັນຄວາມສະຫງົບ; ພ້ອມນັ້ນກໍເພື່ອເປັນການອະນຸລັກຮັກສາ ແລະເສີມຂະຫຍາຍວັດທະນະທຳອັນດີງາມຂອງຊາດໃຫ້ຄຽງຄູ່ກັບຊາດລາວຄົນລາວຕະຫລອດໄປ.

ສໍາລັບ ລາຍການສະແດງປະກອບມີ: ບົດຟ້ອນປະສານຮ້ອງ: ຈົດຈຳມູນເຊື້ອວິລະກຳ, ນັກຮົບສັນຕິລາດ,ງາມແດນຈຳປາ,ມ່ວນຊື່ນໃນສຽງກະໂປະ,ເພື່ອການສັນຈອນ, ດ່ຽວແຄນ ແລະ ບົດຟ້ອນ ບົນເສັ້ນທາງເດີນ; ບົດເພງປະກອບມີ: ເພງໃຕ້ຮົ່ມທຸງສີແດງ, ປ້ອງກັນຄວາມສະຫງົບປະຊາຊົນ, 5 ເມສາໝັ້ນຍືນ, ຮ່ວມໃຈຕ້ານຢາເສບຕິດ,ປ້ອງກັນຄວາມສະຫງົບເພື່ອປະຊາຊົນ, ຮ່ວມໃຈສ້າງພະລາທິ ການກັບທີ່, ຈົ່ງຄິດເຫັນອະນາຄົດ, ເຄື່ອນທີ່ໄວ, ບົນເສັ້ນທາງເດີນ ແລະລໍາສີພັນດອນ.
ພາບ-ຂ່າວ: ສຸກສະຫວັດ, ຄຳໂຖ

• 28/03/2023