ທີ່ປຶກສາສະມາຄົມເຟີນິເຈີລາວ ຢ້ຽມຊົມ ແລະຊຸກຍູ້ງານວາງສະແດງສິນຄ້າເຟີນິເຈີວຽງຈັນຄັ້ງທີ 7 ປະຈຳປີ 2023

ເມື່ອວັນທີ 24 ມີນາ 2023 ທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ ທ່ານ ຄຳໄພ ສົມຊະນະ ແລະທ່ານ ກອງມາລາ ພົມມະໄລ ທີ່ປຶກສາສາມາຄົມເຟີນິເຈີລາວ ໄດ້ໃຫ້ກຽດລົງຢ້ຽມຊົມ ແລະຊຸກຍູ້ ງານວາງສະແດງສິນຄ້າເຟີນິເຈີວຽງຈັນຄັ້ງທີ 7 ປະຈຳປີ 2023 , ໂດຍມີທ່ານ ທອງດຳ ສີຫາມາຍາ ປະທານສະມາຄົມເຟີນິເຈີລາວ ພ້ອມດ້ວຍຄະນະໄດ້ໃຫ້ການຕ້ອນຮັບຢ່າງອົບອຸ່ນ.

ໃນໂອກາດລົງຢ້ຽມຊົມຄັ້ງນີ້ຄະນະສະມາຄົມເຟີນິເຈີລາວ ໄດ້ນຳພາທີ່ປຶກສາເລາະທ່ຽວຊົມບັນດາສິນຄ້າເຟີນິເຈີສວຍງາມທີ່ເປັນສີໄມ້ລາຍມືຂອງຄົນລາວເຮົາຜະລິດນຳມາເຂົ້າຮ່ວມວາງສະແດງໂດຍສະເພາະແມ່ນຜະລິດຕະພັນເຄື່ອງເຟີນິເຈີທີ່ຜະລິດດ້ວຍໄມ້, ຫວາຍ, ໄມ້ປ່ອງ ແລະຈາກວັດສະດຸເສດເຫຼືອຕ່າງໆທີ່ເຮັດເປັນເຄື່ອງເຟີນິເຈີ; ຜະລິດຕະພັນຫັດຖະກຳ, ເຄື່ອງແກະສະຫຼັກ, ເຄື່ອງປະດັບແຕ່ງເອ້ຢ້ອງພາຍໃນເຮືອນຕະຫຼອດຮອດອຸປະກອນກ່ຽວຂ້ອງກັບຂະບວນການຜະລິດເຄື່ອງເຟີນິເຈີໄມ້ ແລະເຄື່ອງຮັບໃຊ້ໃນຄົວເຮືອນຕ່າງໆ.

ຫຼັງຈາກສຳເລັດເລາະຊົມສິນຄ້າທາງຄະນະສະມາຄົມກໍໄດ້ລາຍງານຕໍ່ທ່ານທີ່ປຶກສາໃຫ້ຊາບກ່ຽວກັບຈຸດປະສົງການຈັດງານກໍເພື່ອເພື່ອຊຸກຍູ້ ແລະສົ່ງເສີມຜະລິດຕະພັນພາຍໃນ, ໃຫ້ຄົນລາວ ຫັນມານຳໃຊ້ຜະລິດຕະພັນເຟີນິເຈີລາວຫຼາຍຂື້ນ ຄຽງຄູ່ກັບການຟື້ນຟູເສດຖະກິດ ກໍຄືຫົວໜ່ວຍທຸລະກິດພາຍຫຼັງທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໃນຜ່ານມາ ເພື່ອພ້ອມກັນຜ່ານຜ່າຄວາມຫຍຸ້ງດ້ານເສດຖະກິດ-ການເງິນຂອງປະເທດ ທີ່ພວມຜະເຊີນໃນເວລານີ້.

ຕໍ່ຈາກນັ້ນທ່ານທີ່ປຶກສາທັງ 2 ທ່ານກໍໄດ້ຜັດປ່ຽນກັນມີຄວາມເຫັນ ຊຶ່ງກ່ອນອື່ນໄດ້ຍ້ອງຍໍຊົມເຊີຍຕໍ່ຄະນະສະມາຄົມທີ່ສາມາດເຕົ້າໂຮມເອົາບັນດາສິນຄ້າພາຍໃນທີ່ເປັນສືມີຂອງຄົນລາວເຮົາເອງ ເຂົ້າມາຮ່ວມວາງສະແດງໃນຄັ້ງນີ້ ພ້ອມນັ້ນຍັງໄດ້ແນະນຳຕື່ມເລື່ອງການຜະລິດສິນຄ້າພາຍໃນໃຫ້ຮັກສາໄດ້ສີໄມ້ລາຍມືທີ່ເປັນເອກະລັກລາວເຮົາ, ໃຫ້ຍົກສູງຄຸນນະພາບຫຼາຍຂຶ້ນ ເພື່ອໃຫ້ສາມາດສົ່ງອອກຂາຍພາຍໃນ ແລະຕ່າງປະເທດໄດ້ຫຼາຍຂຶ້ນກວ່າເກົ່າ.

ງານວາງສະແດງສິນຄ້າຄັ້ງນີ້ດຳເນີນຂຶ້ນໃນລະຫວ່າງວັນທີ 18-26 ມີນາ 2023 ໂດຍມີບັນດາຜູ້ປະກອບການໃນຂອບເຂດທົ່ວປະເທດນຳສິນຄ້າເຟີນິເຈີສວຍງາມຫຼາກຫຼາຍຮູບຫຼາຍຊົງເຂົ້າຮ່ວມວາງສະແດງ 120 ຫ້ອງ ທີ່ຢູ່ພາຍໃນນະຄອນຫຼວງວຽງຈັນ, ມາຈາກຕ່າງແຂວງ ແລະ ພິເສດຍັງມີສິນຄ້າໂອດັອບເຂົ້າຮ່ວມນຳ.

ຊຶ່ງນອກຈາກນັ້ນແລ້ວພາຍໃນງານຍັງມີການສາທິດການຜະລິດເຄື່ອງເຟີນິເຈີ, ແກະສະຫຼັກໄມ້;ການຈົກສະຫຼາກຊິງລາງວັນ ແລະການສະແດງສິນລະປະດົນຕີນຳອີກ.

แชร์