ຮອງນາຍົກລັດຖະມົນຕີ ຢ້ຽມຢາມພະນັກງານແພດໝໍຢູ່ໂຮງໝໍ 5 ເມສາ

ທ່ານ ພົອ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ (ປກສ) ພ້ອມຄະນະໄດ້ເຄື່ອນໄຫວຢ້ຽມຢາມ ແລະພົບປະໂອ້ລົມພະນັກງານແພດໝໍ ແລະໃຫ້ກໍາລັງໃຈຄົນເຈັບຢູ່ໂຮງໝໍ 5 ເມສາ ໃນວັນທີ 27 ມີນາ 2023 ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 62 ປີ (5 ເມສາ 1961-5 ເມສາ 2023), ໂດຍການຕ້ອນຮັບຂອງ ທ່ານ ພັອ ນາງ ພຸດມາລາ ພັນທະມິດ ຫົວໜ້າອຳນວຍການໂຮງໝໍ 5 ເມສາ ພ້ອມດ້ວຍພະນັກງານແພດໝໍໃຫ້ການຕ້ອນຮັບ.

ໃນໂອກາດເຄື່ອນໄຫວຢ້ຽມຢາມຄັ້ງນີ້, ທ່ານ ພົອ ວິໄລ ຫລ້າຄໍາຟອງ ໄດ້ຮັບຟັງການລາຍງານກ່ຽວກັບການເຄື່ອນໄຫວປະຕິບັດໜ້າທີ່ວຽກງານຂອງພະນັກງານແພດໝໍໃນໄລຍະ 1 ປີຜ່ານມາ ຊຶ່ງຄະນະພັກ-ຄະນະບັນຊາໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດໃຫ້ແກ່ພະນັກງານແພດໝໍໃຫ້ມີລະບຽບວິໄນເຂັ້ມງວດ, ເຮັດສຳເລັດໜ້າທີ່ຕາມການມອບໝາຍ, ຮັກສາໄດ້ຈັນຍາບັນ, ຈັນຍາທຳ, ມີນໍ້າໃຈບໍລິສຸດສັດຊື່ຮັກແພງເບິ່ງແຍງຄົນເຈັບຄືຍາດພີ່ນ້ອງຂອງຕົນ ແລະບໍລິການຮັບໃຊ້ດ້ວຍຄວາມບໍລິສຸດໃຈ, ເອົາໃຈໃສ່ປັບປຸງວຽກງານບໍລິການຮັບໃຊ້ໃຫ້ດີຂຶ້ນເທື່ອລະກ້າວ ເພື່ອຮັບປະກັນສຸຂະພາບຂອງນາຍ ແລະ ພົນຕຳຫລວດ ຕະຫລອດຮອດປະຊາຊົນທີ່ເຂົ້າມາໃຊ້ບໍລິການໃຫ້ໄດ້ຮັບຜົນດີຕາມຄຳຂວັນ 5 ດີ 1 ພໍໃຈຄື: ຮັບຕ້ອນດີ, ບໍລິການດີ, ສະອາດ ແລະສະດວກດີ, ບົ່ງມະຕິຊັດເຈນດີ, ປິ່ນປົວດີ ແລະ ຄົນເຈັບມີຄວາມເພິ່ງພໍໃຈໃນການມາໃຊ້ບໍລິການ ຊຶ່ງໃນ 1 ປີຜ່ານມາມີຄົນເຈັບມາກວດເຂດນອກ 13.865 ຄົນ, ແກ້ໄຂສຸກເສີນ 9.388 ຄົນ, ຢັ້ງຢືນສຸຂະພາບ 3.425 ຄົນ, ປິ່ນປົວກາຍະບຳບັດ 2.093 ຄົນ, ຮັບຄົນເຈັບເຂົ້ານອນໂຮງໝໍ 1.530 ຄົນ, ປິ່ນປົວດີກັບຄືນກົມກອງ 1.502 ຄົນ. ສັງລວມແລ້ວການປິ່ນປົວຄົນເຈັບຜ່ານມາແມ່ນໄດ້ປະຕິບັດຕາມຫລັກການວິຊາສະເພາະ, ເຕັກນິກ ແລະມີທ່າກ້າວຂຶ້ນສະແດງອອກພະນັກງານແພດໝໍສາມາດເຮັດໄດ້ເຊັ່ນ: ການຜ່າຕັດມົດລູກ, ຜ່າຕັດກ້ອນເບົ້າ, ຜ່າຕັດໄຂ່ຫລັງ ແລະຜ່າຕັດປ້າງໄດ້ເລີ່ມແຕ່ປີ 2020 ເປັນຕົ້ນມາ.

ໂອກາດນີ້, ທ່ານ ພົອ ວິໄລ ຫລ້າຄໍາຟອງ ໄດ້ມີຄຳເຫັນໂອ້ລົມຮຽກຮ້ອງຕໍ່ພະນັກງານແພດໝໍບາງຕອນສຳຄັນວ່າ: ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນເງື່ອນໄຂໃໝ່ໃຫ້ເອົາໃຈໃສ່ປັບປຸງກໍ່ສ້າງກໍາລັງໃນທຸກດ້ານໃຫ້ມີຄຸນນະພາບມີການຫັນປ່ຽນຢ່າງຕັ້ງໜ້າ, ສຸມໃສ່ຄົ້ນຄວ້າທາງດ້ານເຕັກນິກ-ວິທະຍາສາດການແພດ, ວິຊາການ-ວິຊາສະເພາະທີ່ກ່ຽວຂ້ອງໃຫ້ພະນັກງານວິຊາການເປັນປະຈໍາ ເພື່ອຍົກສູງຄຸນນະພາບຂອງການປິ່ນປົວໃຫ້ທຽບເທົ່າກັບໂຮງໝໍສູນກາງ ແລະສາກົນ. ພ້ອມນັ້ນຕ້ອງໄດ້ເອົາໃຈໃສ່ຕິດຕາມ-ກວດກາ, ຄຸ້ມຄອງ, ປົກປັກຮັກສາບົວລະບັດບັນດາອຸປະກອນ, ເຄື່ອງປະກອບກໍຄືຕຶກອາຄານໃຫ້ຮັບປະກັນໃນການປິ່ນປົວ ແລະນໍາໃຊ້ໄດ້ຍາວນານ. ຈາກນັ້ນ, ທ່ານ ພົອ ວິໄລ ຫລ້າຄໍາຟອງ ໄດ້ພົບປະ ແລະຢ້ຽມຢາມພະນັກງານ, ຄົນເຈັບທີ່ເຂົ້າມາປິ່ນປົວພາຍໃນໂຮງໝໍ 5 ເມສາ ພ້ອມທັງນໍາເອົາກະຕ່າຂອງຂວັນມາມອບໃຫ້ພະນັກງານ ແລະຄົນເຈັບເພື່ອເປັນຂວັນກໍາລັງໃຈໃຫ້ເຊົາຈາກພະຍາດກັບມາແຂງແຮງໂດຍໄວ.
ຂ່າວ-ພາບ: ນາງ ຄອນສະຫວັນ

แชร์